ޕްރޮސިކިއުޓަރ ޖެނެރަލްގެ އޮފީހުން ކުށުގެ އޮންލައިންކޮށް 10 މިނެޓު ތެރޭގައި ކުށުގެ ރެކޯޑު ސާފު ކުރެވޭނެ އިންތިޒާމު ހަމަޖައްސައިފި އެވެ.
ޕީޖީ އޮފީހުން ބުނީ އޮންލައިންކޮށް ކުށުގެ ރެކޯޑު ސާފުކުރުމަށް ހުށަހަޅާ މީހުންގެ ރެކޯޑު، 10 މިނިޓު ތެރޭގައި ސާފުކޮށްދިނުމުގެ ހިދުމަތް އެ އޮފީހުން ދެމުން އަންނަ ކަމަށެވެ.
ޕީޖީއިން ވަނީ ކޮންމެ ދުވަހަކު ހެނދުނު ހުށަހަޅާ ފޯމުތައް، އެދުވަހުގެ މެންދުރު 1:30 ގައި ލިބޭގޮތަށް، ދުވަހުން ދުވަހަށް ކުށުގެ ރެކޯޑު ސާފުކޮށްދޭގޮތަށް ހަމަޖައްސާފަ އެވެ.
ނަމަވެސް މެންދުރު 12 ގެ ފަހުން ހުށަހަޅާ ފޯމުތައް ލިބޭނީ ޖެހިގެން އަންނަ ދުވަހުގެ ހެނދުނު 9:00 ޖަހާއިރު ކަމަށް އެ އޮފީހުން ބުނެ އެވެ.
"މިއޮފީހުގެ އަމާޒަކީ، މިއޮފީހުން ރައްޔިތުންނަށް ފޯރުކޮށްދޭ ޚިދުމަތްތައް ވީހައިވެސް ލުއިފަސޭހަކޮށް، ހަރުދަނާކޮށް، އަވަހަށް ލިބޭނޭ އިންތިޒާމުތަކެއް ހަމަޖެއްސުން،" ޕީޖީއިން ބުންޏެވެ.
ޕްރޮސިކިއުޓަރ ޖެނެރަލްގެ އޮފީހުން ކުށުގެ ރެކޯޑު ސާފުކުރުމަށް އޮފީހުގެ ކައުންޓަރަށް ހުށަހަޅާ ފޯމުތައް، މީގެ ކުރިން ދޫކުރުމުން އައީ ހުށަހަޅާ ދުވަހާ ޖެހިގެން އަންނަ ދުވަހުއެވެ.
ޕީޖީއިން އޮންލައިންކޮށް ކުށުގެ ރެކޯޑު ސާފު ކުރެވޭނެ ގޮތް ހެދީ މިދިޔަ އަހަރުގެ ސެޕްޓެމްބަރު ތެރޭގަ އެވެ. އޭރު ހިދުމަތް ފެށީ އެއް ދުވަސް ތެރޭގައި ޖަވާބު ލިބޭ ގޮތަށެވެ.
