ކޮންމެ ދުވަހަކު ކޮންމެވެސް ރައްޔިތެއްގެ ސުވާލަކަށް ޖަވާބުދެއްވުމަށް އަމާޒު ހިފައިގެން ރައީސް ޑރ. މުހައްމަދު މުއިއްޒު ފެށްޓެވި "ރައީސްގެ ޖަވާބު" ސިލްސިލާ ހުއްޓިފައި އޮންނަތާ މަސްދުވަސްވެއްޖެ އެވެ.
"ރައީސްގެ ޖަވާބު" ސިލްސިލާގެ ވީޑިއޯއެއް އެންމެފަހުން އާންމު ކުރީ މިދިޔަ އޭޕްރިލް 7، ގަ އެވެ. އޭގެފަހުން މި ފާއިތުވި އެއް މަސްދުވަހުގެ ތެރޭގައި ރައީސް އޮފީހުން ގެނެސްދޭ އެ ސިލްސިލާގެ އެއްވެސް ވީޑިއޯއެއް މިހައިތަނަށް ގެނެސްދީފައެއް ނުވެ އެވެ.
އެކަމާ ގުޅޭ ގޮތުން ރައީސް އޮފީހުގެ ތަރުޖަމާނު، ހީނާ ވަލީދު "އަދަދު" އަށް ވިދާޅުވީ "ރައީސްގެ ޖަވާބު" ސިލްސިލާ އެއްކޮށް ހުއްޓައިލީ ނޫން ކަމަށާއި ވަރަށް އަވަހަށް އެ ސިލްސިލާގެ ދަށުން ވީޑިއޯތައް އާންމު ކުރައްވަން ފަށްޓަވާނެ ކަމަށެވެ.
"ހުރިހާ ފަރާތްތަކަށް ވެސް ސުވާލު ފޮނުވޭނެ ނިޒާމެއް ގާއިމު ކުރުމުގެ މަސައްކަތް ކުރަމުން ދާތީ، ވަރަށް އަވަހަށް އެ ސީރީސް ފަށްޓަވާނެ،" ހީނާ ވިދާޅުވި އެވެ.
ހުރިހާ ރައްޔިތުންނަށް ސުވާލު ފޮނުވޭނެ ނިޒާމެއް ގާއިމު ކުރުމުގެ މަސައްކަތް ކުރަމުންދާކަމަށް ހީނާ ވިދާޅުވިއިރު، ސީދާ ރައީސްއާ ސުވާލު ކުރެވޭނެ ޕޯޓަލްއެއް މިދިޔަ ފެބްރުއަރީ 23، ވަނަ ދުވަހު ސަރުކާރުން ވަނީ އިފްތިތާހުކޮށްފަ އެވެ.
އީފާސް ބޭނުން ކޮށްގެން ލޮގިން ވެވޭ އެ ޕޯޓަލް މެދުވެރިކޮށް ރައްޔިތުންގެ ހިތްތަކުގައި އުފެދޭ ސުވާލުތަކާއި ޝަކުވާތަކުގެ އިތުރުން ސަރުކާރު ހިންގުމަށް ގެންނަން ބޭނުންވާ ހިޔާލު ވެސް ސީދާ ރައީސްއަށް ހުށަހެޅުމުގެ ފުރުސަތު އޮވެ އެވެ.
އެ ޕޯޓަލް އިފްތިތާހު ކުރެއްވުމަށްފަހު ވާހަކަދައްކަވަމުން ރައީސް އެދުވަހު ވިދާޅުވީ ރައްޔިތުންގެ ހާދިމެއްގެ ގޮތުގައި މަސައްކަތް ކުރާއިރު، ރައްޔިތުންނާ ގާތުން މަސައްކަތް ކުރުމަށް މަގުފަހި ކުރަންޖެހޭނެ ކަމަށާއި، އެ ޕޯޓަލް އިފްތިތާހު ކުރުމުގެ މަގުސަދަކީ ރައްޔިތުން ބޭނުންވާ ކޮންމެ ސުވާލެއް އެމަނިކުފާނުގެ އަރިހުން އެހޭނެ ފުރުސަތު ހޯދައިދިނުން ކަމަށެވެ.
"ޕޯޓަލްއަށް ފޮނުވާ ސުވާލުތަކަށް ޖަވާބު ދޭނީ އަޅުގަނޑު. ދެފުށް ފެންނަ ޖަވާބުދާރީވާ ސަރުކާރެއް ގާއިމުކުރާނެ ކަމަށް އަޅުގަނޑު ވައުދުވީ. ޖަވާބު ދޭނަން އިރާދަކުރެއްވިޔާމުން. ޖަވާބު ނުދީ ކަންކަން ވާނުވާ ނޭގޭ ގޮތަކަށް އޮތުމަކީ އަޅުގަނޑު ކުރާ ހަމައެއް ނޫން," ރައީސް މުއިއްޒު އެދުވަހު ވިދާޅުވި އެވެ.
ރައީސް އެދުވަހު އެހެން ވިދާޅުވި ނަމަވެސް އެ ޕޯޓަލް މެދުވެރިކޮށް ހުށަހަޅާ ސުވާލުތަކަށް ވެސް ޖަވާބު ނުލިބޭ މައްސަލަ ވަނީ ފެންމަތިވެފަ އެވެ. އެގޮތުން ބައެއް ރައްޔިތުން މީގެ ދެމަސްދުވަސް ކުރިން ހުށަހެޅި ސުވާލުތަކަށް ވެސް ޖަވާބު ލިބިފައި ނުވާ ކަމަށް "އަދަދު" އަށް ވަނީ މައުލޫމާތު ދީފަ އެވެ.
ސިލްސިލާއެއްގެ ގޮތުގައި "ރައީސްގެ ޖަވާބު" ގެ ނަމުގައި ޕްރޮގުރާމެއް ރައީސް އޮފީހުން ގެނެސްދޭން ފެށީ ފެބްރުއަރީ 1، ގަ އެވެ. އެ ޕްރޮގުރާމު އޭރު ސަރުކާރުން ވަރަށް ގަދައަށޤ ޕްރޮމޯޓު ވެސް ކުރި އެވެ.
މިއަހަރުގެ ރިޔާސީ ބަޔާނުގައި ވެސް ރައީސް މުއިއްޒު އެ ސިލްސިލާގެ ވާހަކަ ފާހަގަކުރެއްވި އެވެ.
