ރާއްޖެ އާއެކު މިނިވަން ވިޔަފާރީގެ އެއްބަސްވުމެއް ނުވަތަ ފްރީ ޓްރޭޑް އެގްރީމެންޓް (އެފްޓީއޭ) އެއް ހަދަން ހުށަހަޅާފައި ނުވާނެ ކަމަށް ބުނެ މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ދެއްކެވި ވާހަކަތައް އެ ގައުމުން އިއްޔެ ދޮގުކޮށްފި އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާން ރަންދިރް ޖައިސްވާލް އިއްޔެ ބޭއްވި ނޫސްވެރިންގެ ބައްދަލުވުމެއްގައި ވަނީ އެފަދަ ރިޕޯޓުތަކެއް ފެނިފައިވާ ކަމަށް ވިދާޅުވެ އެ ރިޕޯޓުތައް ދޮގުކުރައްވާފަ އެވެ.
"އިންޑިއާއިން މިނިވަން ވިޔަފާރީގެ އެއްބަސްވުމެއް ގާއިމުކުރަން ހުށަހެޅި ކަމަށް މިނިސްޓަރު ވިދާޅުވި ރިޕޯޓުތަކެއް ދެކުނިން. އަޅުގަނޑުމެން އެދިފައި ނުވާނެ. އެހެން ނަމަވެސް, ރާއްޖެއިން އަޅުގަނޑުމެންނާ އެކު އެފަދަ އެެއްބަސްވުމެއް ގާއިމުކުރަން ބޭނުންވާނަމަ ޔަގީނުން ވެސް އެކަމަށް އަޅުގަނޑުމެން ބަލާނަން," އޭނާ ވިދާޅުވި އެވެ.
ނަމަވެސް މިދިޔަ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުހައްމަދު ސައީދު ވަނީ ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އާ އެއްބަސްވުމެއް ގާއިމުކުރުމުގެ މަސައްކަތް ކުރަމުންދާކަން ހާމަކުރައްވާފަ އެވެ.
ސައީދު ވިދާޅުވީ އެއްބަސްވުމެއް ގާއިމުކުރުމަށް އިސްވެ އެދުނީ އިންޑިއާގެ ފަރާތުން ކަމަށެވެ.
"އަޅުގަނޑު ވަރަށް ފަހުން އިންޑިއާ އާއެކު ކުރި މަޝްވަރާތަކެއްގައި އެ ބޭފުޅުން އިސްވެ ބޭނުންފުޅުވޭ ދިވެހިރާއްޖެއާ އެކުގައި ފްރީ ޓްރޭޑް އެގްރީމެންޓެއް އޮންނަން ވަކިން, އަދި ސަފްޓާގެ އިތުރަށް. ރައީސް އެވަނީ އެ ފުރުސަތު ހުރިހާ ގައުމަކާ އެކު ވެސް އޮންނަން," އޭނާ ވިދާޅުވި އެވެ.
ދެކުނު އޭޝިއާގެ ގައުމުތަކުގެ މެދުގައި 2004 ގައި މިނިވަން ވިޔަފާރީގެ އެއްބަސްވުމެއް ސޮއިކުރި އެވެ. އެއީ ސައުތު އޭޝިއަން ފްރީ ޓްރޭޑް އެގްރީމެންޓް (ސަފްޓާ) އެވެ.
މި ސަރަހައްދު އިގުތިސޯދީ ގޮތުން ބާރުވެރިކޮށް ވިޔަފާރިއަށް ފަހިކުރުމުގެ ގޮތުން ސޮއިކުރި އެ އެއްބަސްވުމުގައި ރާއްޖޭގެ ބައިވެރިވުން ވެސް އޮވެ އެވެ. ނަމަވެސް, ވަކިވަކި ގައުމުތަކާ އެކު ރާއްޖޭން އެފަދަ އެއްބަސްވުމެއްގައި ސޮއިކޮށްފައި ނުވެ އެވެ.
