މާލެއިން އުތުރުގެ ރަށެއްގައި 13 އަހަރުގެ އަންހެން ކުއްޖަކަށް ޖިންސީ ގޯނާ ކުރި މައްސަލައިގައި ހައްޔަރު ކުރި 27 އަހަރުގެ މީހާގެ ބަންދަށް މިއަދު ކްރިމިނަލް ކޯޓުން 30 ދުވަސް ޖަހައިފި އެވެ.
މީޑިއާތަކަށް ފުލުހުން މިރޭ ފޮނުވި ކުރު މެސެޖެއްގައި ބުނީ އެ މައްސަލައިގައި ތުހުމަތު ކުރެވޭ މީހާ ފިލުވުމަށް މަސައްކަތް ކުރި ކަމުގެ ތުހުމަތުގައި އިއްޔެ ހައްޔަރު ކުރި މީހާގެ ބަންދަށް 12 ދުވަސް ޖަހައިފައިވާ ކަމަށެވެެ.
ނޯތު ޕޮލިސްގެ ބެލުމުގެ ދަށުގައި އޮންނަ ނ، ރ، ބ، އަދި ޅ އަތޮޅު ހިމެނޭ ސަރަހައްދުގެ ރަށެއްގައި ކުޑަ ކުއްޖަކަށް ޖިންސީ ގޯނާ ކޮށްގެން ފުލުހުންނަށް ރިޕޯޓު ކުރީ މި މަހުގެ 19 ގައި ކަމަށް ފުލުހުން މީގެ ކުރިން ބުނެފައިވެ އެވެ.
އެކަން ހިނގައިފައިވާ ވަކި އަތޮޅެއް ނުވަތަ ރަށެއް ހާމަކޮށްފައި ނުވަނީ އަނިޔާ ލިބުނު ކުއްޖާއަކީ 18 އަހަރު ނުފުރޭ ކުއްޖެއް ކަމަށް ވާތީ އެވެ.
އެ މައްސަލައިގައި ތުހުމަތު ކުރެވޭ މީހާ ހައްޔަރު ކޮށްފައި ވަނީ ހޯދަން އިއުލާނު ކުރުމަށްފަހު އިއްޔެގެ ވަގުތެއްގަ އެވެ.
