ހުޅަނގު މޫސުމުގެ ބާރު ގަދަވެ ކުރަމުންދާ ވިއްސާރަ އަދިވެސް އަލި ނުވާތީ، ރާއްޖޭގެ އުތުރާއި މެދު ރާއްޖެ ތެރޭގެ އަތޮޅުތަކަށް މޫސުމާ ބެހޭ ގައުމީ އިދާރާ (މެޓް އޮފީސް) އިން ހުދު ސަމާލު ނެރެފި އެވެ.
ވޭތުވެދިޔަ ދެ ހަފުތާއެއްހާ ދުވަހު ރާއްޖޭގެ އެކި ސަރަހައްދުތަކަކަށް ޔެލޯ އެލާޓު އަދި އޮރެންޖު އިންޒާރު ވަނީ ނެރެފަ އެވެ. ނަމަވެސް ވިއްސާރަ ކޮންމެވެސް ވަރަކަށް އަލިވަމުންދާތީ ރެއިން ފެށިގެން ނެރެމުންދަނީ ހުދު ސަމާލެވެ.
މެޓް އޮފީހުން މިއަދު ހުދު ސަމާލު ނެރެފައިވަނީ ހއ. އަތޮޅުން ފެށިގެން ދ. އަތޮޅާ ހަމައަށެވެ. ސަމާލުގައިވާ ގޮތުގައި މިއަދު މެންދުރުވުމާ ހަމައަށް އެ ސަރަހައްދުތަކަށް ގަޑިއަކު 22 މޭލާއި 27 މޭލަށް ވައިޖެހޭނެ އެވެ. ވިލާގަނޑުގައި 50 މޭލަށް ވައިގަދަވާނެ ކަމަށްވެސް ބުނެފައިވެ އެވެ.
މި ސަރަހައްދުތަކުގެ ކަނޑުތައް ގަދަވާނެ ކަމަށްވެސް މެޓުން ބުނެފައިވެ އެވެ.
ނިމުނު ހަފުތާ ރާއްޖޭގެ މޫސުން ވަރަށް ބޮޑަށް ގޯސްވެ ކަނޑު އަދި ވައިގެ ދަތުރުތަކަށްވެސް ވަނީ ބުރޫއަރާފަ އެވެ. އެގޮތުން ކޮންމެ ކުރަން ޖެހިގެން ނޫނީ ކަނޑު ދަތުރު ނުކުރުމަށާއި ފަޅު ރަށްރަށާއި ފިނޮޅު ފަދަ ތަންތަނަށް ދަތުރު ނުދިއުމަށާއި މޫދަށް ނޭރުމަށްވެސް މެއި 22، ގައި ފުލުހުން އިންޒާރުދިނެވެ.
