ސަރުކާރާއި ސަރުކާރު ކުންފުނިތަކުގެ ސިޔާސީ މަގާމުތަކުގައި ތިބި މީހުންގެ ތެރެއިން ގިނަ އަދަދެއްގެ ބަޔަކު ވަޒީފާތަކުން ވަކިކުރަން އުޅޭކަމުގެ މައުލޫމާތު "އަދަދު" އަށް ލިބިއްޖެ އެވެ.
އެ މައުލޫމާތު އެނގޭ އެއް މަސްދަރަށް ވުރެ ގިނަ މަސްދަރުތަކުން "އަދަދު" އަށް ކަށަވަރުކޮށްދީފައިވާ ގޮތުގައި މި މަސައްކަތް ކުރަމުން ދަނީ ސަރުކާރުގެ ހަރަދުތައް ކުޑަކުރުމުގެ ތެރެއިން، ސިޔާސީ މަގާމުތަކަށް ކުރޭ ހޭދަ ކުޑަކުރުމުގެ ގޮތުންނެވެ.
ހަރަދުތައް ކުޑަކުރުމުގެ މަސައްކަތް ސަރުކާރުން މިފެށީ އަންނަ ހަފުތާގައި ހުވާކުރާ ރައްޔިތުންގެ މަޖިލީހުގެ ކަންކަން ހަމައަކަށް އަޅުވާފަ އެވެ. މުލިއާގޭގައި މިއަދު ބޭއްވި ބައްދަލުވުމެއްގައި ރައީސް ޑރ. މުހައްމަދު މުއިއްޒު ވަނީ ރައްޔިތުންގެ މަޖިލީހުގެ ރައީސް އާއި ނައިބު ރައީސް އާއި ޕީއެންސީގެ ޕާލިމެންޓަރީ ގްރޫޕުގެ މަގާމުތަކަށް، އެ މަނިކުފާނު ބޭނުންފުޅުވެލައްވާ ނަންތައް ހުށަހަޅުއްވާފަ އެވެ.
އަންނަން އޮތް މަޖިލީހުގައި ޕީއެންސީ އާއި ސަރުކާރާ ގުޅިފައިވާ ޕާޓީތަކުގެ ސުޕާ މެޖޯރިޓީ އޮތުމާއެކީ، ރައީސް ހުށަހަޅުއްވާފައިވާ ގޮތަށް މަޖިލީހުގެ މަގާމުތަކަށް އިންތިހާބުކުރާކަށް އެއްވެސް ހުރަހެއް ނޯންނާނެ އެވެ.
ސިޔާސީ މަގާމުތައް މަދުކުރުމުގެ ތެރެއިން އެންމެ ގިނައިން މަދުކުރަނީ ޑެޕިއުޓީ މިނިސްޓަރުންނާއި ޕޮލިޓިކަލް ޑިރެކްޓަރުންނާއި ސަރުކާރު ކުންފުނިތަކުގެ އެކި މަގާމުތަކުގައި ތިބި މީހުންނެވެ. ހަމަ އެހެންމެ މަޖިލިސް އިންތިހާބާ ދިމާކޮށް ބައެއް ކުންފުނިތަކުން ދިން ވަޒީފާތަކުން ވެސް މީހުން ވަކިކުރަން ނިންމާފައިވާ ކަމަށް ވެސް މައުުލޫމާތު ލިބިފައިވެ އެވެ.
ނަމަވެސް އެއީ ކޮން ބަޔެއް ކަމެއް މި ނޫހަށް މައުލޫމާތު ދިން މަސްދަރުތަކުން ހާމައެއް ނުކުރެ އެވެ. މިކަމުގައި މިހާތަަނަށް ސަރުކާރުން ވެސް އެއްވެސް އެއްޗެކޭ ނުބުނެ އެވެ.
ސިޔާސީ ވަޒީފާތައް މަދުކުރަން ނިންމާފައިވާއިރު، މި ސަރުކާރުގެ ސިޔާސީ މަގާމުތައް އިންތިހާއަށް ގިނަވެ ސިޔާސީ މުވައްޒަފުންނަށް ކުރާ ހޭދަ ރެކޯޑު މިންވަރަކަށް އިތުރުވެފައިވާ ކަމަށް އިދިކޮޅުން އަންނަނީ ބުނަމުންނެވެ. ފިނޭންސުގެ ރެކޯޑުތަކުން ވެސް ދައްކަނީ ދައުލަތުގެ މުވައްޒަފުންނަށް ކުރާ ހޭދަ އިތުރުވެފައިވާ ކަމަށެވެ.
މި ތުހުމަތުތައް ސަރުކާރުން ދޮގު ކުރި ނަމަވެސް މިއަދާ ހަމައަށް ސަރުކާރުގެ ސިޔާސީ މަގާމުތަކުގައި ތިބި މީހުންގެ ޖުމްލަ އަދަދު ހާމަނުކުރާތީ މިކަން ކަށަވަރު ވާނެ ގޮތެއް ނެތެވެ.
ފާހަގަކޮށްލަން ޖެހޭ ގޮތުގައި މި ވޭތުވި 24 ގަޑިއިރުގެ ތެރޭގައި ވެސް ބައެއް މަގާމުތަކުން މީހުން ވަކިކޮށް، އެހެން މަގާމުތައް ދީ، ބައެއް ޑެޕިއުޓީ މިނިސްޓަރުން ސަސްޕެންޑުކޮށްފައިވެ އެވެ.
މަގާމުން ވަކިކުރި މީހުންގެ ތެރެއިން އެންމެ ފާހަގަކޮށްލެވެނީ އެމްއެމްޕީއާރުސީގެ މެނޭޖިން ޑިރެކްޓަރު ފާތިމަތު ތައުފީގު ވަކިކުރުމާއި އެޗްޑީސީގެ ޗެއާމަން އަހުމަދު ޒުހޫރު ވަކިކުރުމެވެ. އިއްޔެ މިފްކޯގެ މެނޭޖިން ޑިރެކްޓަރު ކަމުން ވަކިކުރި ހުސެއިން ޝަމާހުއަށް ވަނީ ފިޝަރީޒް މިނިސްޓްރީގެ ޑެޕިއުުޓީ ކަން ދީފަ އެވެ.
ސަސްޕެންޑު ކުރި ލިސްޓުގައި މިހާތަނަށް ހިމެނެނީ ސްޕޯޓްސް މިނިސްޓްރީގެ ޑެޕިއުޓީ މިނިސްޓަރު ހުސެއިން ޝިފާޒާއި ހެރިޓޭޖު މިނިސްޓްރީގެ ޑެޕިއުޓީ މިނިސްޓަރު މޫސާ ވަޖުދީ އެވެ.
