މާލެ ސިޓީ ކައުންސިލުން ވިލިމާލޭގައި ފެށި ބަގީގެ ހިދުމަތަށް ބޭނުންކުރާ ބަގީތައް ހަލާކުވެ، އެ ހިދުމަތް ހުއްޓިފައި އޮންނަތާ ދެ މަހަށްވުރެ ގިނަ ދުވަސް ވެއްޖެ އެވެ.
ވިލިމާލޭގައި ބަގީގެ ހިދުމަތް ދިނުމަށް ގެނެސްފައިވާ 10 ބަގީ ހަލާކުވުމާ ގުޅިގެން، މާލެ ސިޓީ ކައުންސިލުން ވަނީ އާ ބަގީތަކެއް ގަންނަން ނިންމައިފަ އެވެ.
އެގޮތުން ބަގީގެ ހިދުމަތް ހުއްޓިފައި އޮންނަތާ ދެމަހަށްވުރެ ގިނަ ދުވަސްވެފައިވީ ނަމަވެސް، ވަރަށް އަވަހަށް އައު ބަގީ ގެނެސް ހިދުމަތް ފަށާނެ ކަމަށް ސިޓީ ކައުންސިލުން ބުންޏެވެ.
"އަޅުގަނޑުމެން މިހާރު ވާނީ އާ ބަގީތައް ގެންނަން އިއުލާނުކޮށްފަ،" ސިޓީ ކައުންސިލުގެ މީޑިއާ އޮފިޝަލު ޝަތުފާ މިއަދު "އަދަދު" އަށް ވިދާޅުވި އެވެ.
ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ މޭޔަރުކަމުގައި ސިޓީ ކައުންސިލުން ވިލިމާލޭގައި ބަގީގެ ހިދުމަތް ދޭން އިލެކްޓްރިކް 10 ބަގީ ގެންނަން ޖުމްލަ 2.7 މިލިއަން ރުފިޔާ ވަނީ ހަރަދުކޮށްފަ އެވެ. އަދި ބަގީތައް ގެނައީ ކޮން ގައުމެއްގެ ކުންފުންޏެއްކަން ނޭގޭ ކަމަށް އެ ކައުންސިލުން ބުނެ އެވެ. އަދި ބަގީގެ ހިދުމަތް ދިނުމަށް ކައުންސިލުން މަހަކު 390،000ރ. ހަރަދުކުރެ އެވެ.
ސިޓީ ކައުންސިލުން 15 ޑުރައިވަރުންނާއި 10 ކޮންޑަކްޓަރުން ހަމަޖައްސައިގެން ބަގީގެ ހިދުމަތް ކުރިއަށް ގެންދިއުމަށް ހަވާލުކޮށްފައިވަނީ 'ޕިންކް ސްކައި މޯލްޑިވްސް ޕްރައިވެޓް ލިމިޓެޑް' ކިޔާ ކުންފުންޏަކާ އެވެ.
ސިޓީ ކައުންސިލުން ވިލިމާލޭގައި ބަގީގެ ހިދުމަތް ފެށީ މާޗު 16، 2023 ގަ އެވެ.
