އަންނަ ހަފްތާގައި ހުވާ ކުރާ އާ ރައްޔިތުންގެ މަޖިލީހުގައި, އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ތަމްސީލުކުރާ ޕާލިމެންޓްރީ ގްރޫޕުގެ ލީޑާޝިޕް މަގާމުތަކަށް ކުރިމަތިލާން ހުޅުވާލައިފި އެވެ.
އެމްޑީޕީ ޕީޖީގެ މަގާމުތަކަށް ކުރިމަތިލާން ހުޅުވާލިއިރު, ޕީޖީގެ އިންތިހާބު ބާއްވަން އެ ޕާޓީން ނިންމާފައި ވަނީ އާ މަޖިލިސް ހުވާ ކުރާ ދުވަހު އެވެ. އެއީ އަންނަ އަންގާރަ ދުވަހު އެވެ.
އެމްޑީޕީން ކުރިމަތިލާން ހުޅުވާލި ޕީޖީގެ މަގާމުތަކަކީ, ޕީޖީގެ ލީޑަރާއި, ދެ ނައިބު ލީޑަރުން, ސެކްރެޓަރީ ޖެނެރަލް އާއި ސެކްރެޓަރީ ޖެނެރަލްގެ ނާއިބު އަދި ޗީފް ވިޕްގެ އިތުރުން ދެ ވިޕް އެވެ.
މި މަގާމުތަކަށް ކުރިމަތިލާން ބޭނުންވާ މެންބަރުން އަންނަ ހޯމަ ދުވަހުގެ 2:00ގެ ކުރިން މެއިލް މެދުވެރިކޮށް އެ ޕާޓީއަށް އެކަން އެންގުމަށް އެމްޑީޕީން އެދިފައިވެ އެވެ.
އިދިކޮޅު އެމްޑީޕީއަށް މި ފަހަރު ކާމިޔާބުވީ 12 ގޮނޑި އެވެ. ވިހިވަނަ ރައްޔިތުންގެ މަޖިލީހުގައި 93 މެންބަރުން ތިއްބަވާއިރު, ސަރުކާރުން ނެގި ސުޕަ މެޖޯރިޓީގައި ޕީއެންސީގެ 74 މެންބަރުން ހިމެނެ އެވެ.
