މިއަދު ވެސް މޫސުން ގޯސްވާނެ ކަމަށް ލަފާކޮށް ރާއްޖޭގެ ބޮޑު ބަޔަކަށް ރީނދޫ އެލާޓް ނެރެފި އެވެ.
މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ރީނދޫ އެލާޓް ނެރެފައި ވަނީ ބ. އަތޮޅުން ފެށިގެން އައްޑޫ ސިޓީއާ ހަމައަށް މެންދުރު 2:00 ޖަހަންދެންނެވެ.
މެޓް އޮފީހުން ލަފާކުރާ ގޮތުގައި އެ ސަރަހައްދަށް ގަޑިޔަކު 25 މޭލާއި 30 މޭލާ ދެމެދު ބާރުމިނެއްގައި ވައި ޖެހި، ވިލާގަނޑުގައި ގަޑިޔަކު 50 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާކޮށްފަ އެވެ.
ވޭތުވެދިޔަ 24 ގަޑިއިރު ރާއްޖޭގެ ހުރިހާ ހިސާބެއްގައި ވެސް މޫސުން ގޯސްއިރު، ބައެއް ރަށްތަކަށް ބޯކޮށް ވާރޭވެހި ފެން ބޮޑުވެފައިވެ އެވެ. އަދި ވައިގަދަވުމުގެ ސަބަބުން ބައެއް ހާދިސާތައް ވެސް ހިނގި އެވެ.
އިއްޔެ ހެނދުނު ތިލަފުށިން ފުރައިގެން މ. އަތޮޅަށް ދަތުރުކުރި ދޯންޏެއް ގެއްލިގެން ހޯދުމުގެ މަސައްކަތް ވެސް ދަނީ ކުރަމުންނެވެ.
ކުރިއަށް އޮތް ދުވަސްތަކުގައި މޫސުން ގޯސްވާނެ ކަމަށް ލަފާކޮށް، މެޓް އޮފީހުން ވަނީ ރައްކާތެރި ފިޔަވަޅުތައް އެޅުމަށް ވެސް އިލްތިމާސް ކޮށްފަ އެވެ. ފުލުހުންނާއި، އެމްއެންޑީއެފް އަދި ޑިޒާސްޓާއިން ވަނީ މޫސުމަށް ސަމާލުވެ، އަޅަން ޖެހޭ ރައްކާތެރި ފިޔަވަޅުތައް ދުރާލައި އެޅުމަށް އިލްތިމާސް ކޮށްފަ އެވެ. އަދި މިދުވަސްވަރު ރޭގަނޑު ކަނޑުދަތުރު ނުކުރުމަށް އެމްއެންޑީއެފުން ވަނީ މިއަދު އިލްތިމާސްކޮށްފަ އެވެ.
