މާލޭ ބޮޑުތަކުރުފާނު މަގަށް ވާގޮތަށް ފަތާ ޓަރެކް ކައިރީ ހުރި ސްޓެލްކޯގެ ޕަންޕް ސްޓޭޝަން ފަޅު ތެރެއަށް ޖެއްސުމުގެ މަސައްކަތް ނުފެށި ވަނީ އެންވަޔަރަމެންޓް އިމްޕެކްޓް އެސެސްމަންޓް (އީއައިއޭ) ފާސް ނުވާތީ ކަމަށް، އެ ކުންފުނިން ބުނެފަ އެވެ.
މާލެ ދެކުނު ފަރާތު ފަޅުތެރެއިން 103 އަކަ މީޓަރުގެ ތަންކޮޅެއް ހިއްކައި ޕަންޕް ސްޓޭޝަން މަގުން ނަގާ އެތަނަށް ބަދަލު ކުރުމުގެ މަސައްކަތް ސްޓެލްކޯ އިން އެމްޓީސީސީ އާ ހަވާލުކުރީ މި އަހަރުގެ ޖެނުއަރީ 17 ވަނަ ދުވަހު އެވެ. ނަމަވެސް މި ޕްރޮޖެކްޓަށް ސަރުކާރުން ފުރަތަމަ ހުއްދަ ދީފައިވަނީ މިދިޔަ އަހަރުގެ ޖެނުއަރީ 22 ވަނަ ދުވަހު އެވެ.
ސްޓެލްކޯ އިން ބުނެފައިވާ ގޮތުގައި އެމްޓީސީސީ އާ މި ޕްރޮޖެކްޓް ހަވަލުކޮށްފައިވަނީ 7.1 މިލިއަން ރުފިޔާ އަށް، އީއައިއޭ ފާސްވާތާ 60 ދުވަސްތެރޭގަ މަސައްކަތް ނިންމާ ގޮތަށެވެ.
ސްޓެލްކޯ އިން ބުނީ މިހާރު ކުރިއަށްދަނީ އީއައިއޭ އަށް ބޭނުންވާ އިތުރު މައުލޫމަތު ތަކެއް ފުރިހަމަ ކުރުމުގެ މަސައްކަތެވެ. ސްޓެލްކޯ އިން ވަނީ މި ޕްރޮޖެކްޓަށް ބޭނުންވާ އިއައިއޭ ފެބްރުއަރީ މަހު އެންވަރަމަންޓް ޕްރޮޓެކްޝަން އެޖެންސީ (އީޕީއޭ) އަށް ހުށަހަޅައިފަ އެވެ.
ސްޓެލްކޯ އަށް ތެޔޮ ގެންދިއުމުގެ ބޭނުމުގަ ހަދާފައިވާ ޕަންޕް ސްޓޭޝަން ބޮޑުތަކުރުފާނު މަގަށް ވާގޮތަށް ހުރުމުގެ ސަބަބުން، މަގުން އެއްޗެހި ދުއްވުމަށާއި ހިނގަބިނގާވެ އުޅުމަށް ވެސް ދަތިވެ އެވެ.
