ޓްރީޓޮޕް ހޮސްޕިޓަލުން ރާއްޖޭގައި ފުރަތަމަ ފަހަރަށް ލީޑްލެސް ޕޭސްމޭކާ ލެއްވުމުގެ ދެ ޕްރޮސީޖާއެއް ކާމިޔާބުކަމާއެކީ ކުރިއަށް ގެންގޮސްފި އެވެ.
ޓްރީޓޮޕުގެ ހިތުގެ ފަރުވާއަށް ހާއްސަ ކެތު ލެބުގައި ކާޑިއޮލޮޖީ ޓީމުން ކުރިޔަށްގެންދިޔަ މި ޕްރޮސީޖާ ތަކުގައި، 79 އަހަރާއި 90 އަހަރުގެ ޕޭޝަންޓެއްގެ ހިތުގެ ހިނގުން ރެގިއުލޭޓް ކުރުމަށް ލީޑްލެސް ޕޭސްމޭކާ ލެއްވި އެވެ.
ޓްރީޓޮޕުން ބުނީ މިއީ ހިތުގެ ބަލިތަކަށް ރާއްޖޭގައި ޓްރީ ޓޮޕް ހޮސްޕިޓަލްއިން ފޯރުކޮށްދެމުންދާ ފަރުވާއަށް ލިބުނު ބޮޑު ކުރިއެރުމެއް ކަމަށެވެ.
ޓްރީ ޓޮޕުގެ ސީއީއޯ ޑރ. ސްރީވަތްސަން ސްރީދަރް ޖީ. ވިދާޅުވީ ލީޑްލެސް ޕޭސްމޭކާ ޕްރޮސީޖާ ތައާރަފް ކުރުމާއެކު، އިތުރު ސިއްހީ ފަރުވާ ހޯދުމަށް ރާއްޖެއިން ބޭރަށް ކުރިން ދާން ޖެހިފައިވާ ޕޭޝަންޓުންނަށް ކާޑިއެކް ކެއާގެ ހިދުމަތް ދަނީ ރާއްޖޭގައި ފުޅާކުރެވެމުން ކަމަށެވެ.
"މިއީ ޓްރީ ޓޮޕް ހޮސްޕިޓަލަށް އަދި މުޅި ދިވެހިރާއްޖެއަށްވެސް ފާހަގަކޮށްލެވޭފަދަ މުހިއްމު މުނާސަބަތެއް، މިކަމުގެ ސަބަބުން ޕޭޝަންޓް އައުޓްކަމްސް ރަނގަޅުވެ، ރާއްޖޭގައި ހިތުގެ ހިނގުމުގެ މައްސަލަ ހުންނަ ފަރާތްތަކަށް ފަރުވާ ހޯދުމަށް ހިނގާ ހަރަދުތައް ކުޑަވެގެންދާނެ،" ޑރ. ސްރީވަތްސަން ބުންޏެވެ.
ލީޑްލެސް ޕޭސްމޭކަރ ޓެކްނޮލޮޖީ
ލީޑްލެސް ޕޭސްމޭކާއަކީ ހިތުގެ ހިނގުން މަޑުކޮށްދިނުމަށް، ސީދާ ހިތުގެ ތެރެއަށް ލައްވާ "ސެލްފް ކޮންޓެއިންޑް" ކުޑަ ޑިވައިސްއެކެވެ. އާދައިގެ ޕޭސްމޭކާތަކާއި ހިލާފަށް، މިފަދަ ސެލްފް ކޮންޓެއިންޑް ޑިވައިސްތަކުން ކަރަންޓު ޖެނެރޭޓް ކުރުމަށް އިތުރު ބެޓެރި އަދި ނަރުތަކެއް ގުޅާފައި ނުހުންނާނެ އެވެ. އެއާއެކު ޕޭސްމޭކާ ލައްވާފައިވާ ފަރާތްތަކަށް ވަރަށް ބޮޑު ލުޔެއް ލިބިގެންދާނެ އެވެ.
ޓްރީޓޮޕްގެ ކޮންސަލްޓަންޓް ކާޑިއޮލޮޖިސްޓް ޑރ. މިގްދާދު ޝަރީފް ވިދާޅުވީ މި ޓެކްނޮލޮޖީއިން ބަލިމީހާއަށް ގިނަ ގުނަ ފައިދާތަކެއް ކުރާ ކަމަށެވެ. މިގޮތުން މިފަދަ ޕްރޮސީޖާތަކަކީ "މިނިމަލީ އިންވޭސިވް" އެއްކަމުން ކުޑަ އިންސިޝަންއަކުން ޕްރޮސީޖާ ނިންމާލެވޭ ކަމަށެވެ.
"މި ޕްރޮސީޖާއިން ރިކަވަރީ ވަގުތު ކުރުވެ، ހޮސްޕިޓަލުގައި ހޭދަކުރަންޖެހޭ ވަގުތު ކުޑަވެގެންދޭ. އަދި މާބޮޑު ލަކުނެއް ވެސް ނުހުންނާ،" ޑރ. މިގްދާދު ބުންޏެވެ.
ޑރ. މިގްދާދުއާއެކު މި ޕްރޮސީޖާ ހެދުމުގައި ޓްރީޓޮޕް ހޮސްޕިޓަލުގެ ކޮންސަލްޓަންޓް ޑރ. އަމިތް އަގަރްވާލް، ވިޒިޓިންގް ކާޑިއޮލޮޖިސްޓް ޑރ. އަރުން ގޯޕީ އަދި ޓްރީޓޮޕް ހޮސްޕިޓަލުގެ ހީވާގި ކެތުލެބް ޓީމުން ހަރަކާތްތެރިވެފައިވެ އެވެ.
ޓްރީޓޮޕުން ރާއްޖޭގައި އަލަށް ކާމިޔާބުކަމާއެކު ވަޔަލެސް އިމްޕްލާންޓް ޕްރޮސީޖާއެއް -- ފޮޓޯ: ޓްރީޓޮޕް
ފަރުވާ ހޯދާ ފަރާތްތަކަށް ބޮޑު ލުޔެއް
މިނިމަލީ އިންވޭސިވް ޕްރޮސީޖާތަކަކީ އުމުރުން ދުވަސްވީ މީހުންނަށް މޭޖާ ސާޖަރީއަކަށް ދިޔުމުގެ ބަދަލުގައި ފަސޭހައިން ކޮށްލެވޭ ޕްރޮސީޖަރ ތަކެކެވެ. މި ޕްރޮސީޖާގެ ކޮސްމެޓިކް އިމްޕެކްޓް ކުޑަވުމާއި ދެތިން ދުވަހެއްގެ ތެރޭގައި އާންމު ދިރިއުޅުމަށް ރުޖޫއަވެވޭތީ، މިފަދަ ޕްރޮސީޖާ ކުރާ މިންވަރު ވަނީ ދުނިޔޭގެ ނިސްބަތުން ވެސް އިތުރުވެފަ އެވެ.
ޓްރީ ޓޮޕްގެ މެޑިކަލް ޑައިރެކްޓަރު ޑރ. މްލާޑެން ނޯޓެކް ވިދާޅުވީ މި ކާމިޔާބީ ހާސިލްކުރެވުނީތީ ކާޑިއޮލޮޖީ ޑިޕާޓްމަންޓާމެދު ވަރަށް ފަހުރުވެރިވާ ކަމަށެވެ.
"އެބޭފުޅުންގެ ތަޖުރިބާއާއި، ޓްރީޓޮޕްގެ އެންމެ ޒަމާނީ ވަސީލަތްތަކާއިއެކު، ކާޑިއެކް ކެއަރގެ އެންމެ ފަހުގެ ކުރިއެރުންތައް، އަޅުގަނޑުމެންގެ ޕޭޝަންޓުންނަށް، ރާއްޖޭގައި އަޅުގަނޑުމެން މިގެންދަނީ ފޯރުކޮށްދެމުން،" ޑރ. މްލާޑެން ބުންޏެވެ.
ޓްރީޓޮޕްއިން އަންނަނީ 2018 އިން ފެށިގެން ރާއްޖޭގެ ސިއްހީ ދާއިރާގެ ކުރީ ސަފުގައި މަސައްކަތްކޮށް، ޒަމާނީ އަދި އީޖާދީ ހިދުމަތްތައް ތައާރަފް ކުރަމުންނެވެ.
މިގޮތުން އެ ހޮސްޕިޓަލުގެ އަމާޒަކީ ދިވެހި ރައްޔިތުން ރާއްޖެއިން ބޭރުން ފަރުވާ ހޯދަން ޖެހޭ މިންވަރު ކުޑަކޮށް، ސިއްހީ ފަރުވާއަށް ހަރަދުތައް ކުޑަކުރުން ކަމަށް އެ ހޮސްޕިޓަލުން ބުނެ އެވެ.
