ނަވާރަ ވަނަ ރައްޔިތުންގެ މަޖިލީހުގެ ދައުރު އަންނަ ބުދަ ދުވަހު ނިމޭތީ، މިއަދު ބޭއްވި އެންމެ ފަހު ޖަލްސާގެ ބޮޑު ބައެއް، މެމްބަރުން ޝުކުރުއަދާކުރެއްވުމަށާއި އުދާސްތައް ބޭރުކުރެއްވުމަށް ހާއްސަކޮށްފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި މެމްބަރުންގެ "ވަދާއީ" ވާހަކަތައް ހިމެނީ މަޖިލީހުގެ ރައީސްގެ މޭޒުން ހުށަހަޅާ ކަމެއްގެ ގޮތުގަ އެވެ. އެޖެންޑާގެ އެ އައިޓަމްގެ ފުރަތަަމަ ފުރުސަތުގައި ވާހަކަ ދެއްކެވީ ހެންވޭރު ދެކުނު ދާއިރާގެ އެމްޑީޕީ މެމްބަރު ހުސައިން ޝަހީމް (އަނދުން ހުސައިން) އެވެ.
އެ ފުރުސަތުގައި އޭނާ ފުރަތަަަމަ ވެސް ޝުކުރު އަދާކުރެއްވީ 19 ވަނަ މަޖިލީހަށް އިންތިހާބުކޮށްދިނީތީ ދާއިރާގެ ރައްޔިތުންނަށެވެ. މަޖިލީހުގެ މެމްބަރެއްގެ ގޮތުގައި ހާސިލުކުރެވުނު އެންމެ ބޮޑު ކަމެއްގެ ގޮތުގައި އޭނާ ދެއްކެވީ މާލޭގެ ރައްޔިތުންނަށް ގޯތި ދޭން ކުރީގެ ސަރުކާރުން ހިންގި މަޝްރޫއު އެވެ.
ހުސައިން ވިދާޅުވި ގޮތުގައި އޭނާ ރައްޔިތުންގެ މަޖިލީހަށް ވަޑައިގެންނެވީ ސަރުކާރު ޖަވާބުދާރީ ކުރުވުމާ އެކު އޭރު އޮތް އެމްޑީޕީގެ ސަރުކާރުގެ މެނިފެސްޓޯ ތަންފީޒުކުރުމަށެވެ.
"ދިވެހިރާއްޖޭގެ ލޮބުވެތި ރައްޔިތުންނަށް މިހާރު ސާފުވާނެ އަަޅު އަޅުގަނޑުމެންގެ މެނިފެސްޓޯގައި [ހުރި] 99 ޕަސެންޓް ކަންކަން ހުރީ ނިމިގޮސްފައި ކަން،" އޭނާ ވިދާޅުވި އެެވެ.
ވަދާއީ މެސެޖްގައި އައްޑޫމީދޫ ދާއިރާގެ އެމްޑީޕީ މެމްބަރު ރޮޒައިނާ ވިދާޅުވީ މަޖިލީހުގައި 15 އަހަރު ދުވަސް ހޭދަކުރައްވާފައި ވަޑައިގަންނަވާ އިރު އޭނާގެ "ގޮނޑި ނީލަމުގައި ހުރި" އެންމެ ދުވަހެއް ވެސް ނޯންނާނެ ކަމަށެވެ. މަޖިލީހުގައި އަދި ޕާޓީގެ އެތެރޭގައި ދެއްވި ވޯޓެއް ވެސް ވިއްކާފައި ނުވާނެ ކަމަށް ވެސް އޭނާ ވިދާޅުވި އެވެ.
މާފަންނު އުތުރު ދާއިރާގެ ދަ ޑިމޮކްރެޓްސް މެމްބަރު އިމްތިޔާޒް ފަހުމީ ވިދާޅުވީ ދައުލަތުގެ ތިން ބާރުގެ ތެރެއިން ދެބާރު އަނެއްކާ ވެސް މިވަނީ އެއްވާ ގޮތް ވެފައި ކަމަށެވެ. އެއީ އޭނާ ވިދާޅުވި ގޮތުގައި ސަރުކާރަށް މަޖިލީހުގެ ސުޕަ މެޖޯރިޓީ ލިބިފައި ވާތީ އެވެ.
"އެހެން ނަމަވެސް އެގޮތަށް މަޖިލީހަށް ވަޑައިގަންނަވާ މެމްބަރުން އަމަލުނުކުރުމުގެ ފުރުސަތުވެސް އޮތްކަން އަޅުގަނޑު ގަބޫލުކުރަން. ސަރުކާރަށް ނިސްބަތްވެވަޑައިގަންނަވާ ސުޕަމެޖޯރިޓީއެއް ލިބުނެއް ކަމަކު، ރައްޔިތުންގެ މަޖިލީހަކީ މިނިވަންކަން ލިބިގެންވާ ތަނެއްގެ ގޮތުގައި އަަޅުގަނޑު މިވަގުތު ވެސް ހަނދާންކޮށްލައިދޭން ބޭނުންވޭ،" އިމްތިޔާޒް ވިދާޅުވި އެެވެ.
ރައްޔިތުންގެ މަޖިލީހަކުން މަސައްކަތްކުރަން ޖެހޭ ގޮތަށް މަސައްކަތްކުރާނެ މެމްބަރުން ތިބެއްޖެ ނަމަ ދެބާރު އެކުނުވާނެ ކަމަށް ވެސް އިމްތިޔާޒު ވިދާޅުވި އެވެ. މަޖިލީހަކީ ސަރުކާރުން އެދޭހާ ކަމަަކަށް ރަބަސްޓޭމްޕް ޖަހާ ތަނަކަށް ނުހެދުމަށް 20 ވަނަ ރައްޔިތުންގެ މަޖިލީހަށް ވަޑައިގަންނަވާ މެމްބަރުންނަށް އޭނާ އިލްތިމާސް ކުރެއްވި އެެވެ.
މަޖިލީހުގެ ފަހު ޖަލްސާއަށް ވާތީ މެމްބަރުންނަށް ދިން ފުރުސަތުގައި ވާހަކަ ދެއްކެވީ މަދު މެމްބަރުންކޮޅެކެވެ. ރޮޒައިނާ އާއި ހުސައިން ޝަހީމް އަދި އިމްތިޔާޒްގެ އިތުރުން ހޯރަފުށި ދާްއިރާގެ މެމްބަރު އަހުމަދު ސަލީމް، އަލިފުށި ދާއިރާގެ މެމްބަރު މުހައްމަދު ރަޝީދު ހުސައިން، އުނގޫފާރު ދާއިރާގެ މެމްބަރު މުހައްމަދު ވަހީދު އަދި މެދު ހެންވޭރު ދާއިރާގެ މެމްބަރު އަލީ އާޒިމް އޭގެ ތެރޭގައި ހިމެނެ އެެވެ.
މަޖިލީހުގެ މިއަދުގެ ޖަލްސާ ފެށި އިރު ވަޑައިގެން ތިއްބެވީ އެންމެ 24 މެމްބަރުންނެވެ. ނަވާރަ ވަނަ މަޖިލީހުގައި 87 ދާއިރާ އޮތް އިރު މިހާރު ތިއްބެވީ 80 މެމްބަރުންނެވެ. އެއީ ހަތް މެމްބަރަކު ސަރުކާރަށް ވަޑައިގެންނެވުމުންނެވެ.
