މި މަހު 28 ގައި ހުވާ ކުރާ 20 ވަނަ ރައްޔިތުންގެ މަޖިލީހުގައި އިދިކޮޅު އެމްޑީޕީ ތަމްސީލު ކުރާ މެންބަރުންނާ ކުރީގެ ރައީސް އިބްރާހިމް މުހައްމަދު ސޯލިހު ބައްދަލުކުރައްވައިފި އެވެ.
އެމްޑީޕީގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނެފައިވަނީ، މިވަގުތު އެ ޕާޓީގެ އެޑްވައިޒަރެއްގެ ގޮތުގައި ހުންނެވި ސޯލިހު ބައްދަލުކުރައްވާފައިވަނީ އަލަށް އިންތިހާބުވި މެންބަރުންގެ ތެރެއިން މިވަގުތު މާލޭގައި ތިއްބެވި ބޭފުޅުންނާ ކަމަށެވެ.
މިދިޔަ މަހު 21 ގައި ބޭއްވި މަޖިލިސް އިންތިހާބުގައި އެމްޑީޕީއަށް ވަނީ ބޮޑު ނާކާމިޔާބީއެއް ކުރިމަތިވެފަ އެވެ. އެގޮތުން 20 ވަނަ މަޖިލީހުގައި ހިމެނޭ 93 ގޮނޑީގެ ތެރެއިން އެމްޑީޕީއަށް ލިބުނީ އެންމެ 12 ގޮނޑި އެވެ.
މި މަޖިލީހުގެ ސުޕަ މެޖޯރިޓީ، 77 ގޮނޑިއާއެކު ހޯދާފައިވަނީ ސަރުކާރުންނެވެ. އޭގެ ތެރޭގައި ވެރިކަންކުރާ ޕީއެންސީގެ މެންބަރުންނާއި ސަރުކާރާއެކު މަސައްކަތްކުރާ އެމްޑީއޭ، ޖޭޕީ އަދި އެމްއެންޕީގެ މެންބަރުން ހިމެނެ އެވެ.
މިދިޔަ އަހަރު ބޭއްވި ރިޔާސީ އިންތިހާބުގެ ދެބުރާއި މަޖިލިސް އިންތިހާބުގައި ނާކާމިޔާބީއާ ގުޅިގެން އެ ޕާޓީގެ ކުރިމަގު ކަނޑައެޅުމަށް ދިރާސާއެއް ހަދައި މަގުޗާޓެއް އެކުލަވާލުމަށް އެ ޕާޓީގެ ގައުމީ މަޖިލީހުން ވަނީ މި މަހުގެ ދެވަނަ ދުވަހު ފާސްކޮށްފަ އެވެ.
"އިންތިހާބުތައް ގެއްލިގެންދިޔަ ސަބަބުތައް ދިރާސާ ކުރުމަށް އަދި ދިވެހި ރައްޔިތުން, އެމްޑީޕީގެ ކުރިމަގަށް ދެކޭ ގޮތް ހޯދައި އަޅުގަނޑުމެންގެ ޕާޓީގެ ކުރިމަގު ބިނާކުރާނެ ގޮތްތަކަކާ މެދު ދިރާސާ ކުރުމަށް ފަހު މަގުޗާޓެއް އެކުލަވާލުމަށް," އެ ޕާޓީގެ ޗެއާޕާސަން ފައްޔާޒު އިސްމާއީލް އެ ދުވަހު ވިދާޅުވި އެވެ.
ފައްޔާޒުގެ އިތުރުން މިވަގުތު ޕާޓީ ހިންގުމުގައި އެންމެ އިސްކޮށް ހަރަކާތްތެރިވަނީ އެ ޕާޓީގެ ރައީސް އަބްދުﷲ ޝާހިދެވެ. އޭގެ އިތުރުން ސޯލިހުވެސް ގެންދަވަނީ ޕާޓީގެ ކަންކަމުގައި އިސް ރޯލެއް އަދާކުރައްވަމުންނެވެ.
