އިންޑިއާ ސިފައިން ރާއްޖޭގައި އޮޕަރޭޓު ކުރަމުންދިޔަ ދެ ހެލިކޮޕްޓަރާއި ޑޯނިއާ މަތިންދާބޯޓު ބަހައްޓާފައި ހަމައެކަނި ޔުނީފޯމު އެޅި ސިފައިން ދިޔުމަކީ އެ ގައުމުގެ އަސްކަރިއްޔާ ރާއްޖޭގައި ނެތުން ނޫން ކަމަށް ކުރީގެ ބަންޑާރަ ނައިބު ޑރ. މުހައްމަދު މުނައްވަރު މިއަދު ވިދާޅުވެއްޖެ އެވެ.
ރާއްޖޭގައި ތިބި އިންޑިއާގެ 76 ސިފައިން ފޮނުވާލައި އެ އުޅަނދުތައް ދުއްވަން ހަމަ އެ އަދަދަށް އިންޑިއާއިން ވަނީ މަދަނީން ގެނެސްފަ އެވެ. މަދަނީން ގެނައުމުގެ އެގްރިމެންޓާ ގުޅޭ ގޮތުން ސަރުކާރުން އިތުރު ތަފުސީލެއް ނުދެ އެވެ.
މި މައްސަލާގައި ސުވާލު އުފައްދަވާ މުނައްވަރު ފުރަތަމަ ޕޯސްޓު ކުރެއްވީ ސޯޝަލް މީޑިއާގަ އެވެ.
އެކަމާ ގުޅިގެން އޭނާގެ ބަހެއް ހޯދުމަށް ގުޅުމުން "އަދަދު" އާ ވާހަކަ ދައްކަވަމުން މުނައްވަރު ވިދާޅުވީ، އިންޑިއާ ސިފައިން ރާއްޖޭގަ ތިބެގެން އާންމުންނާއި ސިޔާސީން ކަންބޮޑުވުން ފާޅުކުރަމުންދާތާ އެތައް ދުވަހެއް ވެފައިވާ ކަމަށާއި މިއަދު އެ މައްސަލަ ހައްލުވެފައިވާ ކަމަށް ސަރުކާރުން ބުނަނީ ރައްޔިތުންނަށް އޮޅުވާލުމަށް ކަމަށެވެ.
"އިޝޫ އަކީ ކޮބާ؟ އިޝޫ އަކީ ބޭރު ގައުމެއްގެ މިލިޓަރީ ޕްރެސެންސް ރާއްޖޭގަ އޮތުން، އެމީހުންގެ މަތިންދާ ބޯޓެއް އެބަ އޮވޭ، އެމީހުންގެ ދެ ހެލިކޮޕްޓަރު އެބަ އޮވޭ، ރާޑަރުތައް އެބަހުރި، ދެ އެ އެއްޗެހި ބަލަހައްޓަން އިންޑިއާ ސިފައިން ތިބޭނީ ކޮންމެ ގޮތެއް ވިޔަސް،" އޭނާ ވިދާޅުވި އެވެ.
"ދެން ރައްޔިތުންނަށް އޮޅޭ ގޮތަށް އެ މީހުންނެއް ނެތޭ [މި ކިޔަނީ]، އެކަމަކު އެކިއުޕްމަންޓު އެބަހުރި، ކަން އެބަ ހިނގާ."
މުނައްވަރު ވިދާޅުވީ ބޭރު ގައުމެއްގެ މިލިޓަރީ ސާމާނު ރާއްޖޭގައި ބޭނުން ކުރުމަކީ ވެސް "އަސްކަރީ ޕްރެސެންސެއް" ކަމަށެވެ.
"ކޮބާހޭ ބޭރުގައުމެއްގެ އަސްކަރީ ޕްރެސެންސަކީ، މިލިޓަރީ އެއާކްރާފްޓަކާ މިލިޓަރީ އެކިއުޕްމަންޓާ ހުރީމަ އެއީ މިލިޓަރީ ޕްރެސެންސަށް ނުވަނީހެއްޔޭ؟ ޕްރެސެންސަކީ ހަމައެކަނި ޔުނީފޯމެއް ހެއްޔޭ؟،" އޭނާ ވިދާޅުވި އެވެ.
މުނައްވަރު އިތުރަށް ވިދާޅުވީ، ދެ ހެލިކޮޕްޓަރާއި ޑޯނިއާ ބޯޓު ބަލަހައްޓަނީ އުޅަނދުތައް ހެދި ކުންފުނީގެ މަދަނީ މުވައްޒަފުން ކަމަށް ސަރުކާރުން ބުނި ނަމަވެސް އެއީ ގަބޫލު ކުރެވޭ ވާހަކައެއް ނޫން ކަމަށެވެ.
