ޗާގޯސް ޖަޒީރާއަކީ މޮރިޝަސްގެ ބަޔެއް ކަމަށް ބަލައި ރާއްޖޭގެ އީއީޒެޑުން ބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް އޮފް ދަ ސީސް (އިޓްލޮސް)އިން ނިންމިނިންމުން އިސްތިއުނާފުކުރަން ކުރުމާ ގުޅޭގޮތުން ސަރުކާރުން އެދުނު ގާނޫނީ ލަފާ އަދި ނުދެއްވާ ކަމަށް ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވިދާޅުވެއްޖެ އެވެ.
މުނައްވަރު "އަދަދު" އަށް ވިދާޅުވީ، ގާނޫނީ ލަފާ ދެއްވުން ލަސްކުރެއްވި މައިގަނޑު ސަބަބަކީ ބަންޑާރަނައިބު އަހުމަދު އުޝާމް އަށް މަޖިލީހުން ރުހުން ނުލިބުން ކަމަށެވެ. އަދި އޭނާގެ ގާނޫނީ ލަފާ ހޯދަން ސަރުކާރުން ނިންމީ ބޭރުގެ ވަކީލުންނާއެކު މަސައްކަތް ކުރިއަށް ނުގެންދެވިގެން ކަމަށްވެސް މުނައްވަރު ވިދާޅުވި އެވެ.
"ބަންޑާރަނައިބަށް ރައްޔިތުންގެ މަޖިލީހުގެ ރުހުން ނުލިބޭހާ ހިނދަކު ބަންޑާރަނައިބެއް ނެތީކަމަށް އަޅުގަނޑު ބަލަނީ، އަޅުގަނޑަކަށް އެބޭފުޅަކާ އެކީގެ މަސައްކަތެއް ނުކުރެވޭނެ ނޫންތޯ،" މުނައްވަރު ވިދާޅުވި އެވެ.
އިޓްލޮސްގެ ނިންމުން އިސްތިއުނާފުކުރަން ކުރަމުން އަންނަ މަސައްކަތުގެ ތެރެއިން މުނައްވަރުގެ ގާނޫނީ ލަފާ ހޯދަން ނިންމި ކަމަށް އޭޖީ އޮފީހުން ބުނީ ޖެނުއަރީ 25، ގަ އެވެ. މި ސަރުކާރުގެ ކެބިނެޓުގެ ތެރެއިން މަޖިލީހުން ރުހުން ނުދިން ތިން ވަޒީރުންގެ ތެރޭގައި އޭޖީ އުޝާމް ހިމެނެ އެވެ. ސަރުކާރުން އަލުން އުޝާމްގެ ނަން ފޮނުވި ނަމަވެސް މަޖިލީހުން އަދިވެސް ރުހުން ނުދެ އެވެ.
މުނައްވަރު ވިދާޅުވީ، އޭނާގެ ވިސްނުމަކީ ގާނޫނީ ލަފާ ނުދިނުން ނޫން ކަމަށާއި ނަމަވެސް އެކަން ކުރެވޭނީ އޮންނަ އުސޫލުގެ މަތިން ސަރުކާރުން އެ މަސައްކަތް ކުރެއްވުމުން ކަމަށެވެ. އޭނާ ފާހަގަކުރެއްވި ގޮތުގައި މި މަސައްކަތް ކުރަންވާނީ ރައީސް ޑރ. މުހައްމަދު މުއިއްޒު އާއި ރައްޔިތުންގެ މަޖިލީހުގެވެސް ޝާމިލުވެގެންނެވެ.
"މިހާރު އެބޭފުޅުންނަށް މެޖޯރިޓީ އެބައޮތް އެހެންވީމަ އެކަން ފުރިހަމަ ގޮތުގަ ކުރިއަށް ގެންދަވަންވީނުންތޯ،" މުނައްވަރު ވިދާޅުވި އެވެ.
މުނައްވަރުގެ އިތުރުން މި މައްސަލާގައި ސަރުކާރުން ގާނޫނީ ލަފާ ހޯދަމުން އަންނަ އަނެއް ދެ މީހުންގެ ތެރެއިން އެކަކީ އިނގިރޭސިވިލާތުގެ މަތީ ފަންތީގެ ގާނޫނީ ވަކީލަކާއި ލޯ އޮފްދަ ސީ އާ ބެހޭ މޯލްޓާގެ ކަމާބެހޭ ތަޖުރިބާކާރެކެވެ. އޭޖީ އޮފީހުން ބުނީ މި ދެ ގާނޫނީ މާހިރުންނަކީ ވެސް ކަނޑާބެހޭ މުއާހަދާއާ ގުޅުން ހުރި މި ފަދަ މައްސަލަތަކުގައި ފާހަގަކޮށްލެވޭ ތައުލީމާއި ތަޖުރިބާ ލިބިވަޑައިގެންފައިވާ ދެ ބޭފުޅުން ކަމަށެވެ.
އިޓްލޮސް މައްސަލާގައި ކުރިޔަށްދާންވީ ގޮތެއް ނިންމުމަށް މި މައްސަލަ ކެބިނެޓަށް ހުށަހަޅައި، ސަރުކާރުގެ ފުރަތަމަ 100 ދުވަސް ހަމަވުމުގެ ކުރިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވައުދުވެ ވަޑައިގެންފައިވާ ގޮތަށް، އެ މައްސަލާގައި ގޮތެއް ނިންމަވާނެ ކަމަށް ޖެނުއަރީ 25، ގައި އޭޖީ އޮފީހުން ބުނި ނަމަވެސް އަދިވެސް އެ މައްސަލާގައި ގޮތެއް ނިންމިފައެއް ނުވެ އެވެ.
