ދިވެހިން އަދިވެސް އެދެނީ ބަހަނާއަކާ ނުލައި, އިންޑިއާ އަސްކަރިއްޔާގެ އުޅަނދުތަކާއި ރާޑަރުތަކާއެކު, އެތަކެތި އޮޕަރޭޓް ކުރަން ތިބި މީހުން ރާއްޖެއިން ފޭބުމަށް ކަމަށް އުމަރު ނަސީރު ވިދާޅުވެއްޖެ އެވެ.
ރާއްޖޭގައި އިންޑިއާ ސިފައިން ގާއިމުވެ ތިބުމާ ދެކޮޅަށް އަޑުއުފުލަމުން އުމަރު ނަސީރު ނޫހެއްގައި ލިޔުއްވި ކޮލަމެއްގައި އޭނާ ވިދާޅުވި ގޮތުގައި, އިންޑިއާ ސިފައިންގެ ބަދަލުގައި މަދަނީ މީހުން ގެނައުމަކުން ރާއްޖެއިން އިންޑިއާ އަސްކަރިއްޔާ ފޮނުވާ ނުލެވޭ ކަމަށެވެ.
އޭނާ ވިދާޅުވީ ޔުނިފޯމު އެޅި ބައެއްގެ ބަދަލުގައި ޔުނިފޯމު ނާޅާ "ސިފައިން" ރާއްޖެ ގެނައުމަކީ އިންޑިއާއިން އުފެއްދި ނެރެޓިވްއެއް ކަމަށެވެ.
އިންޑިއާ އަސްކަރިއްޔާ ރާއްޖެއިން ބޭލުމަށް ހިންގި 'އިންޑިއާ އައުޓް' ހަރަކާތަށް އިޝާރާތް ކުރައްވައި އުމަރު ވިދާޅުވީ, ރައީސް ޑރ. މުހައްމަދު މުއިއްޒުގެ ރިޔާސީ ކެމްޕެއިނުގެ ވައުދަކީ ހަމައެކަނި އިންޑިއާ ސިފައިން ރާއްޖެއިން ބޭލުން ނޫން ކަމަށެވެ. އަދި ކެމްޕޭނުގެ ވައުދަކީ އިންޑިއާ ސިފައިން މުދަލާއެކީ ރާއްޖެއިން ބޭލުން ކަމަށް އޭނާ ވިދާޅުވި އެވެ.
"މި ސަރުކާރުގެ ކެމްޕޭން ގެ ވަޢުދަކީ ސިފައިން ބޭލުމެއް ނޫނެވެ. ސިފައިން މުދަލާއެކު ބޭލުމެވެ. އިންޑިޔާގެ މިލިޓަރީ ބޭލުމެވެ. 'އިންޑިޔާ އައުޓް' އަކީ އިންޑިޔާއާއި ގުޅުން ކަނޑާލުމަށް ގޮވާލި ޙަރަކާތެއް ނޫނެވެ. އެއީ 'އިންޑިޔާ މިލިޓަރީ އައުޓް' ކުރުމަށް ގޮވި ގޮވުމެއް،" އުމަރުގެ ކޮލަމްގައި ލިޔެފައިވެ އެވެ.
އިންޑިއާ އަސްކަރިއްޔާއިން ރާއްޖޭގައި ގާއިމުވުމާއި, 14 އަހަރު ރާއްޖޭގައު ދެމިތިބުމަށް ރާއްޖޭގެ ސަރުކާރުތަކަށް ވިސްނައިދެމުން އައި ގޮތް ވެސް އުމަރުގެ ކޮލަމްގައި ފާހަގަކުރެއްވި އެވެ. އޭނާ ވިދާޅުވި ގޮތުގައި 2010 ވަނަ އަހަރު އިންޑިއާ ސިފައިން ރާއްޖޭގައި ގާއިމުވީ އޭރު އޮތް ސަރުކާރަށް, ހެލިކޮޕްޓަރު ހަދިޔާ ކުރުމުގެ ނަމުގައި ކަމަށެވެ.
"ފުރަތަމަ، 2008 ގެ ސަރުކާރަށް އިންޑިޔާއިން ވިސްނައި ދިނީ މި އުޅަނދު ތަކަކީ 'ހަދިޔާއެއް' ކަމަށް. 2013 ގެ ސަރުކާރަށް ވިސްނައި ދިނީ މިއުޅަނދު ތަކަކީ 'އެމްބިޔުލަންސް' ތަކެއް ކަމަށް. 2018 ގައި އައި ސަރުކާރަށް ވިސްނައިދިނީ 'ހަނގުރާމައިގެ ބޭނުމަކަށް' ސިފައިން ނުތިބޭނެ ކަމަށް. 2023 ގެ ސަރުކާރަށް މިހާރު ވިސްނައި ދެނީ 'ޔުނިފޯމް' އެޅި މީހުން ނުތިބޭނެ ކަމަށާއި މިއީ 'ޕްލެޓްފޯމް' ތަކެއް ކަމަށް،" އޭނާ ލިޔުނެވެ.
އިންޑިއާ ސިފައިންގެ ބަދަލުގައި އައި މަދަނީ މީހުންނަކީ ވެސް އުމަރު ތުހުމަތު ކުރެއްވި ގޮތުގައި ކުލަހެދުމުގައި ތިބި އިންޑިޔާގެ ސިފައިންނެވެ. އޭނާ ވިދާޅުވީ އެއީ އިންޑިޔާގެ އަސްކަރިއްޔާގެ ހުވައި ކޮށްގެން، ތަމްރީން ހަދައިގެން ތިބި އިންޑިޔާ އަސްކަރިއްޔާގެ މުސާރަވެރިން ކަމާމެދު އެއްވެސް ޝައްކެތް ނެތް ކަމަށެވެ.
