މ. ރަތްމަންދޫ ބޭރުން ތިން މީހުންނާއެކު ގެއްލުނު ކަމަށް ބުނާ ކުޑަ ޑައިވް ދޯނި ހޯދަން ޑްރޯން ދުއްވަން ފެށިތާ 14 ގަޑިއިރު ފަހުން ކައިރި ހިސާބަކުން މިއަދު އެ ދޯނި ފެނިއްޖެ އެވެ.
ފުލުހުން ބުނީ "ފަރިހި 2" ދޯނި ގެއްލުނު ކަމަށް ރިޕޯޓު ކުރީ ރޭ 10:00 ޖަހާކަންހާއިރު ކަމަށެވެ. އެމްއެންޑީއެފް އިން ބުނީ ކޯސްޓް ގާޑުން އެ ދޯނި ހޯދަން މަސައްކަތް ފެށީ 11:20 ގައި ކަމަށެވެ. އަދި ދޯނި ހޯދަން ޑްރޯން ބޭނުން ކުރަން ފެށި ކަމަށް އޭގެ ފަހުން ދަންވަރު 2:00 ގައި ސިފައިން ބުންޏެވެ.
އެ ދޯނި ހޯދުމަށް 440 އަކަ ނޯޓިކަލް މޭލު ބެލި ކަމަށް ސިފައިން މިއަދު ބުންޏެވެ. އޭގެ ފަހުން ދެންމެ ސިފައިން ބުނީ ރަތްމަންދޫގެ 23 ނޯޓިކަލް ބޭރުން ދޯނި ހޯދިފައިވާ ކަމަށެވެ.
"ގެއްލުނު ދޯނި ހޯދުމަށް އެމްއެންޑީއެފް އެއަރ ކޯގެ އަސްކަރީ ޔޫއޭވީ އާއި އެމްއެންޑީއެފް ކޯސްޓްގާޑުގެ އުޅަނދުފަހަރު ބޭނުންކޮށްގެން ކަނޑާއި ވައިގެ މަގުން އެމްއެންޑީއެފުން ކުރަމުންދިޔަ މަސަައްކަތުން މިދޯނި ހޯދާފައި،" ސިފައިން ބުންޏެވެ. "މިދޯނި ފެނިފައިވަނީ މ. ރަތްމަންދޫގެ 23 ނޯޓިކަލް މޭލު ބޭރުން އިންޖީން ހުއްޓިފަައިވަނިކޮށް."
އެ ދޯނި ގެއްލުނީ ފަރުމަސް ބާނަން ނުކުތް ގޮތަށް ކަމަށް ސިފައިން ބުނެފައިވެ އެވެ. މާސް ބާނަން ފުރީ މ. މަޑުއްވަރީ ކައިރިންނެވެ.
