ދައުލަތުގެ ވެރިންނާއި އިންތިހާބުތަކުގައި ވާދަކުރާ ކެންޑިޑޭޓުންނާ ގުޅޭގޮތުން ހުށަހަޅާފައިވާ މައްސަލަތަކާ ގުޅޭ މައުލޫމާތު ނުދީ ހިފެހެއްޓުމަކީ ރައްޔިތުންނަށް ގާނޫނު އަސާސީން ކަށަވަރު ކޮށްދީފައިވާ ވެރިން އިންތިހާބު ކުރުމުގެ ހައްގަށް ހުރަސް އެޅުމުގެ ގޮތުގައި އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ސިފަކޮށްފި އެވެ.
އެންޓި ކޮރަޕްޝަން ކޮމިޝަން (އެސީސީ) އިން ބަލަމުންދާ ރައީސް މުއިއްޒުގެ މަސްލަހަތު ހިމެނޭ މައްސަލަތަކުގެ އަދަދާއި ތަފުސީލު ހޯދުމަށް މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެދުމުން ވެސް އެ މައުލޫމާތުތައް ހިއްސާކުރުން ވަނީ ލަސްކޮށްފަ އެވެ. އެހެން މުއައްސަސާތަކުން ވެސް އަންނަނީ މިފަދަ މައްސަލަތަކުގެ މައުލޫމާތު ނުދީ ހިފަހައްޓަމުންނެވެ.
މި މައްސަލައިގައި ކަންބޮޑުވުން ފާޅުކުރައްވަމުން އެމްޑީޕީގެ "މިސްރާބު ހަމަމަގަށް" ކެމްޕޭންގެ ސްޕޯކްސްޕާސަން އަހްމަދު އީސާ ވަނީ އިންތިހާބަށް ވަގުތު ކުޑަތަންވެފައި ވަނިކޮށް އެފަދަ މައުލޫމާތުތައް ހިފަހައްޓާތީ ކަންބޮޑުވުން ފާޅުކޮށްފަ އެވެ.
"އެ މައުލޫމާތުތައް އާންމު ރައްޔިތުންނަށް ނުދީ ހިފެހެއްޓުމަކީ ރައްޔިތުންނަށް ގާނޫނޫ އަސާސީން ކަށަވަރު ކޮށްދީފައި އޮތް އިންތިހާބީ ވެރިން ކަނޑައެޅުމުގު, އިހުލާސްތެރި ވެރިން ރައްޔިތުންގެ މައްޗަށް އިސްކުރަން ރައްޔިތުންނަށް ދީފައި އޮތް ބާރަށް އެންމެ ފުރިހަމަ ގޮތުގައި ބޭނުން ކުރުމަށް ހުރަސް އެޅުމުގައި މަގްސަދުގައި ކުރާ ކަމެއް," އީސަ ވިދާޅުވި އެވެ.
ރައްޔިތުންގެ މަޖިލީހުގެ ޖަލްސާތައް ފެށުނުހާ އަވަހަކަށް މިނިވަން މުއައްސަސާތައް ކޮމިޓީއަށް ހާޒިރުކޮށްގެން މައްސަލަތައް ބައްލަވާނެ ކަމަށް އީސަ ވިދާޅުވި އެވެ.
"މައުލޫމާތުތައް ނުދީ ހިފެހެއްޓީމައި ރަނގަޅު ގޮތް ނިންމަން ރައްޔިތުންނަށް ބޭނުންވާ މައުލޫމާތު އެ ހިފެހެއްޓުނީ... އެ މައުލޫމާތުތައް ލިބުނީމައި ރައްޔިތުން ބޭނުންވާ އިހުލާސްތެރި ވެރިން އިންތިހާބު ކުރަން ފުރުސަތު ލިބޭ" އީސަ ވިދާޅުވި އެވެ.
ރައީސް މުއިއްޒުގެ 20 އަށްވުރެ ގިނަ މައްސަލަ އޭސީސީއިން ބަލަމުންދާ ކަމަށް "އަދަދު" އަށް ވަނީ މައުލޫމާތު ލިބިފަ އެވެ. އެގޮތުން 2022 ގައި އޭސީސީއިން މައުލޫމާތު ދިން ގޮތުގައި އޭރު މާލެ ސިޓީ ކައުންސިލުގެ މޭޔަރުގެ ގޮތުގައި ހުންނެވި ރައީސް މުއިއްޒުގެ ހަ މައްސަލައެއް ދިޔައީ ބަލަމުންނެވެ.
