ވެރިކަން ކުރާ ޕީއެންސީގެ ޕޯޑިއަމެއްގައި ވަޒީފާގެ ބިރު ދެއްކި މައްސަލައިން އެޕާޓީ ރެކި، އެއީ އެވާހަކަ ދެއްކި މީހާގެ އަމިއްލަ ކަމެއް ކަމަށް ސިފަކޮށް ބަޔާނެއް ނެރެފި އެވެ.
ރައްޔިތުންގެ މަޖިލީހުގެ ހިންނަވަރު ދާއިރާއަށް ވާދަކުރާ މުހައްމަދު އަބްދުއްރަހްމާންގެ ކެމްޕެއިން ޖަލްސާގައި ޕީއެންސީ ޕޯޑިއަމްގައި ފެލިވަރު މަސްފެކްޓްރީގައި މަސައްކަތް ކުރާ އިދިކޮޅު ފަރާތްތަކުން ސަރުކާރު ކެންޑިޑޭޓަށް ވޯޓު ދިނުމަށް މަޖުބޫރު ކުރުވަން ވަނީ ގޮވާލާފަ އެވެ.
އެކަން ބޮޑު މައްސަލައަކަށް ވެ، އެ މައްސަލަ ބަލާނެ ކަމަށް އިލެކްޝަންސް ކޮމިޝަނުންވެސް ވަނީ ބުނެފަ އެވެ. އެ މައްސަލަ ބަލަން ގޮވައިލާ އިދިކޮޅު އެމްޑީޕީން މިއަދު ބަޔާނެއް ވެސް ނެރުނެވެ. އެ ބަޔާނަށް ރެއްދުދޭން ޕީއެންސީން ނެރުނު ބަޔާނެއްގައި ބުނީ އެމްޑީޕީގެ ބަޔާނަކީ ހަގީގަތާ މުޅިން ހިލާފު ބަޔާނެއް ކަމަށެވެ.
ވަކި ފަރުދަކު ފާޅުކުރާ ހިޔާލަކީ އެ ޕާޓީން ގެންގުޅޭ ސިޔާސަތެއް ނޫން ކަމަށާއި، ރައީސް ޑރ. މުހައްމަދު މުއިއްޒުގެ ސިޔާސަތަކީ ޑިމޮކްރަސީގެ ރީތި އުސޫލުތަކުގެ ތެރެއިން ހަމަހަމަކަމާއެކު ސިޔާސީ ހަރަކާތްތައް ކުރިއަށް ގެންދިއުމާއި، ހަރަކާތްތަކުގައި ބައިވެރިވުމުގެ ފުރުސަތު ދީގެން ކުރިއަށް ދިއުން ކަމަށް ވެސް ބުންޏެވެ.
"ވަކި ފަރުދަކު ފާޅުކުރާ ޚިޔާލަކީ މި ޕާޓީން ގެންގުޅޭ ސިޔާސަތެއް ނޫން. ރައީސުލް ޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތަކީ ޑިމޮކްރަސީގެ ރީތި އުސޫލުގެ ތެރެއިން ހަމަހަމަކަމާ އެކު ސިޔާސީ ހަރަކާތްތައް ކުރިއަށް ގެންދިއުމާއި ހަރަކާތްތަކުގައި ބައިވެރިވެގެން ކުރިއަށް ދިއުމުގެ ފުރުސަތު ދިނުން،" ޕީއެންސީގެ ބަޔާނުގައި ބުންޏެވެ.
"އަޅުގަނޑުމެން ރައްޔިތުންގެ ތާއީދާއި ލޯބި ހޯދާނީ ރައްޔިތުން އެދޭ ތަރައްގީ ގެނެސްދީގެން އަދި ރައްޔިތުންގެ އަޑުއަހައިގެން ކަމުގައި ދަންނަވަން"
ވަޒީފާގެ ބިރު ނުދައްކާ ކަމުގެ ހެއްކެއްގެ ގޮތުގައި ޕީއެންސީން ބުނީ އެމްޑީޕީގެ އިސްވެރިން ރަށްރަށަށް ކުރާ ދަތުރުތަކުގައި މިހާރު ވެސް ވަޒީފާތަކުގައި ތިބި ފަރާތްތަކުން ބައިވެރިވުމެވެ. މިދިޔަ ސަރުކާރުން ސިޔާސީ ފިކުރަށް ބަލާ ވަޒީފާތަކުން މީހުން ވަކިކޮށް ބިރު ދައްކާ، ސިޔާސީ ކަންކަމުގައި ބައިވެރިވާ ފަރާތްތައް ހައްޔަރު ކުރަމުންދިޔަ ކަމަށް ވެސް އެއާ އެކު ތުހުމަތުކުރި އެވެ. ގޮތަށް އެކަންކަން ކުރުމަކީ ޕީޕީއެމް/ޕީއެންސީގެ ސިޔާސަތެއް އަދި ފިކުރެއް ނޫން ކަމަށް ވެސް އެ ބަޔާނުގައި ބުންޏެވެ.
