ހިޔާލު ތަފާތުވުންތައް ހުރި ފަރާތްތައް މުޅިން ނެތިކޮށްލުމަށް މަސައްކަތް ކޮށް މިއަދުގެ ސަރުކާރުން ދަނީ ޑިމޮކްރެސީގެ ބިންގާ ގުޑުވާލަމުން ކަމަށާއި ސަރުކާރަށް މަޖިލީހުގެ މެޖޯރިޓީ ލިބިއްޖެނަމަ އަނިޔާވެރިކަން އިޔާދަވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ފުވައްމުލަކުގައި ހުންނަވައި "އަދަދު" އަށް ދެއްވި އިންޓަވިއުއެއްގައި ސޯލިހު ވިދާޅުވީ މިއަދު ފެނިގެންދަނީ ހިޔާލުފާޅު ކުރުމުގެ މިނިވަންކަމާއި ސިޔާސީ ހަރަކާތްތައް ހިންގުމަށް ސަރުކާރުން ހުރަސް އަޅަމުން ދާތަން ކަމަށެވެ.
"ފަށައިގަތީ އެނގިވަޑައިގަންނަވާނެ ނޫސްވެރިކަމަށް ހުރަސްއަޅަމުން، ރައްޔިތުންގެ މަޖިލީހުގެ ބާރު ކަނޑުވައިލަމުން މިދަނީ، މިހާރު މިދަނީ ސިޔާސީ ޕާޓީތަކުގެ ވިސްނުމާއި ފިކުރު، ހިޔާލުތަފާތުވުން ހުރި ފަރާތްތައް މުޅިން ނެތިކޮށްލަން މަސައްކަތް ކުރަމުން އެދަނީ، އެއީ ޑިމޮކްރެސީގެ ބިންގާ އެ ގުޑުވާލަނީ،" ސޯލިހު ވިދާޅުވި އެވެ.
އެހެން އެކަން އޮއްވައި މަޖިލީހުގެ މެޖޯރިޓީ ސަރުކާރަށް ދީފިނަމަ، އަނިޔާވެރިވުމަށްޓަކައި ގާނޫނުތަކަށް ވެސް ބަދަލު ގެނެސްގެންވިޔަސް އަނިޔާވެރިކަން އިޔާދަ ކުރާނެ ކަމަށް ސޯލިހު ވިދާޅުވި އެވެ.
"އެހެންވީމާ ރައްޔިތުންގެ މަޖިލީހުގެ ވޯޓުގައި ތިޔަ ބޭފުޅުން މިކަމާ ދޭތެރޭގައި ވިސްނާވަޑައިގެން އެމްޑީޕީއަށް މިފަހަރުގެ މަޖިލީހުގެ މެޖޯރިޓީ ލިބުކަމީ ދިމޮކްރެސީ ދެމެހެއްޓުމަށްޓަކައި ކޮންމެހެން ކުރަންޖެހޭނެ ކަމެއް،" ސޯލިހު ވިދާޅުވި އެވެ.
މިދިޔަ ފަސްއަހަރުގެ ސިޔާސަތަށް ކޮންމެވެސް ވަރަކަށް އަލިއަޅުއްވާލައްވައި ސޯލިހު ވިދާޅުވީ އެމަނިކުފާނުގެ ވެރިކަމުގައި ސިޔާސީ ހަރަކާތްތައް ހިންގުމަށް ފަހި ފުރުސަތުތަކެއް ފަހިކޮށްދީފައި އޮންނާނެ ކަމަށެވެ.
އެގޮތުން މިދިޔަ ސަރުކާރުން މަސައްކަތް ކުރީ ސިޔާސީ ހަރަކާތްތައް ހިންގުމަށް ހުރަސް އަޅާފައި ނޯންނާނެކަން ފާހަގަކުރައްވައި ސޯލިހު ވިދާޅުވީ އެމަނިކުފާނުގެ ސަރުކާރުން މަސައްކަތް ކުރެއްވީ ސިޔާސީ ހަރަކާތްތައް ހިންގުމަށް ބޭނުންވާ ޖާގަ ތަނަވަސްކޮށްދީ ސިޔާސީ ހަރަކާތްތައް ހިންގާއިރު، އެ ސަރަހައްދުތަކުގެ ރައްކާތެރިކަން ކަށަވަރު ކުރުމަށް ކަމަށެވެ.
ސޯލިހު އެހެން ވިދާޅުވިއިރު، މިދިޔަ އަންގާރަ ދުވަހުގެ ރޭ ގިޔާސުއްދީން އިންޓަނޭޝަލް ސްކޫލުގައި ބާއްވަން އުޅުނު ޕީއެންއެފް އުފެއްދުމުގެ ޖަލްސާއަށް ފަލުހުން ވަނީ ބާރުގެ ބޭނުންކޮށް ހުރަސް އަޅައި ހުއްޓުވައިފަ އެވެ. އެ ސްކޫލަށް ނުވަދެވޭ ގޮތަށް އެތަނުގެ ގޭޓުތައް ބަންދުކޮށް ފުލުހުންގެ ސަފުތައް ރުކުރުވައިލުމުން އެ ޖަލްސާގެ ކަންކަން ވިލަރެސް ކުރުމަށް އެ ސްކޫލަށް ވަންނަން އުޅުނު އިލެކްޝަންސް ކޮމިޝަނުގެ އޮފިޝަލުންނަށް ވެސް އެތަނަށް ނުވަދެވުނެވެ.
އެކަންތައްގަނޑާ ގުޅިގެން ޕީއެންއެފް އުފެއްދުމުގެ ޖަލްސާ ބޭއްވީ ރާޅުގަނޑު ސަރަހައްދުގައި ހުންނަ ސިޑި ބަރީގަ އެވެ. ޕީއެންއެފް އުފެއްދުމުގެ ޖަލްސާއަށް ފުލުހުން ހުރަސް އެޅުމަކީ ޑިމޮކްރެސީގެ އަނދިރި ދުވަހެއް ކަމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވި ފަރާތްތަކުން ވެސް ބުނެފައިވެ އެވެ.
