ރޭ ޕީއެންއެފް އުފެއްދުމުގެ ޖަލްސާ ސަރުކާރުން ހުއްޓުވުމުން، ފެނިގެންދިޔައީ 2024 ވަނަ އަހަރު ފެންނަން ޖެހޭ މަންޒެއް ނޫން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ފުވައްމުލަކުގައި ހުންނަވައި ސޯލިހު "އަދަދު" އާ ވާހަކަ ދައްކަވަމުން ވިދާޅުވީ ރާއްޖޭގެ ޑިމޮކްރަސީއަށް ކުރި ދަތުރުގައި ރޭ ފެނިގެންދިޔައީ އެއްގޮތަކަށް ވެސް ފެނިގެންވާނެ މަންޒަރެއް ނޫން ކަމަށެވެ. ރޭ ސަރުކާރުން ކަންތައް ކުރި ގޮތުން ހަނދާން އާ ވެގެން ދިޔައީ މީގެ 20 އަހަރު ކުރިން ޕާޓީތައް އުފެއްދުމަށް ކުރި މަސައްކަތްތައް މަތިން ކަމަށް ސޯލިހު ވިދާޅުވި އެވެ.
އެގޮތުން މީގެ 20 އަހަރު ކުރިން ޕާޓީތައް އުފެއްދުމަށް ފެށި އިސްލާހީ މަސައްކަތުގައި އެތައް އުނދަގޫތައް ކުރިމަތިވި ކަމަށާއި، ނަމަވެސް އެކަންތައް މާޒީއަށް މިދިޔަ 15 އަހަރު ތެރޭގައި ދުއްވާލި ކަމަށް ސޯލިހު ވިދާޅުވި އެވެ.
"ރޭގެ މާލެއިން ފެނިގެން އެ ދިޔައީ 2024 ވަނަ އަހަރު ފެނިގެންދާންޖެހޭނެ މަންޒަރެއް ނޫން. އަޅުގަނޑު މި ދެންނެވީ ރާއްޖޭގެ ޑިމޮކްރަސީއަށް މި ކުރި ދަތުރުގައި މިހާރު އާދެވިފައި މި އޮތީ މި ހިސާބުގައި އެއްގޮތަކަށް ވެސް ފެނިގެންވާނެ މަންޒަރެއް ނޫން،" އެމަނިކުފާނު ވިދާޅުވި އެވެ.
ސޯލިހު ވިދާޅުވީ ރޭ ފެނުނީ ޒިންމާދާރު ސަރުކާރަކުން ޑިމޮކްރަސީ ދެމެހެއްޓުމަށްޓަކައި އެއްގޮތަކަށް ވެސް ކުރަންވާނެ ވަރުގެ ކަމެއް ނޫން ކަމަށާއި، އެކަން އެއްގޮތަކަށް ވެސް ބަލައި ނުގަނެވޭ ކަމަށެވެ.
"އެއީ ޒިންމާދާރު ސަރުކާރަކުން ޑިމޮކްރަސީ ދެމެހެއްޓުމަށްޓަކައި އެއްގޮތަކަށް ވެސް ކުރަންވާނެ ވަރުގެ ކަމެއް ނޫން. އަޅުގަނޑު އެކަން ކުށްވެރި ވެސް ކުރަން،" ސޯލިހު ވިދާޅުވި އެވެ.
އެކަމަށް ރާއްޖޭގެ ރައްޔިތުން ވަރަށް ބޮޑަށް ވިސްނަން ޖެހޭ ކަމެއް ކަމަށާއި މިދިޔަ ފަސް އަހަރު ތެރޭގައި ސިޔާސީ ޕާޓީތައް އުފެދި ހަރަކާތްތައް ވެސް ބޭއްވުނު ކަމަށް ސޯލިހު ވިދާޅުވި އެވެ.
"އަޅުގަނޑުމެން ވީ ވަރަކުން ފުރުސަތުތައް ހޯދައިދީ ހޯލްތައް ދިނުމާއި އެއްވާންވީ ތަންތަނަށް ފުރުސަތު ދިނުމާއި ރައްކާތެރިކޮށް ބަލަހައްޓަން ޖެހޭ ކަންތައްތަކެއް ކުރިން. އެއާ ހިލާފަށް މިއަދު މި ފެންނަނީ ކަންތައްތައް ކުރުމަށް ހުރަސް އަޅާތަން،" ސޯލިހު ވިދާޅުވި އެވެ.
ހިޔާލުތަފާތުވުން ހުރި މީހުން ނައްތާލައި، ޑިމޮކްރަސީގެ ބިންގާ ރޫޅާލަން ސަރުކާރުން މަސައްކަތް ކުރަމުންދާ ކަމަށާއި މަޖިލީހުގެ މެޖޯރިޓީ ސަރުކާރަށް ލިބިއްޖެނަމަ ގާނޫނަށް ގެންނަން ޖެހޭ ބަދަލުތައް ގެނެސް އަނިޔާވެރިކަން އިސް ކުރާނެ ކަމަށް ސޯލިހު ވިދާޅުވި އެވެ.
ފުލުހުން އަމަލު ކުރައްވާނީ މަތިން އަންނަ އޯޑަރަށްކަން ފާހަގަކުރައްވާ ސޯލިހު ވިދާޅުވީ ބެލެވޭ ގޮތުގައި ކޮންމެވެސް ގަދަ ބާރަކުން ފުލުހުންނަށް އޮތީ ގާނޫނާ ހިލާފަށް އަމުރު ކޮށްފައި ކަމަށެވެ. އެގޮތުން މިހާރު މަސައްކަތް ކުރަމުންދަނީ އެކަމަކީ ސަރުކާރަށް ނޭނގި ކުރި ކަމެއް ކަމަށް ބުނެ، އެކަން ފޫބެއްދުމަށް ކަމަށް ވެސް ސޯލިހު ވިދާޅުވި އެވެ.
