ކުރީގެ ރައީސް އަބްދުﷲ ޔާމީނުގެ އާ ޕާޓީ ، ޕީޕަލްސް ނެޝަނަލް ފްރޮންޓް (ޕީއެންއެފް)ގެ ވަގުތީ ރައީސަކަށް އެމަނިކުފާނުގެ ދަރިކަލުން ޒޭން އަބްދުﷲ ޔާމީން އިންތިހާބުކޮށްފި އެވެ.
ޕީއެންއެފްގެ ވަގުތީ ރައީސަކަށް ޒޭން އިންތިހާބުކުރީ އެޕާޓީ އުފައްދަން ރާޅުގަނޑު ސަހަރައްދުގައި މިރޭ ބޭއްވި ޖަލްސާގައި ބައިވެރިވި 329 މެންބަރުންގެ އިއްތިފާގުންނެވެ.
ޕީއެންގެ ވަގުތީ ރައީސަކަށް ޒޭން އިންތިހާބުކޮށް، ވަގުތީ ސެނެޓެއް ވެސް މިރޭގެ ޖަލްސާގައި އިންތިހާބުކުރި އެވެ.
ޕީއެންއެފް އުފެއްދުމުގެ ޖަލްސާ މިރޭ ފުރަތަމަ ބާއްވަން އުޅުނީ ޣިޔާސުއްދީން އިންޓަނޭޝަނަލް ސްކޫލްގަ އެވެ. އެހެން ނަމަވެސް އެ ޖަލްސާ ބާއްވަން ޕީއެންއެފްއާ އެކު އެ ސްކޫލުން އެއްބަސްވި އެއްބަސްވުމަށް އަމަލުނުކޮށް ފަހު ވަގުތު އެ ހުއްދަ ބާތިލުކުރި އެވެ. އެހެންވެ، ޕީއެންއެފްގެ މެންބަރުން އެ ސްކޫލުގައި ޖަލްސާ ބޭއްވުމަކީ "ހުއްދަނެތް" ކަމެއް ކަމަށް ބަލައި ފުލުހުން އެކަން ހުއްޓުވި އެވެ.
އެއާ އެކު ރާޅުގަނޑު ސަރަހައްދުގައި އެ ޖަލްސާ ބޭއްވީ ޕީއެންއެފުން ބުނި ގޮތުގައި މާލޭ ސިޓީކައުންސިލްގެ ހުއްދައާ އެކުގަ އެވެ.
