އެމްޑީޕީގެ ރިޔާސީ ޕްރައިމަރީއަށްފަހު އެ ޕާޓީ ތެރޭގައި އުފެދުނު ދެ ބަސްވުމުގެ ތެރެއިން, ދަ ޑިމޮކްރެޓްސްގެ ނަމުގައި އާ ޕާޓީއެއް އުފެއްދުމުގައި އިސްކޮށް އުޅުނު އެކަކު ކަމަށްވާ މުހައްމަދު އަންސަރު އެނބުރި އެމްޑީޕީއާ ގުޅިއްޖެ އެވެ.
ޑިމޮކްރެޓްސްއާ ގުޅުނުއިރު ހުރީ, އޭނާ ހުރީ އެމްޑީޕީ ސްލޮޓެއްގައި ސަރުކާރުގެ ސިޔާސީ މަގާމެއްގަ އެވެ. އެހެންކަމުން އެމްޑީޕީ ދޫކޮށް, ޑިމޮކްރެޓްސްއާ ގުޅުމުން، އޭރުގެ ރައީސް އިބްރާހިމް މުހައްމަދު ސޯލިހު އޭނާ އެންވަޔަރަމެންޓު މިނިސްޓްރީގެ ޑެޕިއުޓީ މިނިސްޓަރު ކަމުން ވަކިކުރެއްވި އެވެ.އ
އޭގެ 11 މަސް ފަހުން އަންސަރު އެނބުރި އެމްޑީޕީ ގުޅެން ފޯމުގައި ސޮއި ކުރުމަށްފަހު ހަވާލުކުރީ ވެސް ރައީސް ސޯލިހުއާ އެވެ.
މިދިޔަ އަހަރު ޖެނުއަރީގައި ބޭއްވި އެމްޑީޕީގެ ރިޔާސީ ޕްރައިމަރީއަށްފަހު, ޕްރައިމަރީން ނާކާމިޔާބުވެވަޑައިގެންނެވި ކުރީގެ ރައީސް މުހައްމަދު ނަޝީދާއި, އެމަނިކުފާނަށް ތާއިދު ކުރައްވާ އެމްޑީޕީގެ މެންބަރުން ވަނީ ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދަވާފަ އެވެ.
ޑިމޮކްރެޓްސްގެ އުފެދުމާއެކު, ރައީސް ނަޝީދަށް ތާއިދުކުރާ އެމްޑީޕީގެ ބައެއް މަޖިލިސް މެންބަރުންނާއި, އާންމު މެންބަރުން ވެސް އެ ޕާޓީއާ ގުޅުނެވެ. އެއަށްފަހު މިދިޔަ އަހަރު ބޭއްވި ރިޔާސީ އިންތިހާބުގައި ވެސް ދަ ޑިމޮކްރެޓްސްއިން ވާދަކުރީ ވަކިންނެވެ.
ރިޔާސީ އިންތިހާބުން ބަލިވެ, އެމްޑީޕީ ސަރުކާރު ވެއްޓުމުން, ޑިމޮކްރެޓްސްއިން ވަނީ އެމްޑީޕީއާއެކު އެއް މޭޒަކަށް އަރާ ގުޅިގެން މަސައްކަތް ކުރުމުގެ މަޝްވަރާ ފަށާފަ އެވެ.
ޑިމޮކްރެޓްސް އުފެދުނުތާ އެއް އަހަރު ނުވަނީސް އެ ޕާޓީއާ ގުޅުނު ގިނަ ބައެއް މެންބަރުން ވަނީ އެ ޕާޓީން ވަކިވެފަ އެވެ. މިއަދު އެމްޑީޕީއާ ގުޅުނު އަންސަރަކީ ވެސް ޑިމޮކްރެޓްސްގެ ފައުންޑިން މެންބަރެކެވެ.
