ޕީޕަލްސް ނެޝަނަލް ފްރަންޓު އުފައްދާ ޖަލްސާ މާދަމާ ރޭ ބާއްވަން ހަމަޖެހިފައިވާ ކަމަށާއި އެ ޖަލްސާގައި ކުރީގެ ރައީސް އަބްދުﷲ ޔާމީނު ބައިވެރިވެވަޑައިގަންނަވާނެ ކަމަށް އެ މަސައްކަތުގައި އިސްކޮށް އުޅުއްވާ މަލީހު ޖަމާލް ވިދާޅުވެއްޖެ އެެވެ.
މަލީހު ޖަމާލު އެކްސްގައި ކުރެއްވި ޕޯސްޓެއްގައި ވިދާޅުވީ ޕީއެންއެފް އުފައްދަން މާޗު 8، ގައި ޣިޔާސުއްދީން ސްކޫލްގައި ބާއްވާ ޖަލްސާގައި ޔާމީނު ބައިވެރިވެވަޑައިގަންނަވާނެ ކަމަށެވެ.
އެމްއެމްޕީއާރްސީގެ މައްސަލައިގައި ކޮރަޕްޝަން އަދި ރިޝްވަތު ދިނުމުގެ ކުށެއް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ޔާމީން މިވަގުތު ހުންނެވީ ގޭ ބަންދުގަ އެވެ. ނަމަވެސް ބޭރަށް ނުކުމެވަޑައިގަތުމުގެ ހުއްދަ އޮވެ އެވެ. އެގޮތުން ޖަލްސާގައި ބައިވެރިވުމަށް ޔާމީނު ވަނީ ކަރެކްޝަންސްގެ ހުއްދައަށް އެދިވަޑައިގެންފަ އެވެ.
މިކަމާ ގުޅިގެން މިއަދު އެ އިދާރާގެ މީޑިއާ އޮފިޝަލާ "އަދަދު" އިން ސުވާލު ކުރުމުން ބުނީ ޔާމީނުގެ ސިޓީއަށް ޖަވާބު ދީފައިވާ ކަމަށެވެ. ނަމަވެސް ދީފައިވާ ޖަވާބު ހާމަކުރަން ކަރެކްޝަނުން ދެކޮޅު ހެދި އެވެ.
ރައީސް ޑރ. މުހައްމަދު މުއިއްޒުއާ ހިޔާލުތަފާތުވެ، ވެރިކަން ހިންގާ ޕީޕީއެމްއިން ވަކިވެ، ޔާމީން އާ ޕާޓީއެއް އުފައްދަން މަސައްކަތް ކުރައްވަން ފެއްޓެވީ ނޮވެމްބަރު، 2023، ގަ އެވެ. ޔާމީން ވިދާޅުވީ އެމަނިކުފާނު ޕީޕީއެމްއިން ބާކީކޮށްފައިވާ ކަމަށެވެ.
ރައީސް ޔާމީން މިނިވަން ކުރާނެކަމުގެ ވައުދާއެކު ވެރިކަމަށް އައި ނަމަވެސް ސަރުކާރުން ފަހުން ބުނެފައި ވަނީ ރައީސް ޑރ. މުހައްމަދު މުއިއްޒު ހަމައެކަނި ވައުދުވެވަޑައިގަތީ ޝަރީއަތަށް ނުފޫޒު ނުފޯރުވުމަށް ކަމަށެވެ. އެހެންކަމުން ޔާމީން މިނިވަން ކުރުމުގެ ވައުދު ފުދިފައިވާ ކަމަށް ވެސް ސަރުކާރުން ބުނެފައިވެ އެވެ.
