ވޭތުވެދިޔަ 50 އަހަރުގެ ތެރޭގައި ވެސް އައްޑޫގެ ތަރައްގީއަށް ކަންތައްތަކެއް ކޮށްދީފައި އޮތީ އެމްޑީޕީގެ ވެރިކަންތަކުގައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކުރިއަށް އޮތް މަޖިލިސް އިންތިހާބުގައި އެމްޑީޕީގެ ޓިކެޓުގައި އައްޑޫ ސިޓީގެ ދާއިރާތަކަށް ވާދަކުރާ ކެންޑިޑޭޓުންގެ ތަރާވީސް ޖަލްސާގައި ވާހަަކަދައްކަވަމުން ސޯލިހު ވިދާޅުވީ ވޭތުވެދިޔަ ކޮންމެ އިންތިހާބެއްގައި ވެސް އައްޑޫ ސިޓީން ވޯޓު ދީފައި ވަނީ އެމްޑީޕީއަށް ކަމަށާއި އެއީ ސަބަބުތަކެއް ނެތިއެއް ނޫން ކަމަށެވެ.
އެ ސަބަބަކީ އައްޑޫއަށް ތަރައްގީގެ ލޮލަކުން ބަލައިލި ހަމައެކަނި ބަޔަކީ އެމްޑީޕީކަމުގައި ވުން ކަމަށް އެމަނިކުފާނު ވިދާޅުވި އެވެ.
"އައްޑޫ ސިޓީއަށް މި ވޭތުވެދިޔަ ފަސް އަހަރު ދުވަހުގެ ތެރޭގައި، 50 އަހަރު ދުވަހުގެ ތެރޭގައި ވެސް ހަގީގަތުގައި ތަރައްގީގެ މަސައްކަތެއް ކުރެވިފައި މިއޮތީ އެމްޑީޕީގެ ވެރިކަމެއްގައި، އަދި ހާއްސަކޮށް މި ވޭތުވެދިޔަ ފަސް އަހަރު ތިޔަ ބޭފުޅުންނަށް އެކަން ފާހަގަ ކުރެވިގެންދާނެ،" ސޯލިހު ވިދާޅުވި އެވެ.
އެވާހަކަތަކުގެ ތެރެއިން ތާރީހުގެ ތެރެއަށް ނަޒަރު ހިންގަވައިލައްވައި ސޯލިހު ވިދާޅުވީ އައްޑޫ ސިޓީގެ ރައްޔިތުންނަކީ އަބަދުވެސް މާލެއަށް ބަރޯސާނުވެ، ފުދުންތެރި ދިރިއުޅުމެއް ވޭތު ކުރަމުންދިޔަ ބައެއް ކަމަށެވެ.
ނަމަވެސް ސަރުކާރުގެ ސިޔާސަތުތަކަށް 1970 ގެ ތެރޭގައި އައި ބަދަލުތަކާ ގުޅިގެން މުޅި އައްޑޫ އޮތީ މަރުވެފައި ކަމަށާއި އެ ދުވަހުން ފެށިގެން އައްޑޫއިން ފެންނަމުން ދިޔައީ ދިރުމެއް ނެތް ތަނަކަށްވުމުގެ ކޮޅުމަތި ކަމަށް ސޯލިހު ވިދާޅުވި އެވެ. އޭރުގެ ސަރުކާރުން އެކަން އެކަން އެގޮތަށް ކުރަމުންދިޔައީ ސިިޔާސީ ބޭނުމެއްގައި ކަމަށް ތުހުމަތުކުރައްވައި ސޯލިހު ވިދާޅުވި އެވެ.
އެ ހިތްދަތިކަމުގައި އައްޑޫ ރައްޔިތުން ތިއްބައި އުއްމީދުގެ ހުޅުކޮޅެއް ދިއްލައިދިނީ 2008 ވަނަ އަހަރު އަމަލު ކުރަންފެށި ފެހި ގާނޫނު އަސާސީން ކަމަށް ސޯލިހު ވިދާޅުވި އެވެ. އެ އުއްމީދު ހަގީގަތަކަށް ހަދައިދިނުމުގެ މަސައްކަތް ފެށީ އެމްޑީޕީގެ ފުރަތަމަ ސަރުކާރުން ކަމަށް ވެސް ސޯލިހު ވިދާޅުވި އެވެ.
އެގޮތުން 2008 ވަނަ އަހަރު އުފެދުނު އެމްޑީޕީގެ ފުރަތަމަ ވެރިކަމުގައި ވެސް އައްޑޫގެ ތަރައްގީގެ މުހިންމު މަސައްކަތްތަކެއް ކުރެއްވުނުކަން ސޯލިހު ފާހަގަކުރެއްވި އެވެ.
ނަމަވެސް އެ ވެރިކަން މަގުމަތިން ވައްޓާލުމަށްފަހު ދެން އައި މުއްދަތުގައި އަނެއްކާވެސް އައްޑޫގެ ރައްޔިތުން ތިބެންޖެހުނީ މާޔޫސްކަމުގައި ކަމަށް ސޯލިހު ވިދާޅުވި އެވެ. އަދި އަލުން ވެރިކަން ލިބުމުން އައްޑޫގެ ތަރައްގީއަށް ގިނަ މަސައްކަތްތަކެއް ކޮށްދެއްވިކަމަށް އެމަނިކުފާނު ވިދާޅުވި އެވެ.
"އައްޑޫ ސިޓީގެ މަގުތައް ހެދުމާއި އެއާޕޯޓު ތަރައްގީ ކުރުމާއި ރިސޯޓުތައް އެޅުމަށްޓަކައި ބިން ހިއްކުމާއި، ރަށަށް ބޭނުންވާ ބިންތައް ހިއްކުމާއި ބަނދަރުތައް ހެދުމާއި މިފްކޯގެ ކޯލްޑް ސްޓޮރޭޖުތައް ބޮޑު ކުރުމަށް އަޅުގަނޑުމެން ފަށާފައި ހުރި މަސައްކަތްތައް ފެނުނީމާ އަޅުގަނޑު ހިތުން ހަމަގައިމު ވެސް ބަދަލުތަކެއް ގެންނަން މަސައްކަތްތަކެއް ކޮށްފައި ހުރިކަން ތިޔަ ބޭފުޅުންނަށް ފެނިވަޑައިގަންނަވާނެ،" ސޯލިހު ވިދާޅުވި އެވެ.
އެމްޑީޕީ ސަރުކާރުން އައްޑޫގެ ތަރައްގީއަށް ކޮށްފައި ހުރި މަސައްކަތްތަކަށް އަލި އަޅުވައިލައްވައި ސޯލިހު ވިދާޅުވީ އެމަނިކުފާނުގެ ވެރިކަމުގައި އައްޑޫގެ މަގު ހެދުމަށް 77 މިލިއަން ޑޮލަރު، އެއާޕޯޓު ތަރައްގީ ކުރުމަށް 26 މިލިއަން ޑޮލަރު އެގްޒިމް ބޭންކުގެ ފައިނޭންސިން އިން އޮތީ ހަމަޖެހިފައި ކަމަށެވެ.
އޭގެ އިތުރުން ރިސޯޓު ތަރައްގީ ކުރުމަށް 85 މިލިއަން ޑޮލަރު ހަރަދު ކުރެވުނު ކަމަށާއި މިފްކޯގެ ކޯލްޑު ސްޓޯރޭޖު ތަރައްގީ ކުރުމަށްޓަކައި 68 މިލިއަން ރުފިޔާ ބަޖެޓު ކުރެވުނު ކަމަށް ރައީސް ސޯލިހު ވިދާޅުވި އެވެ.
އައްޑޫއަށް ވާހަކަތަކަށް ފަހު މި ސަރުކާރު އައިފަހުން ރާއްޖޭގެ ހުރިހާ މަޝްރޫތަކެއް މިހާރު ހުއްޓިފައިވާ ކަމަށް އިދިކޮޅުން ކުރާ ތުހުމަތު ސޯލިހު މިރޭ ވެސް ތަކުރާރު ކުރެއްވި އެވެ.
