އެމްޑީޕީގެ ޓިކެޓުގައި މަޖިލީހަށް ވާދަކުރާ ކުރީގެ ޓޫރިޒަމް މިނިސްޓަރު، އަލީ ވަހީދުގެ ރޭޕްގެ ޝިކާރައަކަށްވި ކުދިންގެ ބަޔާންތައް ލީކުވެފައިވި ނަމަވެސް އެކަމާ އެމްޑީޕީން އެއްވެސް ފިޔަވަޅެއް އަޅާފައި ނުވާތީ ވެރިކަން ކުރާ ޕީއެންސީގެ ކެމްޕޭން ތަރުޖަމާނު، ހީނާ ވަލީދު ކަންބޮޑުވުން ފާޅުކޮށްފި އެވެ.
ޕީއެންސީގެ އޮފީހުގައި ކޮންމެ ދުވަހަކު ވެސް ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަދައްކަވަމުން ހީނާ މިއަދު ވިދާޅުވީ އެމްޑީޕީގެ ވެރިކަމުގައި ވެސް ޖިންސީ ގޯނާއާއި ޖިންސީ ފުރައްސާރައިގެ އެތައް މައްސަލަތަކެއް ފެންމަތިވިކަމަށާއި އެކަންކަމާ ގުޅިގެން އެކަށީގެންވާވަރުގެ ފިޔަވަޅެއް އޭރު ވެސް އަޅާފައި ނުވާ ކަމަށެވެ.
"އަލީ ވަހީދުގެ ޖިންސީ އަނިޔާއާއި ރޭޕްގެ ގިނަ މައްސަލަތަކެއް ކުރިންވެސް ފެންމަތިވެ އަދި މިހާރު އެ މައްސަލަތައް ޕީޖީން އަނބުރާ ގެންދަވާފައި ވަނިކޮށް، އެހެންނަމަވެސް އެކަންތައްތައް އަނެއްކާވެސް ފެންމަތިވުމުން މިކަމާ ބެހޭގޮތުން އެއްވެސް އެއްޗެއް ނުބުނެ ކުރިއަށް ދިޔުމަކީ އަޅުގަނޑުމެން ސުވާލު އުފައްދަން ބޭނުންވޭ ޕާޓީގެ އުސޫލާ އެއްގޮތް ކަމަކީތޯއޭ؟،" ހީނާ ވިދާޅުވި އެވެ.
އެމްޑީޕީގައި އަންހެނުންގެ ރޫހެއް ވެސް އޮންނަކަން ފާހަގަކުރައްވައި ހީނާ ވިދާޅުވީ ޖިންސީ ގޯނާ ނުވަތަ ރޭޕްގެ ތުހުމަތު އެވަރަށް ކުރެވޭ ބޭފުޅަކު މަޖިލީހަށް އިންތިހާބު ކުރުމަކީ މަޖިލީހުގައި ތިއްބަވާ އަންހެނުންނަށް ވެސް އޮތް ނުރައްކަލެއް ކަމަށެވެ.
"މިކަހަލަ އެއްވެސް ކަމަކާ އެމްޑީޕީން އެއްވެސް ކަހަލަ ބަހެއް ބުނެފައެއް ނުވޭ، އެ ބޭފުޅުން މީގެ ކުރިން މިފަދަ ކަންކަމުގައި ވަރަށް އަޑުހަރުކޮށް މިކަންކަމާ ދެކޮޅަށް ވަކާލާތު ކުރައްވަމުން ގެންދެވިކަން ފާހަގަކޮށްލެވޭ،" ހީނާ ވިދާޅުވި އެވެ.
އަލީ ވަހީދު ޓޫރިޒަމް މިނިސްޓަރުކަމަށް އައްޔަން ކުރީ ޖޭޕީގެ ސްލޮޓެއްގަ އެވެ. އެ މަގާމުގައި ހުންނަވައި ޓޫރިޒަމް މިނިސްޓަރީގައި މަސައްކަތް ކުރި އަންހެނުންތަކަކަށް ޖިންސީ ގޯނާ ކުރިކަމުގެ ތުހުމަތު އަލީ ވަހީދުގެ މައްޗަށް ކުރެވުނީ 2021 ގަ އެވެ.
އެ މައްސަލަ ފެންމަތިވީ ޓޫރިޒަމް މިނިސްޓަރީގައި މަސައްކަތް ކުރި 13 މުވައްޒަފުން އޭރުގެ ޖެންޑާ މިނިސްޓަރާ އެކު ރައީސް އޮފީހަށް ގޮސް އަލީ ވަހީދުގެ ޖިންސީ ގޯނާގެ މައްސަލަ ރައީސްއަށް ކިޔައިދިނުމުންނެވެ. އެ ވާހަކަތައް ކިޔައިދިނުމުން އޭރުގެ ރައީސް އިބްރާހިމް މުހައްމަދު ސޯލިހު އަށް ކީރިތި ކުރެއްވުނު ކަމަށް ވެސް އޭރު މީޑިއާތަކުން ރިޕޯޓު ކުރި އެވެ.
އެ މައްސަލަ ތަހުގީގުކޮށް ޕީޖީން އަލީ ވަހީދުގެ މައްޗަށް ދައުވާ ކުރަން ވެސް އޭރު ފޮނުވި އެވެ. އެ ޝަރީއަތްތައް ކުރިއަށް ދަނިކޮށް ބޭސްފަރުވާއަށް ކަމަށް ބުނެ އަލީ ވަހީދު ގައުމުން ބޭރަށް ފުރައިގެން ވަޑައިގަތީ އެވެ.
ޔޫކޭގައި އުޅުއްވަނިކޮށް، އެގައުމުގެ އިމިގްރޭޝަން ގާނޫނާ ހިލާފުވި ކަމަށްބުނެ އެ އަހަރުގެ އޮގަސްޓު މަހުގައި އެ ގައުމުގެ ފުލުހުން އޭނާ ހައްޔަރުކޮށް ވަގުތީ ބަންދެއްގައި ބެހެއްޓުމަށް ފަހު ފަހުން ވަނީ ދޫކޮށްލާފަ އެވެ. އެ މައްސަލާގައި އޭނާ ހައްޔަރުކުރީ ގާނޫނާ ހިލާފަށް ކަމަށް ކަނޑައަޅައި އިނގިރޭސި ސަރުކާރުން އޭނާގެ އަރިހުން މާފަށް ވެސް އެދިފައިވެ އެވެ.
އިނގިރޭސިވިލާތުގައި އަލީ ވަހީދާ ހުންނަވަނިކޮށް އޭނާއާ ދެކޮޅަށް ހެކީގެ ގޮތުގައި ހުށަހަޅާފައި ހުރި ބަޔާންތައް އަނިޔާ ލިބުނު ކަމަށް ބުނާ ކުދިން އަނބުރާ ނެގުމުން އެ ޕީޖީން މައްސަލަ ވެސް އަނބުރާ ގެންދިޔައީ އެވެ. މިދިޔަ އަހަރުގެ ޖުލައި މަހު އަލީ ވަހީދު ރާއްޖެ ވަޑައިގަތީ އެހާ ހިސާބުންނެވެ.
ވަޑައިގެން ފުރަތަމަ ސިޔާސީ މަސައްކަތެއް އަލީ ވަހީދު ނުކުރައްވަ އެވެ. އުޅުއްވީ ކުޅިވަރުގެ އެކި ކަންކަމުގަ އެވެ. ނަމަވެސް ރިޔާސީ އިންތިހާބު ބޯމަތިވުމާއެކު އަލީ ވަހީދު މަސައްކަތް ކުރެއްވީ ޖުމްހޫރީ ޕާޓީގެ ރިޔާސީ ކެންޑިޑޭޓު، ގާސިމް އިބްރާހިމްގެ އޭޖެންޓުގެ ގޮތުގަ އެވެ.
އަލީ ވަހީދު އެމްޑީޕީއާ ގުޅިވަޑައިގެންނެވީ މިދިޔަ ޑިސެމްބަރު 7 ގަ އެވެ.
