ސަރުކާރު ބަންދު ދުވަސްތަކެއް ގޮތުގައި ގިނަ ދުވަސްތަކެއް ކަނޑައެޅުމުން މި އޭޕްރީލް މަހު ސަރުކާރު އޮފީސްތައް އާންމު އުސޫލުން ހުޅުވައިގެން ހިދުމަތް ދޭނީ އެންމެ 11 ދުވަހު އެވެ.
އޭޕްރީލް މަހުގެ ގިނަ ދުވަސްތަކެއް ބަންދު ވަނީ ރޯދަ މަހުގެ ފަހު 10 ދުވަސް ބަންދު ކުރުމަށް ރައީސް ޑރ. މުހައްމަދު މުއިއްޒު ކަނޑައެޅުއްވުމާއި, ފިތުރު އީދުގެ އިތުރުން މި މަހު ފަހުކޮޅު ބާއްވާ ރައްޔިތުންގެ މަޖިލިސް އިންތިހާބާ ގުޅިގެން ދެ ދުވަސް ބަންދު ކުރަން ނިންމުމުންނެވެ.
އޭޕްރީލް މަހުގެ ފުރަތަމަ ނުވަ ދުވަހަކީ ރޯދަ މަހުގެ ފަހު 10ގައި ހިމެނޭ ދުވަސްތަކެވެ. އެއަށްފަހު ފިތުރު އީދުގެ މުނާސަބަތުގައި އިތުރު ތިން ދުވަސް ބަންދުވެ އެވެ.
މި ބަންދުތަކަށް ފަހު ސަރުކާރު ހުޅުވާނީ އޭޕްރީލް 14 ގަ އެވެ. އެއަށް ފަހު ހަފުތާއެއް ވަންދެން ސަރުކާރު ހުޅުވައިގެން ހިދުމަތް ދިނުމަށް ފަހު މި މަހުގެ 21 އަދި 22 ބަންދު ވާނެ އެވެ. އެއީ މަޖިލިސް އިންތިހާބާ ގުޅިގެން ބަންދު ކުރާ ދެ ދުވަހެވެ. އިންތިހާބަށް ފަހު އަންނަ ރަސްމީ ހަ ދުވަހު ސަރުކާރު ހުޅުވާނެ އެވެ.
އޭޕްރީލް މަހުގެ ޖުމްލަ 19 ދުވަސް ބަންދު ވާއިރު, މިއީ ފަހުގެ ތާރީހެއްގައި އާންމު ހާލަތެއްގައި އެއް މަހެއްގައި ސަރުކާރު ބަންދު އެންމެ ގިނަ ދުވަސް އަންނަ މަހެވެ. ޖުލައި 2022 ގައި އެ އަހަރުގެ ބޮޑު އީދާއި, މިނިވަން ދުވަހުގެ ބަންދުތަކުގެ އިތުރުން ހަފުތާ ބަންދުތަކާއެކު ޖުމުލަ 18 ދުވަސް ބަންދު ކުރި އެވެ.
