ރިޔާސީ އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ހުކުމް ކުރުމުގެ ދެތިން ދުވަސް ކުރިން ޕީޕަލްސް ނޭޝަނަލް ކޮންގްރެސް (ޕީއެންސީ) އިން ކެންޑިޑޭޓަކު ދެއްކި ކަމަށާއި އޭރުގެ އިދިކޮޅު ކޯލިޝަން މަގުމަތި ނުވާނެ ގޮތަށް ކަންކަން ކުރެއްވި ކަމަށް ވިދާޅުވެ ސަރުކާރުގެ ވެރިންނަށް އޭރު ލީޑަރަކަށް ހުންނެވި ކުރީގެ ރައީސް އަބްދުالله ޔާމީން ރައްދު ދެއްވައިފި އެވެ.
ޔާމީނަށް ވާދަނުކުރެވޭނެ ކަމަށް ސުޕްރީމް ކޯޓުން ނިންމުމާ އެކު އިންތިހާބު ބޮއިކޮޓް ކުރަން ނިންމައި "ޕީޕީއެމް/ޕީއެންސީ މަގުމަތިކުރަން" ޔާމީން މަސައްކަތް ކުރެއްވި ކަމަށް މިހާރު ވެރިކަމުގައި ތިއްބެވި ކޯލިޝަންގެ ވެރިން ވަނީ ތުހުމަތު ކުރައްވާފަ އެވެ.
ޔާމީން ފަހަތުގައި ހުންނަވައިގެން އުފައްދަވާ ސިޔާސީ ޕާޓީ، ޕީއެންއެފުގެ ތާއީދާއެކު، ކުރިއަށް އޮތް 20 ވަނަ ރައްޔިތުންގެ މަޖިލީހަށް ވާދަކުރާ ފަރާތްތަކަށް ތާއިދު ހޯދުމަށް އެ ޕާޓީގެ އޮފީހުގައި ރޭ ބޭއްވި ޖަލްސާގައި އެމަނިކުފާނު ވަނީ އެ ތުހުމަތުތަކަށް ރައްދު ދެއްވާފަ އެވެ.
"އަޅުގަނޑުގެ މައްސަލަ އަޅުގަނޑަށް ކުރިމަތި ނުލެވޭ ގޮތަށް ސްޕްރީމް ކޯޓުން ނިންމުމުގެ ކުރިން ޕީއެންސީގެ ރިޔާސީ ކެންޑިޑޭޓަކު ހުންނާނީ ދައްކާފައި. އެހެންވީމާ ކޮން ވާހަކައެއް މިދައްކަނީ މަގުމަތިވާ ވާހަކަ. އެ އުޅެނީ ކޮން ހަނދާނެއް ބަލިވެގެން، ކޯއްޗެއް އޮޅުވާލަންތޯ އެ އުޅެނީ," ހިތްހަމަނުޖެހުން ފާޅުކުރައްވަމުން ޔާމީން ވިދާޅުވި އެވެ.
އެމަނިކުފާނަކީ ސިޔާސީ މީހެއް ކަމަށާއި ކުރިއަށް އޮތް ތަނުގައި ކަން ވެދާނެ ގޮތަކާ މެދު ވިސްނެވުމަށް ފަހު ގޮތްތަކެއް ނިންމެވި ކަމަށް ޔާމީން ވިދާޅުވި އެވެ. އެގޮތުން, ޕީޕީއެމްގެ ބަދަލުގައި ޕީއެންސީން ކެންޑިޑޭޓަކު ދެއްކި ކަމަށް ވިދާޅުވެ އެކަމުގެ ސަބަބު ހާމަކުރެއްވި އެވެ.
"ޕީޕީއެމުއިން ރިޔާސީ ކެންޑިޑޭޓަކު ނުދެއްކި ސަބަބަކީ ޕީޕީއެމްއިން ރިޔާސީ ކެންޑިޑޭޓަކު ދައްކައިފި ކަމަށް ވަންޔާ ސުޕްރީމް ކޯޓަށް އަޅުގަނޑުގެ މައްސަލަ ނިންމާލަން މާ ފަސޭހަވީސް. އެއީ އޭރަށް ބަހުސެއް ނެތި، އަޅުގަނޑު ރިޔާސީ ކެންޑިޑޭޓަކަށް ނުވޭ," ޔާމީން ވިދާޅުވި އެވެ.
ދެ ޕާޓީން ކުރެ ޕާޓީއަކުން ކެންޑިޑޭޓަކު ނެރުމަށް އެކަށީގެންވާ ވަގުތު ނޯންނާނެ ކަމަށް ބަލައި އެކަން ލީޑާޝިޕަށް ޑރ. ޖަމީލް މެދުވެރިކޮށް ނޯޓަކުން ދެންނެވި ކަމަށް ޔާމީން ވިދާޅުވި އެވެ.
"އަޅުގަނޑަށް ސުޕްރީމް ކޯޓުން އަޅުގަނޑަށް ކުރިމަތި ނުލެވޭނެކަން ނިންމުމުގެ ދެތިން ދުވަސް ކުރިން އޮންނާނީ ޕީއެންސީން ބޭފުޅަކު ދައްކާފައި. އަދި އެ ބޭފުޅެއްގެ ކެންޑިޑެސީ އޮތީ ފައިލްކޮށްފައި އަޅުގަނޑަށް ސުޕްރީމް ކޯޓުން ހުކުމް އައިއިރު. އަޅުގަނޑު ދެންނެވިން ލަސްނުކޮށް ފައިލްކުރަން ވެސް," ޔާމީން ވިދާޅުވި އެވެ.
ޔާމީނަށް ވާދަނުކުރެވޭނެ ކަމަށް ސުޕްރީމް ކޯޓުން ހުކުމް ކުރީ އޮގަސްޓު 6, 2023 ގަ އެވެ. ޕީޕީއެމްގައި ހުންނެވުމަށް ފަހު އިދިކޮޅުގެ ރިޔާސީ ކެންޑިޑޭޓަކަށް ކުރިމަތިލުމަށް ރައީސް މުއިއްޒު ޕީއެންސީއަށް ބަދަލުވީ އޮގަަސްޓު 3, 2023 ގަ އެވެ. ހަމަ އެ ދުވަހު ސެނެޓުގައި ނެގި ވޯޓު ކާމިޔާބު ކުރައްވައި ޕީއެންސީގެ ރިޔާސީ ކެންޑިޑޭޓަކަށް ވެވަޑައިގެންނެވި އެވެ.
"އަޅުގަނޑަށް ތި ހުރިހާ މީހުންގެ މިޒާޖާ މީހުން ކޮށްފައި ހުރި ކަންތައްތައް އަޅުގަނޑަށް އެނގޭ. އަޅުގަނޑު އަނގައިގައި މިހެރަ އަޅާފައި ހުރި މަލަންގަނޑުތައް ނައްޓާލީމާ އަޅުގަނޑަށް އެ ހުރިހާ ވާހަކައެއް ދެއްކޭނެ. އެހެންވީމާ ޕީޕީއެމް ޕީއެންސީ މަގުމަތި ކުރަން އަޅުގަނޑު މަސައްކަތެއް ނުކުރަން," ބަހުގެ ހަމަލާ އަމާޒުކުރައްވަމުން ޔާމީން ވިދާޅުވި އެވެ.
ސުޕްރީމް ކޯޓުން ނިންމި ނިންމުމަކީ ސިޔާސީ ނިންމުމެއް ކަމަށާއި ލީޑާޝީޕްގެ ބޭފުޅުންގެ ހިތްވަރެއް ހުރެގެން ބޮއިކަޓްކޮށްފި ނަމަ ނުވަތަ ބޮއިކަޓް ކުރާ ވަރަށް މަގުމަތީ ހަރަކާތް ކުރެވުނު ނަމަ ހުކުމް ރިވިއު ކުރުމާ ހަމައަށް ގެންދެވުނީސް ކަމަށް ވެސް ޔާމީން ވިދާޅުވި އެވެ.
"ނަމަވެސް މި ބޭފުޅުންގައި ހިތްވަރެއް ނެތޭ. އަޅުގަނޑަށް ފެނިގެން ދިޔައޭ ޖަލުގައި ހުރިއިރު ވެސް އަޅުގަނޑަށް ފެނިގެން ދިޔައޭ މުޒާހަރާތައް ކުރިއަށް ދަނީ ކިހިނެއްކަން. އޭގައި ނެތޭ އާރެއް. ތި މުޒާހަރާތަކަށް ނުނިކުންނަ ވެރިން ވެސް އެބަ ތިބި. އަދި އެއްރޭ އެކަކު ނުކުތިއްޔާ އަނެއްރޭ އަނެކަކު ނުނިކުމޭ," ޔާމީން ވިދާޅުވި އެވެ.
"ރައީސް ޔާމީނަށް ބައިވެރި ނުވެވޭ އިންތިހާބެއްގައި ރާއްޖޭގައި ނުބޭއްވޭނޭ ކާކުތޯ ގޮވީ، ރައީސް ޔާމީންތޯ ގޮވީ ޕީޕީއެމް ޕީއެންސީގައި ތިބި ލީޑަރުންތޯ ގޮވީ."
