ރައީސް ޑރ. މުހައްމަދު މުއިއްޒުގެ ސަރުކާރުން މަޝްރޫއުތައް ފަށަމުން ދަނީ އެއްވެސް ޕްލޭނެއް ނެތި, ރޭވުންތެރިކަމެއް ނެތި އެކަމަށް ބޭނުންވާ ފައިސާ ވެސް ނުހޯދައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ގަލޮޅުގެ ދެ ދާއިރާއަށް ވާދަކުރާ އެމްޑީޕީގެ ކެންޑިޑޭޓުން ބޭއްވި ތަރާވީހުގައި ވާހަކަ ދައްކަވަމުން ސޯލިހު ވަނީ 2018 ގައި ވެރިކަމާ ހަވާލުވިއިރު އިގުތިސޯދު އޮތީ މާރަނގަޅު ހާލަތެއްގައި ނޫން ކަމަށް ވިދާޅުވެފަ އެވެ. ނަމަވެސް, އެމަނިކުފާނުގެ ސަރުކާރުން ފުރަތަމަ ތިން މަސް ދުވަހުގެ ތެރޭގައި ސަރުކާރު ހިންގަން ބޭނުންވާ ފައިސާ ހޯދި ކަމަށް ސޯލިހު ވިދާޅުވި އެވެ.
"ބަޖެޓަށް ބޭނުންވާ 200 މިލިއަން ޑޮލަރު ހޯދިން. ޕްރޮޖެކްޓު ފައިނޭންސިންގެ ގޮތުގައި 800 މިލިއަން ޑޮލަރު ކަށަވަރުކުރިން. ފޮރިން ރިޒާވުގައި ހުރި ދަތިތައް ހައްލުކުރަން 400 މިލިއަން ޑޮލަރުގެ ކަރަންސީ ސްވޮޕެއް ބޭނުން ގަޑިއެއްގައި ބޭނުންކުރެވޭ ގޮތަށް އަޅުގަނޑުމެން ހޯދިން," މަސައްކަތް ފެށީ އެކަންކަން ކުރުމަށް ފަހުކަން ހާމަކުރައްވަމުން ސޯލިހު ވިދާޅުވި އެވެ.
ސަރުކާރުގެ ފަހުކޮޅު ގުޅީފަޅު ހިއްކަން ފެށީ އެކަމަށް ބޭނުންވާ ދިރާސާތައް ހަދައި ފައިސާ ހޯދައިގެން ކަމަށް ސޯލިހު ވިދާޅުވި އެވެ. އެ މަޝްރޫއުގެ މަސައްކަތް ނުހުއްޓި ކުރިއަށްދަނީ އެހެންވެ ކަމަށް ވިދާޅުވެ ސޯލިހު ވަނީ މިސަރުކާރުން ފެށި ރަސްމާލެ ޕްރޮޖެކްޓަށް ވަރަށް ބޮޑަށް ފާޑުވިދާޅުވެފަ އެވެ.
"ފުށިދިއްގަރު ފަޅު ހުއްޓިފައި އޮތީ އެއްވެސް ޕްލޭނެއް ނެތި އެކަން ކުރީމައި. މި ސަރުކާރަކީ ކަންކަން ކުރާއިރުގައި ޕްލޭނެއް ނެތި, ރޭވުމެއް ނެތި, ފައިސާ ނުހޯދައި ހަމައެކަނި ފޮޓޯއެއް ނެގުމަށްޓަކައި ކަން ކުރަމުންދާ ސަރުކާރެއް," އެމްޑީޕީގެ އެޑްވައިޒަރުކަން ވެސް ކުރައްވާ ސޯލިހު ވިދާޅުވި އެވެ.
މި ސަރުކާރުން ހާރިޖީ ސިޔާސަތު ބައްޓަން ކޮށްފައިވާ ގޮތުން ރާއްޖެއަށް ޒިޔާރާތްކުރާ އިންޑިއާގެ ފަތުރުވެރިންގެ އަދަދު ދަށްވެފައިވާ ކަމަށާއި އެކަމުގެ ސަބަބުން އިގުތިސޯދަށް ގެއްލުންތަކެއް ލިބެމުންދާ ކަމަށް ވެސް ސޯލިހު ވިދާޅުވި އެވެ.
"ހަމައެކަނި ސީދާ ޓޫރިޒަމް ސެކްޓާއިން އެކަނި 58 މިލިއަން ޑޮލަރުގެ ގެއްލުން މި ތިން މަސް ދުވަހުގެ ތެރޭގައި ވެއްޖެ. ގުޅިފައި ހުރި އެހެން ސެކްޓާތައް ހިމަނާނަމަ ގާތްގަނޑަކަށް 68 މިލިއަން ޑޮލަރު ރާއްޖެއަށް އެތެރެނުވެ ގެއްލިގެން ހިނގައްޖެ," ސޯލިހު ވިދާޅުވި އެވެ.
ސަރުކާރުގައި އިގުތިސޯދީ ސިޔާސަތެއް އަދި ތަސައްވުރެއް ނެތް ކަމަށާއި ދައުލަތުގެ އާމްދަނީ އިތުރު ކުރުމަށް އެެއްވެސް ކަމެއް ސަރުކާރުން ކޮށްފައި ނުވާ ކަމަށް ސޯލިހު ވިދާޅުވި އެވެ. ރައްޔިތުންގެ މަޖިލީހުގެ މެޖޯރިޓީ އެމްޑީޕީން ހޯދަން ޖެހެނީ އިގުތިސޯދީ ގޮތުން ގައުމު ހަމަ މަގަށް އެޅުވުމަށް ކަމަށް ވެސް އެމަނިކުފާނު ވިދާޅުވި އެވެ.
