ރައީސް ޑރ. މުހައްމަދު މުއިއްޒު ހީފުޅު ކުރައްވަނީ ރައްޔިތުން ގަމާރު ހެއްދޭނެ ކަމަށް ކަމަށާއި ނަމަވެސް މިއަދު ރައްޔިތުން ގަމާރު ނުހެއްދޭނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
މުޅި ހުޅުމާލެ ތަރާވީސް ނަމުގައި އެމްޑީޕީން ހުޅުމާލޭގައި ބޭއްވި ކެމްޕޭން އިވެންޓުގައި ސޯލިހު ވިދާޅުވީ ރައީސް މުއިއްޒު ދައްކަވާ ވާހަކަ އާއި ހައްދަވާ ދޮގު ރައްޔިތުންނަށް ސާފުކޮށް އެނގޭ ކަމަށާއި މިއަދު ރައްޔިތުން އެ ދޮގުތައް ގަބޫލު ނުކުރާ ކަމަށެވެ.
އެގޮތުން ކުރިޔަށް އޮތް ރައްޔިތުންގެ މަޖިލިސް އިންތިހާބުގައި ރައްޔިތުން ގަމާރު ނޫންކަން މި ސަރުކާރަށް ހާމަ ކޮށްދޭނެ ކަމަށް ވެސް ސޯލިހު ވިދާޅުވި އެވެ.
"އަޅުގަނޑު ހިތުން ޑރ. މުއިއްޒު ހީފުޅުކުރައްވަނީ ކަންނޭގޭ ރައްޔިތުންނަކީ އެހާ ގަމާރު ބަޔެކޭ. ނޫން އެހެނެއް ނޫން މިއަދު ދިވެހި ރައްޔިތުން ތިބީކީ. އެ ދައްކަވަނީ ކޮން ވާހަކައެއްކަން އެހަދަނީ ދޮގުކަން ވަރަށް ސާފުކޮށް އެބަ އެނގޭ،" ސޯލިހު ވިދާޅުވި އެވެ.
މި ސަރުކާރުން ސިޔާސަތުތައް ބަށްޓަން ކޮށްފައި އޮތީ އެއްވެސް ޕްލޭނެއް ނެތި ކަމަށާއި އެހެން ނޫން ނަމަ ފުށިދިއްގަރުފަޅު ހުއްޓިފައި ނޯންނާނެ ކަމަށް ސޯލިހު ވިދާޅުވި އެވެ.
ވެރިކަމަށް ވަޑައިގެން ރައީސް މުއިއްޒު ކުރެއްވި ކަމަކީ ރައްޔިތުން އެންމެ ބޮޑަށް ބޭނުންވެފައި އޮތް މަޝްރޫއުތައް އިއުލާން ކޮށްލުންކަން ފާހަގަކުރައްވާ ސޯލިހު ވިދާޅުވީ ހުރިހާ ކަމެއް ވެސް ކުރެއްވީ ރައްޔިތުންނަށް އޮޅުވާލުމަށް ކަމަށެވެ.
"އެއާޕޯޓް 25 މިލިއަން މީހުން އެރައިވްވާ ގޮތަށް ހަދާނެ ވާހަކަ. މީ މުޅި ސިންގަޕޫރު ދުބާއީގައިވެސް ނުވާ ވަރު ވާހަކަ މިދައްކަނީ. ދެން އެދިޔަ ބާރު މިނުގައި ގޮސް ގދ. ތިނަދޫއަށް ގޮސް އެތަނުގައި އަޅައިފި ބޮޑު އެއާޕޯޓެއް. އަނެއްކާވެސް 500 މިލިއަން ޑޮލަރު. ދެން ދިޔައީ ވިލިނގިލިއަށް. ވިލިނގިލީގައި އެއަށްވުރެ ބޮޑު އެއާޕޯޓެއް އެއަށްވުރެ ބައިވަރު ފައިސާއަށް. މިކަހަލަ އެތައް ކަމެއް ރައްޔިތުންނަށް އޮޅުވާލަން އެތައް އެތައް ދޮގުތަކެއް ހަދަމުން މިދިޔައީ،" ސޯލިހު ވިދާޅުވި އެވެ.
ސޯލިހު ވިދާޅުވީ މާލޭ ރައްޔިތުންނަށް ގޯތި ދިނުމަށް އާ މަޝްރޫއުތައް ފަށަން ޖެހޭނީ މިހާރު ފަށާފައިވާ މަޝްރޫއުތައް ނިންމާލުމަށް ފަހު ކަމަށާއި ރާވަމުން ދަނީ ބިއްލޫރި ހޮޅިއެއްގެ ތެރެއިން މާލޭގެ ރައްޔިތުންނާއި ދަފްތަރުގެ ރައްޔިތުން ފުށިދިއްގަރަށް ގެންދަން ކަމަށެވެ.
