ސަރުކާރުގެ ފަރާތުން ތުލުަސްދޫ ދާއިރާގެ ޕީއެެންސީ މެމްބަރު އިބްރާހީމް ނަސީމު ހުށަހެޅުއްވި ސޮވްރިން ޑިވެލޮޕްމެންޓް ފަންޑު ބިލު ބަލައިގަތުމާ މެދު އިއްޔެ މަޖިލީހުގައި އިއްޔެ ވޯޓު ނެގި އިރު، ޕީއެންސީގެ އެއްވެސް މެމްބަރަކު ތަޅުމުގައި ވަޑައިގެން ނެތެވެ.
އިއްޔެގެ ޖަލްސާގެ ވޯޓު ގަޑީގައި އެ ބިލާމެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވީ ރިޔާސަތުގައި އިންނެވި، މަޖިލީހުގެ ނައިބު ރައީސް އަދި ހޯރަފުށި ދާއިރާގެ މެމްބަރު އަހުމަދު ސަލީމު ހިމެނިވަޑައިގަންނަވާ ގޮތުން ޖުމްލަ ތިން މެމްބަރުންނެވެ. ސަލީމު ވޯޓެއް ދެއްވީ އެކެއް އެކަކުން ވޯޓު އެއްވަރުވުމުންނެވެ.
އެކަން އެގޮތަށް ހިނގާފައި ވަނިކޮށް މަޖިލީހުގެ މިއަދުގެ ޖަލްސާގައި ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވީ ގައުމީ ބޮޑު މައްސަލައަކާ ބެހޭ ގޮތުން ހުށަހަޅާފައި އޮތް އެ ބިލު އެމްޑީޕީން ބޭރުކޮށްލީ ކަމަށެވެ.
އިއްޔެ އެ ބިލަށް ވޯޓަށް އެހި އިރު ޕީއެންސީގެ މެމްބަރަކު ތަޅުމުގައި ވަޑައިގެން ނެތީ އޭނާ ވިދާޅުވި ގޮތުގައި އެންޓިޑިފެކްޝަން ބިލު ދިރާސާކުރާނެ ކޮމިޓީއަކާ މެދު ހިޔާލުތަފާތުވުމުން، އިހުތިޖާޖުކުރުމުގެ ގޮތުން ތަޅުމުން ނުކުމެވަޑައިގެންނެވުމުންނެވެ.
"ގައުމީ ބޮޑު މައްސަލައަކަށް ހުށަހެޅިފައިވާ ސޮވްރިން ފަންޑުގެ ބިލު، އެމްޑީޕީން ބޭރުކޮށްލާފައި އެވަނީ،" ސިރާޖް ވިދާޅުވި އެވެ.
ސިރާޖް އެހެން ވިދާޅުވުމުން، ނިޒާމާ ބެހޭ މައްސަލައެއް ކަމަށް ވިދާޅުވެ ފުރުސަތު ހޯއްދަވައިގެން އެމްޑީޕީގެ ބައެެއް މެމްބަރުން އޭނާއަށް ރައްދު ދެއްވި އެވެ.
"މިހާރު ބިލެއް ހުށަހަޅަން ދިނީމާ އެ ދައްކަނީ އިއްޔެ މިތަނަށް ސަރުކާރު މީހުން ނައިސް، އަޅުގަނޑުމެން ބޮލުގައި އިލްޒާމު އެ އަޅުވަނީ،" ހެންވޭރު ދެކުނު ދާއިރާގެ މެމްބަރު ހުުސައިން ޝަހީމް ވިދާޅުވި އެވެ.
އެއީ ނިޒާމާ ބެހޭ މައްސަލައެއް ކަމަށް ބަލައިނުގެންނެވި ނަމަވެސް ރިޔާސަތުން މަޖިލީހުގެ ރައީސް މުހައްމަދު އަސްލަމް މެމްބަރު ސިރާޖަށް އިރުޝާދު ދެއްވީ މިއަދު ހުށަހަޅުއްވާ ބިލާ ބެހޭ ގޮތުން ވާހަކަ ދެއްކެވުމަށެވެ.
"ހަމަ މިދައްކަނީ މި ބިލާ ބެހޭ ގޮތުން، ސަރުކާރުން ހުށަހަޅަމުންދާ މުހިންމު ބިލުތަކުގެ ވާހަކަ. ރައްޔިތުން ސަމާލުވާން ޖެހޭ ކަމެއްގެ ވާހަކަ އަަޅުގަނޑު މި ދެންނެވީ، އެއީ އެފަދަ މުހިއްމު ބިލެއް، ބޭރުކޮށްލުން އެއީ ރައްޔިތުންގެ މަޖިލީހުގެ އިންތިހާބު ބޯމަތިވެފައި އޮތް އިރު ވިސްނަން ޖެހޭ ކަމެއް،" އޭގެ ފަހުން ވެސް ސިރާޖް ވިދާޅުވި އެވެ.
އެގޮތަށް ވާހަކަ ކުރިއަށް ގެންދަވަން ފެށްޓެވުމުން، ނިޒާމާ ބެހޭ މައްސަލައެއް ކަމަށް ވިދާޅުވެ ފުރުސަތު ހޯއްދަވައިގެން ހެންވޭރު ހުޅަނގު ދާއިރާގެ ދަ ޑިމޮކްރެޓްސް މެމްބަރު ހަސަން ލަތީފު ވިދާޅުވީ ސޮވްރިން ފަންޑް ބިލަކީ އެހާ މުހިއްމު ބިލެއް ނަމަ، ސަރުކާރު މެމްބަރުން މަޖިލީހަށް ވަަޑައިގަންނަވާތޯ ރައީސުލްޖުމްހޫރިއްޔާ ވެސް ބައްލަވަން ޖެހޭ ކަމަށެވެ.
"ވަރަށް ބޮޑު އަގު ދީފައި ގަނެގެން ގެންދިޔަ 13 މެމްބަރަކު ވެސް އެބަތިބި، އެއިން ބޭފުޅަކު ހައްދަވާ ގޮތެއް ވެސް ރައީސުލްޖުމްހޫރިއްޔާ ވެސް ބައްލަވަނީއެއް ނޫން،" ހަސަން ވިދާޅުވި އެވެ.
އެ އޮއިވަރުގައި މަޖިލީހުގެ ނައިބު ރައީސް އަހުމަދު ސަލީމު ވެސް ޖެހިވަޑައިގެން ވިދާޅުވީ ސޮވްރިން ޑިވެލޮޕްމަންޓް ފަންޑްގެ ބިލާ މެދު ކަން ހިނގި ގޮތް މަޖިލީހުގެ ރެކޯޑްތަކުގައި ސާފުކޮށް އޮންނާނެ ކަމަށެެވެ.
އެ ބިލު މަޖިލީހަށް ބަލައިގަތުމަށް ވޯޓު ނެގި ވަގުތު މަޖިލީހުގައި 28 މެމްބަރުން ތިއްބެވި އެވެ.
ނަމަވެސް, ވޯޓުގައި ބައިވެރިވީ އެންމެ ދެ މެމްބަރުންނެވެ. ފެންނަ ކަމަށް އެއް މެމްބަރަކު ވޯޓު ދެއްވިއިރު ނުފެންނަ ކަމަށް މެމްބަރަކު ވޯޓު ދެއްވި އެވެ. ނަތީޖާ އެއްވަރުވުމާ ގުޅިގެން ރިޔާސަތުގައި އިންނެވި މަޖިލީހުގެ ނައިބު ރައީސް އަހްމަދު ސަލީމް ވޯޓު ދެއްވީ އެ ބިލު މަޖިލީހަށް ބަލައިނުގަތުމަށެވެ.
"ވޯޓާ ހިސާބަށް އައިއިރު ތަކުރާރުކޮށް އަޅުގަނޑު ދަންނަވަމުން ދިޔައީ މި ގަޑީގައި ވޯޓު އޮންނާނެ ކަމަށް. ފްލޯއިން މި ފެންނަނީ ސަރުކާރުގެ އެއްވެސް މެމްބަރަކު, ހަމަ އެއްވެސް މެމްބަރަކު ހާޒިރުވެ ނެތްކަން. އެހެންވީމާ މި ބިލުގެ މުހިންމުކަން ސަރުކާރުގެ މެމްބަރުންގެ ފަރާތުން ފެނިފައި ނުވާތީ އަޅުގަނޑު ވޯޓު ދެނީ ނުފެންނަ ކަމަށް," ވޯޓު ދެއްވި ސަބަބު ހާމަކުރައްވަމުން ސަލީމް އިއްޔެ ވިދާޅުވި އެވެ.
