ރައްޔިތުންގެ މަޖިލީހުން ފާސްކުރި ގޮތަށް ފަނޑިޔާރުންނާއި ބައެއް މިނިވަން މުއައްސަސާތަކަށް މި މަހު މުސާރަތައް ނުދެވޭނެ ކަމަށް ފިނޭންސް މިނިސްޓްރީން އަންގައިފި އެވެ.
މިދިޔަ މަހުގެ 28 ގައި ރައްޔިތުންގެ މަޖިލީހުން ފަނޑިޔާރުންނާއި ލޯކަލް ކައުންސިލަރުންނާއި އެހެން ބައެއް މިނިވަން މުއައްސަސާތަކުގެ މެންބަރުންގެ މުސާރަ ބޮޑު ކުރި އެވެ.
އެހެން ނަމަވެސް ފިނޭންސުން ވަނީ މަޖިލީހުން އެކުލަވާލައި އޮނިގަނޑާ އެއްގޮތަށް މި މަހު މުސާރައަށް ބަދަލުގެންނަ ނަމަ މުސާރަ ދޭން ޖެހޭ މުއްދަތުގައި މުސާރަ ނުދެވިދާނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ބައެއް މިނިވަން މުއައްސަސާތަކަށް އަންގާފަ އެވެ.
މި މަހުގެ މުސާރައާއެކީ ބޮޑު ކުރި ވަރަށް މުސާރަ ނުލިބުނު ނަމަވެސް އަންނަ މަހުގެ މުސާރަތައް ދޭއިރު މި މަހު އުނިކުރި ބައި ހިމަނަން ފިނޭންސުން އަންގާފައިވެ އެވެ. އެގޮތުން އިދާރީ ގޮތުން ފުރިހަމަކުރަން ޖެހޭ ކަންކަން ފުރިހަމަކޮށް ނިންމައި އަންނަ މަހު އާ އޮނިގަނޑާ އެއްގޮތަށް މުސާރަ ދޭން ވާނެ ކަމަށް ވެސް ފިނޭންސުން ބުނެފައިވެ އެވެ.
މައުލޫމާތު ލިބިފައިވާ ގޮތުގައި ބޮޑު ކުރި ވަރަށް މުސާރަތައް ދޭން އެންމެ ބޮޑު ހަރަދެއް ހިނގާނީ ފަނޑިޔާރުންނަށެވެ. އަންދާޒާ ކުރެވެނީ ފަނޑިޔާރުންގެ މުސާރަ ބޮޑުކުރަން 12 މިލިއަނަށް ވުރެ ގިނަ ރުފިޔާ ހަރަދުވާނެ އެވެ.
ފަނޑިޔާރުންނާއި މިނިވަން މުއައްސަސާތަކަށް އާ އޮނިގަނޑުގެ ދަށުން މުސާރަ ނުލިބުނު ނަމަވެސް ލޯކަލް ކައުންސިލަރުންނަށް މި މަހު ބޮޑު މުސާރަ ލިބޭނެ އެވެ. ކައުންސިލުތަކުގެ ބެލެނިވެރި އިދާރާ، ލޯކަލް ގަވަމަންޓް އޮތޯރިޓީން ވަނީ އާ އޮނިގަނޑާ އެއްގޮތަށް މުސާރަތައް ދޭން ހުރިހާ ކައުންސިލުތަކަށް އަންގާފަ އެވެ.
