ކުރިއަށް އޮތް މަޖިލިސް އިންތިހާބުގައި ވާދަ ކުރުމަށް ކުރީގެ ރައީސް ޔާމީންގެ ތާއީދާއެކު ނަން ހުށަހެޅުއްވި ކެންޑިޑޭޓުންނަށް ޕީއެންއެފްގެ ލޯގޯ ޖެހުމުގެ ހުއްދަ ދިން ނަމަވެސް ވޯޓު ކަރުދާހުގައި ލޯގޯ ޖެހުމުގެ ފުރުސަތު ދެން ނޯންނާނެ ކަމަށް އިލެކްޝަންސް ކޮމިޝަނުން ބުނެފި އެވެ.
"އަދަދު" ނޫހުން ކުރި ސުވާލަކަށް ޖަވާބު ދެއްވަމުން އިލެކްޝަންސް ކޮމިޝަނުގެ ސެކްރެޓަރީ ޖެނެރަލް، ހަސަން ޒަކަރިއްޔާ ވިދާޅުވީ މިހާރު ވޯޓު ކަރުދާސްތައް ޕްރިންޓު ކުރުމުގެ މަސައްކަތް ފަށާފައިވާ ކަމަށެވެ.
"މަޖިލިސް އިންތިހާބުގެ ވޯޓު ކަރުދާސްތައް ޕްރިންޓު ކުރުމުގެ މަސައްކަތް މިހާރު ވަނީ ފެށިފައި، އެހެންވީމާ އެ ބޭފުޅުން އެދިލެއްވި ގޮތަށް ލޯގޯ ބޭނުން ކުރުމުގެ ހުއްދަ އަޅުގަނޑުމެންނަށް ދެވުނަސް ވޯޓު ކަރުދާހުގައި ލޯގޯ ޖެހުމުގެ ފުރުސަތެއް ދެން ނޯންނާނެ،" ހަސަން ވިދާޅުވި އެވެ.
ޕީއެންއެފް ރެޖިސްޓަރީ ކުރުމުގެ ހުއްދަ ދީފައި އޮތް ނަމަވެސް އަދި ރަސްމީކޮށް ޕާޓީއެއްގެ ގޮތުގައި ރެޖިސްޓާ ނުވާކަން ފާހަގަ ކުރައްވައި ހަސަން ވިދާޅުވީ ޕާޓީ އުފެއްދުމަށް ބޭނުންވާ ސޮއި ހަމަކޮށް އިލެކްޝަނަށް ހުށަހެޅުމާއި ޕާޓީގެ ފުރަތަމަ އާންމު ޖަލްސާ ބޭއްވުމަށް ވެސް ދުވަސްކޮޅެއް ހޭދަވާނެ ކަމަށެވެ.
"މިސާލަކަށް މިއަންނަ ހަފުތާގައި އެ ބޭފުޅުން ޕާޓީ އުފެއްދުމަށް ބޭނުންވާ އަދަދަށް ފޯމު ހުށަހެޅި ނަމަވެސް އަދި ޕާޓީގެ ފުރަތަމަ އާންމު ޖަލްސާ ބޭއްވުމަށް ވެސް ދެ ހަފުތާއެއްވަރު ނަގާނެ،" ހަސަން ވިދާޅުވި އެވެ.
ކުރީގެ ރައީސް ޔާމީން އިސްކޮށް ހުންނަވައި އުފެއްދުމުގެ މަސައްކަތް ކުރާ ޕީއެންއެފްގެ މުއައްސިސެއްގެ ގޮތުގައި އިލެކްޝަނަށް ނަން ހުށަހަޅުއްވާފައި ވަނީ ޔާމީންގެ ދޮށީ ދަރިކަލުން، ޒޭން އަބްދުﷲ ޔާމީންގެ ނަމުގަ އެވެ. ރައީސް ޔާމީންގެ ތާއީދާއެކު މަޖިލީހަށް ވާދަކުރާ ކެންޑިޑޭޓުންގެ ވޯޓު ކަރުދާހުގައި ޕީއެންއެފްގެ ލޯގޯ ޖަހައިދިނުމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވާ ފަރާތްތަކުން އިއްޔެ ވަނީ އީސީގައި އެދިފަ އެވެ.
ރައީސް ޔާމީން ޕީޕީއެމުން ވަކިވެވަޑައިގެންނެވީ މި ސަރުކާރު ހިންގާ ކޯލިޝަނުގެ ތެރޭގައި އުފެދުނު ހިޔާލު ތަފާތުވުންތަކަށް ފަހު އެވެ. ނަމަވެސް އެމަނިކުފާނުގެ ތާއީދާއެކު މަޖިލީހަށް ވާދަކުރައްވާ ކެންޑިޑޭޓުންގެ ކެންޑިޑެސީ ފޯމުތައް އީސީއަށް ހުށަހެޅީ އަމިއްލަ ގޮތުން ވާދަކުރާ މިނިވަން ކެންޑިޑޭޓުންގެ ގޮތުގަ އެވެ
ޔާމީންގެ ތާއީދާއެކު މަޖިލީހަށް ވާދަކުރައްވާ މެންބަރުންގެ ވޯޓު ކަރުދާހުގައި ޕީއެންއެފްގެ ލޯގޯ ޖެހުމަށް މީގެ ކުރިން ވެސް އެ ޕާޓީ އުފެއްދުމުގެ މަސައްކަތުގައި އިސްކޮށް އުޅުއްވާ ބޭފުޅުން އީސީގައި އެދުނެވެ. ނަމަވެސް ޕީއެންއެފްއަކީ ރެޖިސްޓަރީ ނުވެ އޮތް ޕާޓީއަކަށް ވާތީ އޭރު އިލެކްޝަނުން ނިންމީ ވޯޓު ކަރުދާހުގައި ޕީއެންއެފްގެ ލޯގޯ ބޭނުން ކުރުމުގެ ހުއްދަ ނުދިނުމަށެވެ.
ކުރިއަށް އޮތް މަޖިލިސް އިންތިހާބުގައި ޔާމީންގެ ތާއީދާއެކު 40 ދާއިރާއަކަށް ވާދަ ކުރުމަށް ކެންޑިޑޭޓުން ވަނީ ފޯމު ހުށަހަޅައިފަ އެވެ.
