މި ސަރުކާރުގައި މުވައްޒަފުންނަށް ކުރާ ހަރަދު ބޮޑުވިޔަސް، ތަރައްގީގެ މަޝްރޫއުތަކުގެ ހޭދަ ދަށްވެ، މަޝްރޫއުތައް ހުއްޓިފައިވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
އެމަނިކުފާނު އުފައްދަވާ ސިޔާސީ ޕާޓީ، ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވިދާޅުވީ ޕީޕީއެމް/ޕީއެންސީ އިދިކޮޅުގައި އޮތްއިރު އެންމެ ބޮޑަށް ފާޑުކިޔަމުން ދިޔައީ އެމްޑީޕީ ސަރުކާރުގެ ހަރަދު ބޮޑުވެގެން ކަމަށާއި ނަމަވެސް މި ސަރުކާރުން މުވައްޒަފުންނަށް ކުރާ ހަރަދު މާ ބޮޑަށް އިތުރުވެއްޖެ ކަމަށެވެ.
ފިނޭންސް މިނިސްޓްރީގެ ހިސާބުތަކާ ހަވާލާދީ ނޫހެއްގައި ލިޔެފައިވާ ލިޔުމަކަށް ހަވާލާ ދެއްވައި ޔާމީން ވިދާޅުވީ މި އަހަރުގެ ފުރަތަމަ ދެ މަސް ދުވަހު މުވައްޒަފުންގެ މުސާރަ އާއި އިނާޔަތަށް ކުރި ހަރަދު، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރި މިންވަރަށް ވުރެ 300 މިލިއަން ރުފިޔާ އިތުރުވެފައިވާ ކަމަށެވެ.
"މާނައަކީ ކޮންމެ މަހަކު 150 މިލއަިން ހަމައަކިނި މުވައްޒަފުންގެ ހަރަދާއި އިނާޔާތްތަކަށް ހަރަދު ވެއްޖޭ މި ސަރުކާރުން،" ޔާމީން ވިދާޅުވި އެވެ.
ޔާމީން ވިދާޅުވީ ވަޒީފާ އުފެއްދުމަކީ ސަރުކާރުގެ ވަޒީފާތައް އިތުރުކުރުން ނޫން ކަމަށާއި ވަޒީފާ އުފައްދަން ޖެހޭނީ އިގުތިސޯދީ ހަރަކާތްތައް އިތުރުކޮށްގެން ކަމަށެވެ.
މިދިޔަ އަހަރުގެ ޖެނުއަރީ އަދި ފެބުރުއަރީ މަހު ކުރީ ސަރުކާރުން މުސާރައަށް 1.9 ބިލިއަން ރުފިޔާ ހަރަދުކުރި ނަމަވެސް، މި ސަރުކާރުން މި އަހަރުގެ ފުރަތަމަ ދެ މަސް ތެރޭގައި 2.1 ބިލިއަން ރުފިޔާ މުސާރައަށް ހަރަދު ކޮށްފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު، ދާދި ފަހުން ވިދާޅުވެފައިވެ އެވެ.
މުވައްޒަފުންގެ ހަރަދު ބޮޑުވެގެން ދިޔައިރު، މަދުވެގެން ދިޔައީ ތަރައްގީގެ މަޝްރޫއުތަކުގެ ހޭދަ ކަމަށް ޔާމީން ވިދާޅުވި އެވެ. ކުރީގެ ސަރުކާރުން މަޝްރޫއުތަކަށް ފުރަތަމަ ދެ މަހު 2.7 ބިލިއަން ރުފިޔާ ހާދަކޮށްފައި ވާއިރު، މި ސަރުކާރުން މި ވޭތުވެދިޔަ ދެ މަހު ހޭދަކޮށްފައި ވަނީ އެންމެ ބިލިއަނެއް ކަމަށް ޔާމީން ވިދާޅުވި އެވެ.
"މި ސަރުކާރަށް ކުރެވިފައި އޮތީ އެންމެ އެއްހާސް މިލިއަން (އެއް ބިލިއަން)، އެންމެ އެއްހާސް މިލިއަން. އެއީ ތަންތަނުގައި މަޝްރޫއު ނުހިނގައިގެން އުޅޭ ސަބަބަކީ،" ޔާމީން ވިދާޅުވި އެވެ.
ރާއްޖޭގެ ރަށްރަށުގެ ތަރައްގީއަށް ކުރިއަށް ގެންދާ ހުރިހާ މަޝްރޫއެއް ރައީސް ޑރ. މުއިއްޒުގެ ސަރުކާރުން ހުއްޓާލައިފައިވާ ކަމަށް ކުރީގެ ރައީސް ސޯލިހު ވެސް ވަނީ ވިދާޅުވެފަ އެވެ.
