ރައްޔިތުންގެ މަޖިލީހުގެ މެމްބަރުން މަޖިލީހަށް އިންތިހާބުކުރާ އިރު ތިއްބަވާ ޕާޓީން ވަކިވެވަޑައިގަންނަވައިފި ނަމަ އޮޓަމެޓިކުން މެމްބަރުކަން ގެއްލޭ ގޮތަށް އެންޓި ޑިފެކްޝަން ގާނޫނުގައި އޮތުން ރަނގަޅުނޫން ކަމަށް ދަ ޑިމޮކްރެޓްސްގެ ބައެއް މެމްބަރުުން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި ދަ ޑިމޮކްރެޓްސް ތަމްސީލުކުުރައްވާ ހުރިހާ މެންބަރުުން ވެސް މަޖިލީހަށް އިންތިހާބުުވެވަޑައިގެންނެވީ އެމްޑީޕީގެ މެމްބަރުންގެ ގޮތުގަ އެވެ.
ޕާޓީ ބަދަލުކުރާ މެމްބަރުންގެ ގޮނޑި ގެއްލޭ ގޮތަށް، އެމްޑީޕީގެ ފަރާތުން ރައްޔިތުންގެ މަޖިލީހުގެ ބާރަށުު ދާއިރާގެ މެމްބަރު އަހުމަދު އަބްދުﷲ ހުށަހެޅުުއްވި "އެންޓި ޑިފެކްޝަން ގާނޫނު"ގެ ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި ދަ ޑިމޮކްރެޓްސްގެ ބައެއް މެމްބަރުން ވިދާޅުވީ ޕާޓީއަކުން މެމްބަރަކު ވަކިވާ ކޮންމެ ފަހަރަކުު ގޯހީ ހަމަ އެކަނި މެމްބަރުން ގޯސްވެގެންނެއް ނޫން ކަމަށެވެ.
"އެންޓި ޑިފެކްޝަން ބިލެއްގެ ވާހަކަ ދައްކާ އިރު އަޅުގަނޑަށް ހަމަ އެންމެ މުހިއްމީ އެމްޕީ ރިކޯލް. އެއީ އެންޓި ޑިފެކްޝަން ގައި ވެއްޖިއްޔާ ސިޔާސީ ޕާޓީއެއްގެ ލީޑަރު ނުވަތަ ރައީސަކު ހިތްހަމަނުޖެހުނީމާ މެމްބަރުން ވަކިކޮށްލާފައި ދެން އޭނާގެ ގޮނޑި ވެސް ދުއްވާލަންވީ ރައްޔިތުންގެ މަޖިލީހުން،" ޕާޓީން ވަކިވާ އިރަށް އޮޓޯއިން ގޮނޑި ގެއްލޭ އުސޫލު ކަމުނުދާ ގޮތް ތަފްސީލު ކޮށްދެއްވަމުން ގަލޮޅު އުުުުުުުުތުރު ދާއިރާގެ މެންބަރު އީވާ އަބްދުﷲ މިއަދު ވިދާޅުވި އެވެ.
އޭނާ ވިދާޅުވީ މެމްބަރަކު ޕާޓީ ބަދަލުކުރަންޏާ ނުވަތަ ޕާޓީން ވަކިކުރަންޏާ، އޭނާ މެމްބަރުކަމުގައި ބަހައްޓާނީތޯ ނުވަތަ ނޫންތޯ، އޭނާ އިންތިހާބު ކުރި ރައްޔިތުން ކުރެން އަހަން ޖެހޭނެ ކަމަށެވެ.
"އޭނާ އިންތިހާބުކުރި ރައްޔިތުން އޭނާއަށް ވޯޓުދިން އަސާސްތަކާ ވިސްނުމާ ފިކުރާ މެމްބަރު ހިލާފުވެއްޖެތޯ، އިންތިހާބުކުރި ރައްޔިތުން ކައިރީ އަހައިގެން އެކަން ނިންމަން ޖެހޭނީ، މެންބަރެއްގެ ގޮނޑި ގެއްލުވައިލަން ޖެހޭނީ، އެންމެ މުހިއްމީ އެމްޕީ ރިކޯލް،" އީވާ ވިދާޅުވި އެވެ.
މާފަންނު އުތުރު ދާއިރާގެ ދަ ޑިމޮކްރެޓްސް މެމްބަރު އިމްތިޔާޒް ފަހުމީ ވެސް ވިދާޅުވީ ބައެއް ފަހަރަށް ޕާޓީތަކުން މެމްބަރުން ވަކިކުރަނީ ޕާޓީތަކުގެ ލީޑަރުންނަށް އެގޮތަށް ފެނިވަޑައިގަތުމުން ކަމަށާއި އެ ހާލަތުގައި މަޖިލީހުގެ މެމްބަރުކަން ގެއްލޭ ގޮތަށް އޮތުން ރަނގަޅު ނޫން ކަމަށެވެ.
"އެހެންވީމާ މިހާ ފަސޭހަ ގޮތަކަށް ވެސް އެކަން އޮވެގެން ނުވާނެ، އެއީ ރައްޔިތުންގެ މަޖިލީހުގެ މެމްބަރު ހޮވަނީ ވަކި ޕާޓީއަކަށް ނިސްބަތްނުވާ މީހުން ވެސް ވޯޓުދީގެން, އެހެންވުމާ އެންމެ ރަނގަޅު ގޮތް ކަމަށް ވާނީ އަަޅުގަނޑު ދެކޭ ގޮތުގައި ރައްޔިތުންގެ ގާތުގައި ދެވަނަ ފަހަރަށް އަހައިލުން އޭނާއާ މެދުަގައި އިތުބާރު އެބަ އޮތްތޯ ނެތްތޯ،" އިމްތިޔާޒް ވިދާޅުވި އެވެ.
އޭނާ ވެސް ވިދާޅުވީ އެ ފުރުސަތު ރައްޔިތުންނަށް ދޭން ޖެހޭ ކަމަށެެވެ.
މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި ދަ ޑިމޮކްރެޓްސްގެ ރައީސް ހަސަން ލަތީފު ވިދާޅުވީ ރިކޯލް ވޯޓު ނަގާނެ އުސޫލުތައް އެެންޓިޑިފެކްޝަން ގާނޫނުގައި ހިމަނަން ޖެހޭ ކަމަށެވެ. އޭނާ ވިދާޅުވީ ޕާޓީއަކުން ބޭނުންވާ ކަމެއް މެމްބަރަކު ނުކޮށްގެން އޭނާ ޕާޓީން ވަކިކުރިޔަސް އޭނާ މަޖިލީހުގެ މެންބަރުކަމުގައި ހުރުމާ މެދު ގޮތެއް ނިންމަން ޖެހޭނީ އޭނާއަށް ވޯޓުދިން ރައްޔިތުންނެވެ.
