ރާއްޖޭގެ މަޝްހޫރު މަހުޖަނު އަހުމަދު މޫސާ (އުއްޗު) ގެ ކުންފުނި ޗަމްޕާ ބްރަދާސްއިން ރާއްޖޭގެ ރައްޔިތުންނަށް ހަދިޔާކުރި ކާށި، ފިޔާ އަދި ކަރާ ބެހުމުގެ މަސައްކަތް މިރޭ ފަށާނެ ކަމަށް މާލެ ސިޓީ ކައުންސިލުން ބުނެފި އެވެ.
ސިޓީ ކައުންސިލުން މިއަދު ނެރުނު އިއުލާނެއްގައި ބުނީ މާލޭގައި ޗަމްޕާ ބްރަދާސްއިން ދޭ ކާށި، ފިޔާ އަދި ކަރާ ބެހުމަށް ހަމަޖެހިފައިވަނީ ތައިސޭ ކޮށީގައި ހުންނަ ސިޓީ ކައުންސިލްގެ އާންމު ހިދުމަތާ ބެހޭބައިން ކަމަށެވެ. އަދި ހުޅުމާލެ އުމަރު ޒާހިރު ބިލްޑިންގް އިން ވެސް އެ ތަކެތި ލިބޭނެ ކަމަށް ކައުންސިލުން މައުލޫމާތު ދެ އެވެ.
ސިޓީ ކައުންސިލްގެ އިއުލާނުގައި ބުނެފައިވަނީ އެ ތަކެތި ދޫކުރާނީ މިރޭ 09:00 އިން ފެށިގެން 12:00 އަށް ކަމަށެވެ. މާދަމާ ރޭ ވެސް 09:00 އިން ފެށިގެން 12:00 އަށް މި ތަކެތި ދޫކުރާނެ އެވެ.
ޗަމްޕާ ބްރަދާސްއިން ބެހުމަށް ނިންމާފައިވަނީ 50،000 ކާއްޓާއި، 50 ޓަނު ކަރާ އަދި 10 ޓަނު ފިޔާ އެވެ.
ޗަމްޕާ ބްރަދާސްއިން ހަދިޔާކުރާ ކާށި، ފިޔާ އަދި ކަރާ ބަލާދާއިރު ދިވެހި ރައްޔިތެއްކަން އަންގައިދޭ ކާޑު ގެނައުމަށް ސިޓީ ކައުންސިލުން ވަނީ އަންގާފަ އެވެ.
