މާލެ ސިޓީގެ ރަސްފަންނު ސަރަހައްދުގައި ހަރުކުރި، މާފަންނު މެދު ދާއިރާއަށް ވާދަކުރާ އަމިއްލަ ކެންޑިޑޭޓު އާމިނަތު ހަސަންގެ ބިލްބޯޑެއް ސިޓީ ކައުންސިލްގެ މުވައްޒަފުން ގޮސް ނެގުމުން، އެ ކަމުގެ ކަންބޮޑުވުން އޭނާގެ ކެމްޕެއިން ޓީމުން ފާޅުކޮށްފި އެވެ.
އޭނާގެ ކެމްޕެއިން ޓީމުން ނެރުނު ބަޔާނެއްގައި ބުނާ ގޮތުން، ބިލްބޯޑުތައް ޖެހުމުގެ ހުއްދައަށް މިދިޔަ ފެބްރުއަރީ 18، ގައި ސިޓީ ކައުންސިލްގައި އެދުނެވެ. އަދި ބިލްބޯޑު ޖެހުމުގެ އިއުތިރާޒެއް ނެތް ކަން ސިޓީ ކައުންސިލުން އެންގި ކަމަށް ވެސް އޭގައި ބުނެ އެވެ. އެކަަމަކު ފޯނުގެ ޒަރީއާއިން ކަމަށެވެ.
މާލޭގައި ބިލްބޯޑު ހަރުކުރުމުގައި ޢަމަލުކުރާ އުސޫލު ހިއްސާކޮށްދިނުމަށް އެދި ފެބުރުއަރީ 28، ގައި އޮފީހުން އެދިފައިވާ ކަމަށް ވެސް ބުނެފައިވެ އެވެ. އެކަމަކު މިއަދާ ހަމައަށް ވެސް އެ ސިޓީއަށް ޖަވާބުދީފައި ނުވާ ކަމަށް ބަޔާނުގައިވެ އެވެ.
އިއްޔެ ހެނދުނު، ސިޓީ ކައުންސިލުން އެ ތަކެތި ނެގުމަށް އެންގި ކަމަށް ބަޔާނުގައިވެ އެވެ. ސަބަބެއް ކަމަށް ބުނެފައިވަނީ ބިލްބޯޑު ހުރީ ޕޭވްމަންޓަށް ގެއްލުން ދީގެން ހަރު ކުރުމުން ކަމަށް ބަޔާނުގައިވެ އެވެ. އެކަމަކު ޕޭވްމަންޓަށް ގެއްލުމެއް ނުދޭތީ، އެ ކަން ބަޔާންކޮށް ސިޓީއެއް ތައްޔާރު ކުރަމުން ދިޔަ ކަމަށް ވެސް ބުންޏެވެ.
"ކަމުގެ ހަގީގަތް ބަޔާންކޮށް [ސިޓީ ކައުންސިލްގެ] އީމެއިލްއަށް ޖަވާބު ތައްޔާރު ކުރަމުން ދަނިކޮށް އާންމުންގެ ފަރާތުން މައުލޫމާތު ލިބުނީ ސިޓީ ކައުންސިލްގެ ފަރާތުން ބިލްބޯޑަށް ގެއްލުންދީ އެ ތަކެތި ނައްތާލާމުންދާ ކަމަށް،" އޭނާގެ ކެމްޕެއިން ޓީމުން ނެރުނު ބަޔާނުގައިވެ އެވެ.
މާލެ ސިޓީ ކައުންސިލްގެ އެ ސުވާލު ކުރުމުން، މީޑިއާ އޮފިޝަލް އާމިނަތު ޝަތުފާ "އަދަދު" ނޫހަށް ވިދާޅުވީ ރަސްފަންނު ސަރަހައްދުގައި އެ ބިލްބޯޑު ހަރުކުރީ ސިޓީ ކައުންސިލްގެ ހުއްދަ ނުނަގާ ކަމަށެވެ. އަދި އެއީ ވެސް މާލެ ސަރަހައްދުގައި ބިލްބޯޑު ހަރުކުރަން ސިޓީ ކައުންސިލުން ހުއްދަދޭ ސައިޒަށް ވުރެ ބޮޑުކޮށް ކަމަށެވެ.
"ހުއްދަ ނުނަގާ، އަދި ހުއްދަދޭ ސައިޒަށް ވުރެ ބޮޑު ބިލްބޯޑެއް ބެހެއްޓުމުން ސިޓީ ކައުންސިލުން އެންގިން، އިއްޔެ މެންދުރު 12:00 ގެ ކުރިއަށް ނަގަން، ނުނަގާ ބެހެއްޓުމުން އިއްޔެ ހަވީރު ސުޕަވައިޒަރުގެ އިރުޝާދާއެކު ބިލްބޯޑު ނެގީ،" ޝަތުފާ ވިދާޅުވި އެވެ.
ސިޓީ ކައުންސިލުން ބުނީ ސިޔާސީ ޕާޓީތަކާއި އަމިއްލަ އެހެން ކެންޑިޑޭޓުން ވެސް ހުއްދަ ނަގައިގެން ބިލްބޯޑުތައް، މާލެ ސަރަހައްދުގެ އެކި ތަންތަނުގައި ބަހައްޓާފައިވާ ކަމަށާއި އެއްވެސް ކެންޑިޑޭޓެއްގެ ކެމްޕެއިނަށް ހުރަސް އަޅާނެ ކަމަށް އެ ކައުންސިލުން ނުކުރާނެ ކަމަށެވެ.
އާމިނަތުގެ ހަސަންގެ ކެމްޕެއިން ޓީމުން ނެރުނު ބަޔާނުގައި ބިލްބޯޑު ނެގުމުން ވަރަށް ބޮޑަށް ސިޓީ ކައުންސިލަށް ފާޑުކިޔައިފައިވެ އެވެ. އެ ކައުންސިލްގެ އަމަލަކީ، "މިނިވަން" އަމިއްލަ ކެންޑިޑޭޓެއްގެ ކެމްޕެއިނަށް ހުރަސް އަޅަން ހިންގި އަމަލެއް ގޮތަށް ސިފަކޮށްފައިވެ އެވެ. އަދި އެ ޓީމުން ބުނާ ގޮތުގައި އެ ސައިޒުގެ އެހެން ބިލްބޯޑުތައް ވެސް އެބަ ހުރި ކަމަށާއި، އެހެންވިޔަސް ބިލްބޯޑު ނެގީ އެހެން ބޭނުމަކު ކަމަށް ގަބޫލު ކުރާ ކަމަށެވެ.
