ރިޝްވަތާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް އިއްވާފައިވިޔަސް މި ވަގުތު ރަށު ބަންދުގައި ހުންނެވި ކުރީގެ ރައީސް އަބްދުالله ޔާމީން އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) އިން ތާއިދުކުރާ ކެންޑިޑޭޓެއްގެ ކެމްޕޭން ހަރަކާތެއްގައި ބައިވެރިވެވަޑައިގަންނަވައިފި އެވެ.
ޕީއެންއެފް މިހާތަނަށް ރެޖިސްޓްރީ ކޮށްފައި ނުވި ނަމަވެސް އެ ޕާޓީގެ ތާއިދާއެކު މަޖިލީހުގެ އިންތިހާބަށް ގިނަ ކެންޑިޑޭޓުންތަކެއް ނެރެ އެވެ. އޭގެ ތެރެއިން ހުޅުމާލޭ އުތުރު ދާއިރާއަށް ވާދަކުރައްވާ އަހްމަދު ލަތީފްގެ ކެމްޕޭން ޖަގަހަ މިރޭ ވަނީ ރަސްމީކޮށް ހުޅުވާފަ އެވެ.
އެ ހަރަކާތުގައި ޔާމީން ބައިވެރިވެވަޑައިގެންނެވި އެވެ. އަރިހުގައި އެމަނިކުފާނުގެ ނައިބު ރައީސްކަން ކުރެއްވި ޑރ. މުހައްމަދު ޖަމީލު އަހުމަދާއި ދަރިކަލުން އަދި ޕީއެންއެފްގެ އެއް މުއައްސިސް ޒޭން އަބްދުالله ޔާމީން ތިއްބެވި އެވެ.
ޔާމީން އެ ސަރަހައްދަށް ވަޑައިގަންނަވާތީ މަރުހަބާ ދެންނެވުމަށް އެ ޖަގަހަ ކައިރިއަށް ޖަމާވެ ތިބި ސަޕޯޓަރުންނާ ޔާމީން ސަލާމް ކުރައްވައި ވާހަކަ ދައްކަވާ ހެއްދެވި މަންޒަރު އެތަނުގައި ތިބި "އަދަދު" ގެ ނޫސްވެރިންނަށް ވަނީ ފެނިފަ އެވެ.
މި ހަރަކާތުގައި ޔާމީން ވާހަކަ ނުދެއްކެވި ނަމަވެސް އެހެން ބައެއް ބޭފުޅުން ވާހަކަ ދެއްކެވި އެވެ. އެގޮތުން, ޑރ. ޖަމީލްގެ ވާހަކައިގައި ޖުޑީޝަރީ އާއި މި ސަރުކާރަށް ފާޑުވިދާޅުވި އެވެ.
ރަށުބަންދުގައި ހުންނެވި ޔާމީން މާލޭގައި އޮންނަ ޕީއެންއެފްގެ އޮފީސް ޖަލްސާތަކުގައި ބައިވެރިވެވަޑައިގަންނަވަ އެވެ. ޕޯޑިއަމްގައި ރަސްމީކޮށް ވާހަކަ ނުދެއްކެވި ނަމަވެސް ހާޒިރީންގެ ތެރޭގައި އިންނަވައި، ޕޯޑިއަމްގައި ވާހަކަ ދައްކަވާ ބޭފުޅުންނާ ސުވާލު އަމާޒުކުރައްވަ އެވެ.
އެ ސުވާލުތަކުގެ ތެރެއިން ޔާމީން ގެންދަވަނީ މި ސަރުކާރުގެ ސިޔާސަތުތަކަށް ފާޑުވިދާޅުވަމުންނެވެ. އަދި, އާ ޕާޓީ, ޕީއެންއެފަށް މެމްބަރުން އިތުރުކުރެއްވުމަށް ގެންދަވަނީ މަސައްކަތް ކުރައްވަމުންނެވެ.
ސިޔާސީ ހަރަކާތްތަކުގައި ބައިވެރިވުމުގެ ފުރިހަމަ ލުއި މިހާތަނަށް ޔާމީނަށް ދީފައި ނުވާއިރު މިފަދަ ހަރަކާތްތަކުގައި ބައިވެރިވެގެން މިހާތަނަށް އެމަނިކުފާނަށް ފިޔަވަޅު އަޅާފައި ނުވެ އެވެ. އެކަމުގައި ކަރެކްޝަނުގެ ސީދާ ޖަވާބެއް ނެތެވެ.
އެ މަނިކުފާނު މިނިވަން ކުރާނެ ކަމުގެ ވައުދާއެކު މިހާރުގެ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަް ފަހު، އެކަންކަން ލަސްކުރައްވާތީ ޔާމީން ވަނީ ފާޑުވިދާޅުވެފަ އެވެ.
