ރޯދަ މަހުގެ ބައެއް ގަޑިތަކުގައި މުދާ އުފުލާ އުޅަނދުތައް ދުއްވުން ސަރުކާރުން މަނާ ކޮށްފި އެވެ.
ފުލުހުން ބުނީ, ރޯދަ މަހުގެ ފުރަތަމަ 19 ދުވަހުގެ ހެނދުނު 6:00 އިން 9:30 އާ ހަމައަށް އަދި ހަވީރު 4:30 އިން ރޭގަނޑު 8:00 އާ ހަމައަށް އެއްވެސް މުދާ އުފުލާ ބާވަތެއްގެ އުޅަނދެއް ގްރޭޓާ މާލެ ސަަރަހައްދުގައި ދުއްވުން މަނާވާނެ ކަމަށެވެ.
އަދި ރޯދަ މަހު 20 އިން ފެށިގެން ރޯދަ މަސް ނިމެންދެން މުދަ އުފުލާ އުޅަނދުތައް ދުއްވުން މަނާ ވާނީ ހަމައެކަނި ހަވީރު 4:30 އިން ރޭގަނޑު 8:00 އާ ހަމައަށް ކަމަށް ވެސް ފުލުހުން ބުނެ އެވެ.
ފުލުހުން ބުނީ, ރޯދަ މަހުގެ ފުރަތަމަ 19 ދުވަހުގެ ތެރެއިން ރަސްމީ ދުވަސްތަކު ހެނދުނު 9:30 އިން ފެށިގެން ހަވީރު 4:30 އާ ހަމައަށް ހުރިހާ ބާވަތެއްގެ އުޅަނދު ދުއްވުމުގެ ފުރުސަތު އޮންނާނެ ކަމަށެވެ. އަދި ރޯދަ މަހު 20 އިން ފެށިގެން ރޯދަ މަސް ނިމެންދެން ހެނދުނު 6:00 އިން 4:30 އާ ހަމައަށް ހުރިހާ ބާވަތެއްގެ އުޅަނދު ދުއްވޭނެ ކަމަށެވެ.
މުދާ އުފުލާ އުޅަނދުތައް ދުއްވުމުގެ ހުއްދަ ދެނީ, ރަސްމީ ދުވަސްތަކުގެ ހެނދުނު ސްކޫލުތަކާއި އޮފީސްތަކަށް ދާ ވަގުތު ފަހަނައެޅުމުންނެވެ. އަދި އިރުއޮއްސޭ ވަގުތާއި, ތަރާވީސް ނަމާދުގެ ވަގުތު އެ އުޅަނދުތައް ދުއްވުން މަނާ ކުރީ މަގުމަތީގައި ބާރު ބޮޑުވާނެތީ އެވެ.
