މިނިވަން މުއައްސަސާތަކަށް މިނިވަންކަމާއެކު މަސައްކަތް ކުރުމަށް އޮތް ފުރުސަތު ހަނިވާން ފަށައިފި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
މަޖިލިސް އިންތިހާބުގައި މާފަންނު ހުޅަނގު ދާއިރާއަށް ވާދަކުރައްވާ އެ ދާއިރާގެ މިހާރުގެ މެމްބަރު މުހައްމަދު ފަލާހުގެ ކެމްޕޭނު އިވެންޓުގައި ވާހަކަ ދައްކަވަމުން ސޯލިހު ވިދާޅުވީ ސަރުކާރު ހަމަ މަގުން ނެއްޓިގެންދާއިރު، މުއައްސަސާތަކަށް އޭގެ ޒާތުގައި ގާނޫނު އަސާސީން ކަށަވަރުކޮށްދީފައިވާ އޮތް މިނިވަންކަމާއެކު މަސައްކަތް ކުރުމުގެ ފުރުސަތު ވ ެސް ހަނިވާން ފަށާފައިވާ ކަމަށެވެ.
އެގޮތުން އިލެކްޝަންސް ކޮމިޝަނުގެ މައްޗަށް ސަރުކާރުން ނުފޫޒު ފޯރުވަން މަސައްކަތް ކުރަމުންދާ ކަމަށާއި ގޯއްޗާއި ފްލެޓު ކަންތަކުގައި އޭސީސީގެ މައްޗަށް ވެސް ސަރުކާރުން ބާރު ފޯރުވާފައިވާ ކަމަށް ސޯލިހު ވިދާޅުވި އެވެ.
"އެމްޑީޕީއަށް މަޖިލީހުގެ މެޖޯރިޓީ މުހިންމުވަނީ މިފަދަ ނުފޫޒުތައް ސަރުކާރުން މިނިވަން މުއައްސަސާތަކަށް ފޯރުވާތީ،" ސޯލިހު ވިދާޅުވި އެވެ.
ސޯލިހު ވިދާޅުވީ ކުރިއަށް އޮތް މަޖިލިސް އިންތިހާބުގައި ރާއްޖޭގެ ކަންކޮޅުތަކުން ފެންނަ މަންޒަރަކީ ކުރީގައި ހެދުނު ގޯސް ރަނގަޅު ކުރަން ބޭނުންވެފައި ތިބި މަންޒަރު ކަމަށާއި މަޖިލީހުގެ މެޖޯރިޓީ އެމްޑީޕީން ހޯދައި މި ސަރުކާރު ހަމަ މަގަށް އަޅުވާނެ ކަމަށެވެ.
އޭގެ އިތުރުން މަޖިލީހުގެ މެޖޯރިޓީ ބޭނުންވަނީ ސަރުކާރަށް އުނދަގޫކޮށް ޖެއްސުން ކުރަން ނޫންކަން ފާހަގަ ކުރައްވައި ސޯލިހު ވިދާޅުވީ، އެމްޑީޕީގެ ވިސްނުމަކީ ރައްޔިތުންނާ ގާތުން ރައްޔިތުންގެ އަޑު އަހައި، ރައްޔިތުން ބޭނުންވާ ގޮތަށް މަސައްކަތް ކުރުން ކަމަށެވެ.
