ސިޔާސީ މައިދާނުގައި މިހާރު ހުރި ހިސާބަށް އާދެވުނީ ބުރަ މަސައްކަތްތަކެއް ކޮށްގެން ކަމަށާއި އެއީ ބޭރުން ޕްރޮފަސަރެއް ގެނެސްގެން ހެދި ޕީއެޗްޑީއެއްގެ ސަބަބުން އާދެވުނު ހިސާބެއް ނޫން ކަމަށް ރައީސް އޮފީހުގެ ސީނިއާ މިނިސްޓަރެއްގެ މަގާމުގައި ހުންނެވި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޗެއާމަން އަބްދުއްރަހީމް އަބްދުالله ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒުގެ އަރިހުގައި މިއަދު ކ. ގުރައިދޫއަށް ވަޑައިގެން އެ ރަށުގައި ބޭއްވި ޖަލްސާގައި އަބްދުއްރަހީމް ވަނީ ވަކި ބޭފުޅެއްގެ ނަން ވިދާޅު ނުވެ ސިޔާސީ ބަހުގެ ހަމަލާތަކެއް ދެއްވާފަ އެވެ. ބެލެވޭ ގޮތުގައި މިއަދު ނުސީދާކޮށް އޭނާ ފާޑުވިދާޅުވީ ޕީޕީއެމްގެ ފުރަތަމަ ވެރިކަމުގައި ނައިބު ރައީސްކަން ކުރެއްވި ޑރ. މުހައްމަދު ޖަމީލު އަހުމަދަށެވެ.
"އަޅުގަނޑުމެން ލައްކަ މަސައްކަތް ކޮށްގެން މިހިސާބަށް އައިސް މިތިބީ. އަޅުގަނޑުމެން މިހާ ހިސާބަށް އައީކީ އަޅުގަނޑުމެން އޮފީހުގައި ތިބެގެން ބޭރުން ޕްރޮފެސަރެއް ގެނެސްގެން ހެދި ޕީއެޗްޑީއެއްގެ ސަބަބަކުންނެއް ނޫން," ވަރަށް ފޯރީގައި އަބްދުއްރަހީމް ވިދާޅުވި އެވެ.
"ދައުލަތުން ވަޒީރު ކަމުގެ މަގާމު ދިނީމާ ވަޒީރުކަމުގެ ކޮޓަރީގައި އިންނަވައިގެން ބޭރުން މީހުން ގެނެސްގެން ތީސިސް ލިޔެގެނެއް ނޫން އަޅުގަނޑުމެން މިހިސާބަށް އައިކީއެއް. މިހިސާބަށް އައީ ބުރަ މަސައްކަތް ކޮށްގެން."
ސިޔާސީ ގޮތުން ރާއްޖޭގައި އެންމެ ދުރު ފެންނާނީ ސަރުކާރުގައި މި ވަގުތު ތިއްބެވި ބޭފުޅުންނަށް ކަމަށާއި ފާޑުވިދާޅުވާ ބޭފުޅުންނަށް އެ ބޭފުޅުންނާ ހަމައަށް ނާދެވޭނެ ކަމަށް ގޮންޖައްސަވައި އަބްދުއްރަހީމް ވިދާޅުވި އެވެ.
"ބިނާކުރަން މި އުޅޭ ރާއްޖެ 10 އަހަރުން ބިނާ ކުރާނަން. އަޅުގަނޑުމެން އަމާޒު ހިފާފައި މިހުރީ ހިތްދަތިވާ ބަޔަކު ހިތްދަތިވިޔަސް 10 އަހަރު ރައީސް މުއިއްޒުއަށް މި ގައުމުގެ ވެރިކަން ކުރަން ފުރުސަތު ދޭން. ފަސް އަހަރު ދުވަހުން މިއަދު ވެއްޓީފައި މިއޮތް އަނދަވަޅަކުން މި ގައުމެއް ނުނެގޭނެ," އޭނާ ވިދާޅުވި އެވެ.
ރައީސް މުއިއްޒުގެ މަސައްކަތްތައް މިހާރު ބައްޓަން ކުރައްވާފައިވާ ގޮތުން އެމަނިކުފާނަށް ދެވަނަ ދައުރެެއް ދިނުމަށް ރައްޔިތުން އެދޭނެ ކަމަށް ވެސް އޭނާ ވިދާޅުވި އެވެ.
