ރައްޔިތުންގެ މަޖިލީހުގެ ޖަލްސާތައް އާއްމު އުސޫލުން ހަފުތާއަކު ތިން ދުވަހު ބާއްވަމުން އައި އައުން ހުއްޓާލައި ޖަލްސާތައް މަދުކޮށްލުމުން ވެސް މިއަދުގެ ޖަލްސާ ފަށާ ގަޑި ޖެހުނު އިރު، ކޯރަމް ހަމަ ނުވެގެން ލަސްކުރަން ޖެހިއްޖެ އެވެ.
މިއަދުގެ ޖަލްސާ ފެށުން 9:30 އަށް ލަސްކުރެއްވިކަން އިއުލާނުކުރައްވަމުން، އެވަގުތު ރިޔާސަތުގައި އިންނެވި ހަނިމާދޫ ދާއިރާގެ އެމްޑީޕީ މެމްބަރު އަބްދުލް ޣަފޫރު މޫސާ ވިދާޅުވީ އެވަގުތު މަޖިލީހަށް ވަޑައިގެން ތިއްބެވީ 11 މެމްބަރުން ކަމަށެވެ. އެއީ ޖަލްސާއެއް ފެށުމަށް ހަމަކުރަން ޖެހޭ ގާނޫނީ އަދަދުގެ ދެބައިކުޅަ އެއް ބައެވެ. މަޖިލީހުގައި 87 މެމްބަރުން ތިއްބަވާ އިރު ޖަލްސާއެއް ފެށޭނީ އެންމެ މަދުވެގެން 22 މެމްބަރުން ތިއްބަވައިގެންނެވެ.
މިއަދުގެ ޖަލްސާގެ ރިޔާސަތު ޣަފޫރު ބަލަހައްޓަވަން ޖެހިވަޑައިގެންނެވީ މަޖިލީހުގެ ރައީސް މުހައްމަދު އަސްލަމާއި ނައިބު ރައީސް އަހުމަދު ސަލީމު ވެސްް މާލޭގައި ވަޑައިގެން ނޫޅުއްވާތީ އެވެ.
ރައްޔިތުންގެ މަޖިލީހުގެ ޖަލްސާތައް ގަވާއިދުން ނުބާއްވާތީ ދަ ޑިމޮކްރެޓްސްގެ ރައީސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވަނީ ޖަލްސާތައް ބޭއްވުމަށް ގޮވައިލައި މައްސަލައެއް ވެސް ހުށަހަޅުއްވައިފަ އެވެ.
ކޮންމެ ހަފްތާއެއްގެ ތިން ދުވަހު ޖަލްސާ ބާއްވަން ގާނޫނު ލާޒިމުކުރާ ކަމަށާއި ނިންމަންޖެހޭ މުހިއްމު މައްސަލަތަކެއް ހުރި ކަމަށް ކަންބޮޑުވުން ފާޅުކުރައްވައި ހަސަން ލަތީފު އެކްސްގައި ކުރެއްވި ޕޯސްޓެއްގައިވެ އެވެ.
"ރައްޔިތުންނާ ދިވެހި ދައުލަތުގެ މަސްލަހަތާ ގުޅުންހުރި އަދި ގާނޫނުއަސާސީން ރައްޔިތުންގެ މަޖިލީހާ މަތިކޮށްފައިވާ ދުސްތޫރީ ޒިންމާތަކާ ގުޅުންހުރި އެތައް މަސައްކަތްތަކެއް މިހާރުވެސް ކުރަން ހުރި އިރު، މަޖިލީހުގެ ޖަލްސާތައް ހުއްޓުވާލެވިފައިވުމަކީ ނުހަނު ބޮޑު ގެއްލުމެއް ވާނެ ކަމެއް،" މަޖިލީހުގައި ތިންވަނައަށް އެންމެ މެންބަރުން ގިނަ ޕާޓީގެ ރައީސް، ހަސަން ލަތީފު ހުށަހެޅުއްވި މައްސަލައިގައި ވިދާޅުވި އެވެ.
