ރައްޔިތުންގެ މަޖިލިސް އިންތިހާބުގެ ކެމްޕޭނަށް ކުރީގެ ރައީސް އަދި އެމްޑީޕީގެ އެޑްވައިޒަރު އިބްރާހިމް މުހައްމަދު ސޯލިހު ބ.އަތޮޅަށް ވަޑައިގެންފި އެވެ.
މަޖިލިސް އިންތިހާބުގެ ކެމްޕެއިނުގެ އެމްޑީޕީގެ ތަރުޖަމާނު ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވީ ސޯލިހު މިވަގުތު ހުންނެވީ ބ.ދަރަވަންދޫގައި ކަމަށާއި، އެ ރަށުގައި ދޮރުން ދޮރަށް ހިންގެވުމަށްފަހު ދެން ވަޑައިގަންނަވާނީ ކެންދޫއަށް ކަމަށެވެ.
ކެންދޫގައި ކެމްޕޭނު ބައްދަލުވުމުގައި ބައިވެރިވުމަށްފަހު ސޯލިހު މާދަމާ ތުޅާދޫއަށް ވަޑައިގަންނަވާނެ ކަމަށާއި، މި ދަތުރުފުޅުގައި ރ.އަތޮޅު އަދި ނ.އަތޮޅުގެ ބައެއް ރަށްތަކަށް ވަޑައިގަންނަވާނެ ކަމަށް އީސަ ވިދާޅުވި އެވެ.
"ސޯލިހު ކެމްޕޭނު ޓީމުތަކާ ބައްދަލު ކުރައްވައި އަމަލީ ގޮތުން ކެމްޕޭނުގައި ހަރަކާތްތެރިވާނެ. ދޮރުން ދޮރަށް ހިންގަވައި އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް މަސައްކަތް ކުރައްވާނެ" އީސަ ވިދާޅުވި އެވެ.
ރައީސް ޑރ.މުހައްމަދު މުއިއްޒު ރަސްމީ ދަތުރުފުޅެއްގައި ބ އަދި ރ އަތޮޅަށް ކުރައްވާ ދަތުރުފުޅެއްގައި ފުރާވަޑައިގެންފައިވާއިރު، ސޯލިހު ބ.އަތޮޅަށް ވަޑައިގެންނެވީ ރައީސް މުއިއްޒު ފުރާވަޑައިގަތުމުގެ ކުރިންނެވެ.
އީސަ ވިދާޅުވީ ރައީސް މުއިއްޒުގެ ދަތުރުފުޅާ ގުޅޭ މައުލޫމާތު ލިބުނީ ފުރަން އެއާޕޯޓުގައި ތިއްބާ ކަމަށެވެ.
އެގޮތުން ހުރިހާ ކަމެއް ރާވާފައި ހުރުމުން ސޯލިހުގެ ދަތުރުފުޅު ބަދަލު ނުކުރެވުނީ ކަމަށާއި، ނަމަވެސް ހަރަކާތްތައް ކުރިޔަށްގެންދާނީ ރައީސް މުއިއްޒުގެ ދަތުރުފުޅަށް ބުރޫ ނާރާ ގޮތަށް ކަމަށް އީސަ ވިދާޅުވި އެވެ.
"ދަތުރުތައް މިގޮތަށް އޯވާލެޕް ނުވާ ގޮތަށް ރޭވުމަށް އެންމެ ފަސޭހަވާނީ ރައީސް މުއިއްޒުއަށް. އެމަނިކުފާނަށް އެނގޭނެ ސޯލިހު އެއްވެސް ތަނަކަށް ދާނަމަ. ހުރިހާ ކަމެއް ރާވާފައި ހުރުމުން ދަތުރު އިތުރު ގޮތަކަށް ބަދަލު ނުކުރެވުނީ. އަޅުގަނޑުމެން ހުރީ މާ ކުރިން އެރޭޖްމަންޓްތައް ހަދާ ނިންމާފައި" އީސަ ވިދާޅުވި އެވެ.
ސޯލިހު ކުރައްވާ ކެމްޕޭނު ދަތުރުފުޅަށްފަހު އަންގާރަ ދުވަހު މާލެ ވަޑައިގަތުމަށް ހަމަޖެހިފައިވާއިރު، ރައީސް މުއިއްޒު މިއަދު ފެއްޓެވި ރަސްމީ ދަތުރުފުޅަކީ ތިން ދުވަހުގެ ދަތުރުފުޅެކެވެ.
