އިދިކޮޅު އެމްޑީޕީގެ އެންމެ އިސް މަގާމު، އެ ޕާޓީގެ ރައީސް ކަމަށް ކުރިމަތިނުލި ނަމަވެސް އެ ޕާޓީގެ ލީޑާޝިޕުގައި ދެމިހުންނަވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
އަންނަ ރައްޔިތުންގެ މަޖިލީހުގެ އިންތިހާބަށް އެމްޑީޕީގެ ކެމްޕެއިން ލޯންޗު ކުރަން ބޭއްވި އިވެންޓުގައި އެމަނިކުފާނު ވިދާޅުވީ ޕާޓީގެ ރައީސްގެ މަގާމު ދޫކޮށްލެއްވީ ވީހާ ވެސް ގިނަ ބަޔަކު އެ ޕާޓީގެ ލީޑާޝިޕްގައި ތިބެގެން ޕާޓީ ހިންގަން ބޭނުންފުޅުވާތީ ކަމަށެވެ.
ޕާޓީގެ ރައީސް ކަމަށް ހުޅުވާލި ފުރުސަތުގައި ކުރިމަތިލެއްވީ އެމަނިކުފާނުގެ ވެރިކަމުގައި ފޮރިން މިނިސްޓަރުގެ މަގާމު ފުރުއްވި އަބްދުﷲ ޝާހިދު އެކަންޏެވެ.
"ޕާޓީގެ ގިނަ ބަޔަކު ލީޑާޝިޕުގައި ތިބެގެން، އެކީގައި މަސައްކަތް ކުރެވޭނެ މާހައުލެއް އަނެއްކާ ވެސް ހޯދަން ޖެހިއްޖެ، އަޅުގަނޑުމެންގެ އާ ރައީސް އަޅުގަނޑުމެންނާ ގުޅިވަޑައިގަތުމުން އަނެއްކާ ވެސް އާ ހިތްވަރެއް ލިބުނު،" ޝާހިދު ވެސް އިންނެވި ޖަލްސާގައި ސޯލިހު ވިދާޅުވި އެވެ.
ސޯލިހު ވިދާޅުވީ އެމްޑީޕީން ދުރަށް ވަޑައިގަތުމުގެ ވިސްނެވުން އަދި އެމަނިކުފާނުގެ ނެތް ކަމަށެވެ.
"އެމްޑީޕީގައި އަޅުގަނޑު ހުންނާނަން، ލީޑާޝިޕުގައި އަޅުގަނޑު ހުންނާނަން، މި ޕާޓީއަށް ކުރިމަތިވާ ކޮންމެ ދަތި އުނދަގޫ މިފަދަ ދަނޑިވަޅުތަކުގައި، އަނެއްކާ ވެސް ޕާޓީގެ ސަފުތައް ތަރުތީބު ކުރަން، އަޅުގަނޑަށް ކުރެވެން ހުރި މަސައްކަތެއް އިރާދަކުރެއްވިއްޔާ ކުރާނަން،" އެމަނިކުފާނު ވިދާޅުވި އެވެ.
މަޖިލިސް އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓުންނަށް ވެސް އެމަނިކުފާނު އިލްތިމާސް ކުރެއްވީ ޕާޓީގައި ދެމިތިބުމަށެވެ. އިންތިހާބު ކާމިޔާބުވެ ގޮނޑި ލިބިއްޖެނަމަ އެމްޑީޕީގައި ދެމިހުރެ ރައްޔިތުންގެ ހައްގުތަކަށް އިހުތިރާމު ކުރުމަށް ވެސް އިލްތިމާސް ކުރެއްވި އެވެ.
"އެމްޑީޕީ ގަބޫލު ކުރާ ހަމަތަކެއް އެބަ އޮތް، އާންމު މެންބަރުން ބޭނުންވާ ކަންކަން އެބަ ހުރި، ހިޔާލު ފާޅުކުރުމުގެ މިނިވަން ކަމަށް ބުރޫއު އަރައިގެން ނުވާނެ، އެ ކަމަށް ހުރަސް އަޅާނެ ބިލަކަށް ވޯޓު ދީގެން ނުވާނެ، ޕާޓީ ދޫކޮށް ނުދާނެ ކަމުގެ ޔަގީންކަން އަޅުގަނޑުމެންނަށް ދެއްވަން ވާނެ،" ސޯލިހު ވިދާޅުވި އެވެ.
މިރޭ ބޭއްވި އިވެންޓުގައި، އެމްޑީޕީގެ 89 ކެންޑިޑޭޓުން ވަނީ އެ ޕާޓީ ދޫކޮށް ނުދާނެ ކަމަށް ހުވާކޮށްފަ އެވެ. މި ވަގުތު އެމްޑީޕީގެ ފަރާތުން ވަނީ ދައުރުގެ މެދު ތެރެއިން އިންތިހާބުވާ ޕާޓީ ދޫކޮށްދާނަމަ ގޮނޑި ގެއްލޭ ގޮތަށް އެންޓި-ޑިފެކްޝަން ބިލެއް ވެސް ހުށަހަޅައިފަ އެވެ.
އެމްޑީޕީގެ އަސާސީ ގަވާއިދު ބުނާ ގޮތުން އެ ޕާޓީގެ ބޭފުޅަކު ރައީސުލްޖުމްހޫރިއްޔާގެ މަގާމުގައި ހުންނަވާއިރު އެ ޕާޓީގެ އެންމެ އިސް ލީޑަރަކީ އެ ބޭފުޅެކެވެ. ސޯލިހުގެ ވެރިކަމުގައި، ޕާޓީގެ އެންމެ އިސް ލީޑަރަކަށް ހުންނެވީ އެމަނިކުފާނެވެ.
ރިޔާސީ އިންތިހާބުގައި ސޯލިހަށް ލިބިވަޑައިގަތް ނާކާމިޔާބީއަށް ފަހު، ސޯލިހު ވަނީ ޕާޓީގެ ވަގުތީ ރައީސެއްގެ ގޮތުގައި ވެސް މަސައްކަތް ކުރައްވައިފަ އެވެ. ޕާޓީގެ ރައީސް މަގާމުގައި ކުރިން ހުންނެވި ކުރީގެ ރައީސް މުހައްމަދު ޕާޓީން ވަކިވެވަޑައިގަތީ، ރިޔާސީ ޕްރައިމަރީގައި އެމަނިކުފާނަށް ލިބިވަޑައިގަތް ނާކާމިބީއަށް ފަހު އެވެ.
