ރައްޔިތުންގެ މަޖިލީހުގެ ރުހުން ނެތް ވަޒީރުން ތިއްބަވައިގެން ސަރުކާރުން ދަނީ ނަހަމަ ގޮތުގައި ބާރުގެ ބޭނުންކޮށް، ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ނުފޫޒު ފޯރުވަމުން ކަމަށް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މިއަދު ތުހުމަތުކޮށްފި އެވެ.
ސަރުކާރުގެ ފަރާތުން އެ ޕާޓީ ކަންބޮޑުވާ އެތަކެއް ކަމެއް މިހާރު ފެންނަން ފަށާފައިވާ ކަމަށާއި އެ ކަންކަމާ މެދު ރާއްޖޭގެ ރައްޔިތުން ވިސްނާވަޑައިގަތުމަށް އެދޭ ކަމަށް އެމްޑީޕީގެ މަޖިލިސް އިންތިހާބުގެ ކެމްޕެއިން ސްޕޯކްސްޕާސަން އަހުމަދު އީސާ މިއަދު ނޫސްވެރިންގެ ބައްދަލުވުމެއްގައި ވިދާޅުވި އެވެ. އެގޮތުން, "ދޮގު ހެދުމާއި އޮޅުވާލުން ހައްދުފަހަނައަޅާފައި" ވާ ކަމަށް އޭނާ ވިދާޅުވި އެވެ.
"މަޖިލީހުގެ ބާރުތަކަށް އިހުތިރާމު ކުރުން ހުއްޓާލައިފި. މަޖިލީހުގެ ނިންމުންތަކަށް ގޮންޖައްސަވައި, މަޖިލީހުން ފާސްކުރާ ބިލުތައް ގާނޫނަށް ވިޔަ ނުދީ ހިފަހައްޓާލައިފި. މަޖިލީހުގެ ކޮންމެ ނިންމުމެއް ހިއްޕަވައިގެން ކޯޓުތަކަށް ވަޑައިގަންނަވަން ފައްޓަވައިފި," އެމްޑީޕީގެ ކަންބޮޑުވުންތައް ހިއްސާކުރައްވަމުން އީސާ ވިދާޅުވި އެވެ.
ކުރިއަށް އޮތް މަޖިލިސް އިންތިހާބު ކާމިޔާބު ކުރުމަށް ސަރުކާރުން ނަހަމަ ނުފޫޒު ފޯރުވަމުންދާ ކަމަށް ވިދާޅުވެ އީސާ ވަނީ ވަޒީފާތަކުގައި ތިބި ރައްޔިތުންނަށް ބިރު ދައްކާ ކަމުގެ ތުހުމަތު ކުރައްވާފަ އެވެ.
"ސަރުކާރުން އިންތިހާބަށް, ރައްޔިތުން އިންތިހާބު ކުރި ރައްޔިތުންގެ މަޖިލީހުގެ މެމްބަރުން ރުހުން ނެތް ވަޒީރުން ތިއްބަވައިގެން ސަރުކާރުގެ ބާރުތައް ނަހަމަ ގޮތުގައި އިންތިހާބަށް ބޭނުން ކުރައްވަން ފައްޓަވައިފި. ކުންފުނިތަކުގެ ރަސްމީ ސޯޝަލް މީޑިއާ އެކައުންޓުތައް ބޭނުންކޮށްގެން ޕީއެންސީ ކެންޑިޑޭޓުން ޕްރޮމޯޓް ކުރަން ވަނީ ފައްޓަވާފައި," އީސާ ވިދާޅުވި އެވެ.
އެ ނޫސްވެރިންގެ ބައްދަލުވުން ބޭއްވިއިރު އިންތިހާބާ ބެހޭ ގާނޫނަށް ގެނެސްފައިވާ އިސްލާހު ރައީސް ތަސްދީގުނުކުރައްވަ އެވެ. އެމްޑީޕީގެ ބައްދަލުވުމުގެ ފަހުން ސަރުކާރުން ވަނީ އެ ބިލު އަނބުރާ މަޖިލީހަށް ފޮނުވާލާފަ އެވެ.
ރައީސް އޮފީހުން މިއަދު ބުނީ އެ ބިލު ފޮނުވާލީ ގާނޫނުއަސާސީގައި ކަނޑައަޅާފައިވާ އުސޫލުތަކާ ތައާރަޒުވާ ކަމަށް ބަންޑާރަ ނައިބު އަހުމަދު އުޝާމް ލަފާ އަރުވާފައިވާތީ ކަމަށެވެ. އޭނާއަކީ އެމްޑީޕީން ރުހުން ނުދޭ ވަޒީރުންގެ މަޖިލީހުގެ މެމްބަރެކެވެ.
ރޯދަމަހުގެ ތެރެއަށް އިންތިހާބެއް ބާއްވަން ޖެހޭ ގޮތަށް ދިމާވާ ހާލަތްތަކުގައި އިންތިހާބު ބާއްވާނީ ރޯދަމަސް ނިމޭތާ 10 ދުވަސް ފަހުން ކަމަށް ރައްޔިތުންގެ މަޖިލީހުން ފާސްކުރީ މި ހިނގާ ފެބްރުއަރީ 11، ގަ އެވެ. އެ ބިލު ތަސްދީގު ކުރުމަށް މަޖިލީހުގެ އިދާރާއިން ރައީސް އޮފީހަށް ފޮނުވީ ފެބްރުއަރީ 12، ގަ އެވެ.
