ރޯދަ މަހު އިންތިހާބު ނުބާއްވަން ރައްޔިތުންގެ މަޖިލީހުން ނިންމާފައި ވާއިރު އެ ނިންމުން ބޮލާލައި ޖަހާފައި އިލެކްޝަންސް ކޮމިޝަން (އީސީ)ގެ މެމްބަރުންނަށް ތިބެވިގެން ނުވާނެ ކަމަށް ކުރީގެ ރައީސް އަބްދުﷲ ޔާމީނު ރޭ ވިދާޅުވެއްޖެ އެވެ.
އުފެއްދުމަށް މަަސައްކަތް ކުރައްވަމުން ގެންދަވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) ގެ އޮފީހުގައި ރޭ ބޭއްވި ބައްދަލުވުމެއްގައި ޔާމީނު ވިދާޅުވީ އިންތިހާބު ރޯދަމަހު ނުބާއްވަން މަޖިލީހުން ނިންމީމާ، ސަރުކާރު ހިންގަވަން ހުންނަވާ ބޭފުޅަކު (ރައީސް ޑރ.މުހައްމަދު މުއިއްޒު) ދެކެވަޑައިގަންނަވާ ގޮތެއް އީސީން ބަލާކަށް ނުޖެހޭ ކަަަމަށެވެ. އެއީ ރައީސް ވެސް ޒިންމާދާރުކުރުވަނީ ރައްޔިތުންގެ މަޖިލީހުން ކަމަށް ވާތީ ކަަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ މިހާރު މިއޮތީ ރައްޔިތުންގެ މަޖިލީހުން އިލެކްޝަންސް ކޮމިޝަން ޖަވާބުދާރީކުރުވަން ޖެހިފައި، މަޖިލީހުން އެ ނިންމި ކަންތައް [ރޯދައިގެ 10 ދުވަސް ފަހުން އިންތިހާބު ބާއްވާ ގޮތަށް ގާނޫނު ބަދަލުކުރަން ފާސްކުރި ފާސްކުރުން] ތަންފީޒުކުރަން އެބަ ޖެހޭ. އިލެކްޝަންސް ކޮމިޝަނުން، ރައްޔިތުންގެ މަޖިލީހުން އެ ނިންމި ނިންމުން ބޮލާލައި ޖަހާފައި މިކަން ކުރާ ކަމަށް ވަންޏާ، އިލެކްޝަންސް ކޮމިޝަނުގެ އެއްވެސް ކޮމިޝަނަރަކަށް، މި ރަައްޔިތުންގެ މަޖިލީހުގެ އިންތިހާބު ސުޕަވައިޒް ކުރައްވާކަށް ނޫނީ އޯވަސީ ކުރައްވާކަށް އިންނެވިގެނެއް ނުވާނެ،" ޔާމީނުގެ ތާއީދާ އެކު މަޖިލީހަށް ވާދަކުރައްވާ ކެންޑިޑޭޓަކާ ސުވާލު ކުރައްވަމުން އެމަނިކުފާނު ވިދާޅުވި އެވެ.
އިންތިހާބު ލަސްކުރުމާ ދެކޮޅު ހަދާއިރު އީސީން ދައްކާނެ އުޒުރަކަށް އޮންނާނީ އިންތިހާބަށް ހަރަދުވާ ފައިސާ އިތުރުވުން ކަމަށް ވެދާނެ ކަމަށާއި އެހެން ނަމަވެސް އެއީ ސަރުކާރުން މަސްވެރިންނަށް ދޭން އޮތް ފައިސާއަށް ވުރެ ކުޑަ އަދަދެއް ކަމަށް ވެސް ޔާމީނު ވިދާޅުވި އެވެ.
"މަޖިލީހަށް ނޫނީ ދައުލަތަށް ދަތިވާނެތޯ އިލެކްޝަނުން އެބުނާ ފައިސާކޮޅު އިލެކްޝަނަށް ދޭން؟" އެމަނިކުފާނު ސުވާލުކުރެއްވި އެވެ.
ކުރިއަށް އޮތް ރޯދަ މަހު ރައްޔިތުންގެ މަޖިލީހުގެ އިންތިހާބު ބާއްވަން އުޅޭ ނަމަ އިލެކްޝަންސް ކޮމިޝަނުގެ މެންބަރުން މަގާމުން ވަކި ކުރާނެކަމުގެ އިޝާރާތެއް އިދިކޮޅު މޯލްޑިވިއަން ޑިމޮކްރެޓިކް ޕާޓީން ވެސް ވަނީ ދީފަ އެވެ.
ގާނޫނުތައް މިހާރު އޮތް ގޮތުން ވެސް ރޯދައިގެ ފަހަށް އިންތިހާބު ފަސް ކުރުމުގެ ޖާގަ އިލެކްޝަންސް ކޮމިޝަނަށް އެބަ އޮތް ކަމަށާއި ރޯދަ މަހު އިންތިހާބު ބާއްވަން އެ ކޮމިޝަނުން ދައްކަނީ ބޭކާރު ހުއްޖަތެއް ކަމަށް އެމްޑީޕީން މިދިޔަ ބުރާސްފަތިދުވަހު ބޭއްވި ނޫސްވެރިންގެ ބައްދަލުވުމުގައި މަޖިލީހުގެ ނައިބު ރައީސް އަހުމަދު ސަލީމް ވިދާޅުވި އެވެ.
"އެހާ ސާފުކޮށް އޮތް ކަމެއްގައި އިލެކްޝަންސް ކޮމިޝަނުން ގާނޫނު އެއީ ސަބަބެއް ކަމަށް ދައްކަވާފައި، އަސްލު ސަބަބެއް ނުވެސް ނެތް މިކަމުގައި، މިކަން ކުރިއަށް ގެންދަވާ ކަމުގައި ވަނީ ނަމަ ދެން އޮތް ގޮތަކީ އަޅުގަނޑުމެންނަށް އެބޭފުޅުންގެ މައްޗަށް އޮތް އިތުބާރު ގެއްލޭކަން ދެއްކުން ދެއްތޯ. އެމަގުން އެކަން ކުރަންވިޔަސް އަޅުގަނޑުމެން އެކަން ކުރާނަން،" ސަލީމް ވިދާޅުވި އެވެ.
ރައްޔިތުންގެ މަޖިލީހުގެ އިންތިހާބު ރޯދަ މަހު ބޭއްވުން މަނާ ކުރާ ބިލެއް ވެސް މަޖިލީހުން ވަނީ ފާސްކޮށްފަ އެވެ. ނަމަވެސް ރައީސް ޑރ. މުހައްމަދު މުއިއްޒު އެ ބިލު އަދި ތަސްދީގެއް ނުކުރައްވަ އެވެ.
މަޖިލިސް އިންތިހާބު ރޯދަ މަހާ ދިމާވާތީ، ރޯދަ މަހުގެ 10 ދުވަސް ފަހުން އެ އިންތިހާބު ބާއްވަން ޖެހޭ ގޮތަށް އިންތިހާބުތަކާ ބެހޭ އާންމު ގާނޫނަށް މަޖިލީހުން ގެނައި އިސްލާހު ރައީސް އޮފީހަށް ފޮނުވީ ފެބްރުއަރީ 12، ގަ އެވެ.
Advertisement
