ރައްޔިތުންގެ މަޖިލީހުގެ މަސައްކަތްތަކަށް އިހުތިރާމު ނުކުރާ ވެރިޔަކު ލީޑުކުރާ ސިޔާސީ ޕާޓީއަކަށް، މަޖިލީހުގެ މެޖޯރިޓީ ދިނުމަކީ ކުރަން ހެޔޮވާ ވަރުގެ ކަމެއް ނޫން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިންތިހާބުގައި ވާދަކުރާ، ތިމަރަފުށި ދާއިރާގެ އެމްޑީޕީގެ ކެންޑިޑޭޓު ފަތުހުﷲ ޖަމީލުގެ ކެމްޕެއިނަށް މިރޭ މާލޭގައި ބޭއްވި ޖަލްސާގައި ސޯލިހު ވިދާޅުވީ މިއަދު ވެރިކަންކުރާ ކޯލިޝަނުގައި ތިއްބެވި ބޭފުޅުންނަކީ އެއްވެސް އިރެއްގައި މަލްޓިޕާޓީ ޑިމޮކްރެސީ ދަންނަ ބަޔެއް ނޫން ކަމަށެވެ.
ރައީސް ޑރ.މުހައްމަދު މުއިއްޒު ވެރިކަމާ ހަވާލުވުމަށް ފަހު ރައްޔިތުންގެ މަޖިލީހުގެ ބައެއް ނިންމުންތަކާ ދެކޮޅަށް މި ސަރުކާރުން ކޮށްފައިވާ ބައެއް ކަންތައްތައް ސޯލިހު ފާހަގަކުރެއްވި އެވެ. އެމަނިކުފާނު ވެސް ނިސްބަތްވާ އިދިކޮޅު އެމްޑީޕީގެ މެޖޯރިޓީ އޮތް މަޖިލީހުން ސަރުކާރުގެ ތިން ވަޒީރަކަށް ރުހުން ނުދޭން ނިންމުުމުން ވެސް، އެ ތިން ވަޒީރުން އައްޔަން ކުރުމަކީ އެމަނިކުފާނު ވިދާޅުވި ގޮތުގައި އެފަދަ އެއް ކަންތަކެެވެ.
ރޯދަ މަހު އެއްވެސް އިންތިހާބެއް ބޭއްވުން މަނާކޮށް މަޖިލީހުން ފާސްކުރި ބިލު ރައީސް ތަސްދީގުނުކުރައްވައި އޮތް އޮތުން ވެސް ސޯލިހު ސިފަކުރެއްވީ މަޖިލީހުގެ ނިންމުމަށް އިހުތިރާމު ނުކުރުން ކަމަށެެވެ.
"ރައްޔިތުންގެ މަޖިލީހުގެ މަސައްކަތްތަކަށް އިހުތިރާމު ނުކުރާ ބަޔަކު، މަޖިލީހަށް އިންތިހާބުކޮށްގެން، މަޖިލީހުގެ އަގުލަބިއްޔަތު ދިނުމަކީ ކުރަން ހެޔޮވާ ވަރު ކަމެއް ނޫން،" ސޯލިހު ވިދާޅުވި އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި، އިލެކްޝަންސް ކޮމިޝަން (އީސީ) މެދުވެރިކޮށް ބައެއް މެންބަރުން ގޮނޑި ގެއްލުނު ކަމަށް ކަނޑައަޅައި މެންބަރުންނަށް މަޖިލީހަށް ނުވަދެވޭ ގޮތަށް ހެދި ދުވަސްވަރުގެ ހަނދާންތައް ވެސް އާ ކުރެއްވި އެވެ.
ސޯލިހު ވިދާޅުވީ މަޖިލީހުގެ މަސައްކަތަށް އިހުތިރާމު ނުކުރުމުގެ ތާރީހެއް، މިހާރު ވެރިކަން ހިންގާ ކޯލިޝަނުގައި ތިއްބެވި ބޭފުޅުންގެ އެބަ އޮތް ކަމަށެވެ. އެމަނިކުފާނު ވިދާޅުވީ މިހާރު ވެރިކަން ހިންގުމުގައި މިހާރު ބައިވެރިވެވަޑައިނުގަންނަވަނީ އެންމެ ބޭފުޅެއް ކަމަށެވެ.
ވަކި ބޭފުޅެއްގެ ނަން ވިދާޅުނުވި ނަމަވެސް ސޯލިހު އިޝާރާތް ކުރެއްވީ، ކުރީގެ ރައީސް ޔާމީނަށެވެ.
"ހަމަ އެއް ބޭފުޅުންތަކެއް މި ތިއްބެވީ، އެންމެ ބޭފުޅެއް މަދީ، އެ ބޭފުޅާއަށް ވެސް، މި ބޭފުޅުން އެ ވިދާޅުވާ ގޮތަށް އިންސާފު ހޯދައިނުދެވިގެން މި އުޅެނީ،" ސޯލިހުގެ ވެރިކަމުގެ ދުވަސްވަރު ޖަލު ހުކުމް އިއްވި ގޮތަށް ޔާމީން އަދިވެސް ގެންދަވަނީ ރަށު ބަންދެއްގައި، އެ ހުކުމް ތަންފީޒު ކުރައްވަމުން ކަން ފާހަގަ ކުރެއްވި އެވެ.
މަސްވެރިންނަށް ފައިސާ ނުދެވި، އަދި ގައުމަށް ކުރިމަތިވެފައިވާ މާލީ ކާރިސާއަށް އިޝާރާތް ކުރައްވައި ސޯލިހު ވިދާޅުވީ ގައުމުގެ މިސްރާބު ހަމަ މަގެއްގައި ބެހެއްޓުމަށް އެމްޑީޕީން ހަމައެކަނި އަގުލަބިއްޔަތު ހޯދައިގެން ނުވާނެ ކަމަށެވެ. އެމްޑީޕީއަށް އަނެއްކާ ވެސް ސުޕަ މެޖޯރިޓީ ބޭނުންވާ ކަމަށް ވިދާޅުވި އެވެ.
އެންމެ ފަހުން ބޭއްވި ރައްޔިތުންގެ މަޖިލިހުގެ އިންތިހާބުގައި އެމްޑީޕީން ބޮޑު ކާމިޔާބީއެއް ހޯދާފައިވެ އެވެ. 2019 ވަނަ އަހަރު ބޭއްވި އެ އިންތިހާބުގައި އެ ޕާޓީން ވަނީ 87 ދާއިރާގެ ތެރެެއިން 65 ދާއިރާ ކާމިޔާބުކޮށްފަ އެވެ. އެއީ އެއް ޕާޓީއަކަށް އެހާ ބޮޑު މެޖޯރިޓީއެއް ލިބުނު ހަމައެކަނި ފަހަރެވެ.
ނަމަވެސް މި ވަގުތު އެމްޑީޕީގައި ތިބީ 44 މެންބަރުންނެވެ. އެމްޑީޕީ ދޫކޮށް ޑިމޮކްރެޓްސް ނަމުގައި އާ ޕާޓީއެއް އުފެއްދެވި، ކުރީގެ ރައީސް މުހައްމަދު ނަޝީދަށް ވަފާތެރި 12 މެންބަރަކު މިހާރު މަޖިލީހުގައި މަސައްކަތް ކުރައްވަނީ އެމްޑީޕީއާ ގުޅިގެންނެވެ.
އަދި ރިޔާސީ އިންތިހާބު ދުވަސްވަރު އެ ޕާޓީއާ ގުޅުނު ބައެއް މެންބަރުން ވެސް ހިމެނޭހެން 13 މެންބަރަކު ވަނީ މިހާރު ވެރިކަންކުރާ ޕީއެންސީއާ ގުޅިފަ އެވެ.
