ގދ. ތިނަދޫގައި ތަރައްގީ ކުރަން ނިންމި އިންޓަނޭޝަނަލް އެއާޕޯޓުގެ އެއްވެސް މައުލޫމާތެއް ނުލިބޭ ކަމަށާއި ކައުންސިލާއެކު އެފަދަ މަޝްވަރާއެއް ސަރުކާރުން ނުކުރާ ކަމަށް ގދ. ތިނަދޫ ކައުންސިލުން ބުނެފި އެވެ.
މި ނޫހާ ވާހަކަ ދައްކަވަމުން ތިނަދޫ ކައުންސިލުގެ ރައީސް ސައުދު އަލީ މިއަދު ވިދާޅުވީ، ކާޑެއްދޫ އެއާޕޯޓު ތަރައްގީ ކުރުމަށް މަސައްކަތްތަކެއް ނުކުރެވުމާއި ގުޅިގެން، ތިނަދޫގައި އިންޓާނޭޝަނަލް އެއާޕޯޓެއް އެޅުމުގެ މަޝްވަރާތައް މީގެ ކުރީ ސަރުކާރުތަކުގައި ވެސް ކުރެވުނު ކަމަށެވެ.
ނަމަވެސް، ރޭ އިއުލާނުކުރެވި، ފަހުމާނުގައި ސޮއިކުރެވިގެންދިޔަ އިންޓާނޭޝަނަލް އެއާޕޯޓު އަދި 12 ރަށަކަށް އިންވެސްޓުކުރުމުގެ މަޝްރޫގެ އެއްވެސް ތަފްސީލެއް އެ ކައުންސިލަށް ލިބިފައިނުވާ ކަން ސައުދު ފާހަގަކުރެއްވި އެވެ.
"ކައުންސިލާ މަޝްވަރާކޮށްފަ އެއް ނެތް. ކައުންސިލުން އިންޓާނޭޝަނަލް އެއާޕޯޓެއްގެ ވާހަކަ ދައްކާ ކޮންމެ ފަހަރަކު ފަޅު ތެރޭގަ އެއާޕޯޓެއް އަޅާ ވާހަކަ ދެކެވޭ. [ރިސޯޓު ހެދުމަށް ދޫކުރާ ހުވަދު އަތޮޅުގެ 12 ރަށުގެ] ޑީޓެއިލްސް ލިބޭތޯ އަޅުގަނޑުމެން މަސައްކަތް ކުރާނަން. ސާފުވާން އެބަޖެހޭ ދެއްތޯ ކޮން ތަންތަނެއްކަން،" ސައުދު ވިދާޅުވި އެވެ.
ސައުދު ވިދާޅުވީ، އެއާޕޯޓާއި ގުޅިގެން ޓޫރުޒަމަށް ދޭން ނިންމާފައިވާ ރަށްތަށް ނޭނގުނު ނަމަވެސް، އެއީ ހުވަދު އަތޮޅުގެ ކައުންސިލުތަކުގެ އިހުތިސާސުގައި ނުހިމެނޭ ރަށްތަކެއް ކަމަށް ލަފާކުރެވޭ ކަމަށެވެ.
އެގޮތުން މަޝްރޫއުގެ ތަފްސީލުތައް ނޭނގުނު ނަމަވެސް، ތިނަދޫގައި އިންޓާނޭޝަނަލް އެއާޕޯޓެއް ގާއިމް ކުރެވުމަކީ މުޅި ހުވަދު އަތޮޅުގެ އިގުތިސާދާއި ފަތުރުވެރިކަމަށް ވަރަށް ބޮޑަށް ފައިދާކުރާނެ މަޝްރޫއުއެއްކަން ސައުދު ފާހަގަކުރެއްވި އެވެ.
"އެ ޕްރޮޖެކްޓް ހަގީގަތަކަށް ވެއްޖެނަމަ، މި ސަރަހައްދުގެ އިގުތިސާދަަސް ވަރަށް ބޮޑެތި ކުރިއެރުންތަކެއް ލިބިގެންދާނެ. އިންޓަގްރޭޓެޑް ޓުއަރިޒަމާ އަމިއްލަ ވިޔަފާރިތައް ފުޅާކުރުމަށް އަދި އާންމު މީހާއަށް ވެސް އާމްދަނީ ލިބޭނެ ދޮރުތަކެއް ހުޅުވިގެން ދާނެ،" ސައު ވިދާޅުވި އެވެ.
އިންޓަނޭޝަނަލް އެއާޕޯޓު މަޝްރޫއު ކުރިއަށް ގެންދިއުމަށް އެ ކައުންސިލުގެ ފުރިހަމަ އެއްބާރުލުން ލިބޭނެ ކަމަށާއި އެ މަޝްރޫއުގައި ކުލަޖެހި ހަގީގަތަކަށް ވާނެކަމަށް އުންމީދުކުރައްވާ ކަމަށް ތިނަދޫ ކައުންސިލުގެ ރައީސް ވިދާޅުވި އެވެ.
ތިނަދޫގައި އިންޓާނޭޝަނަލް އެއާޕޯޓެއް ތަރައްގީކުރުމުގެ ފަހުމުނާމާގައި ދިވެހި ސަރުކާރުގެ ފަރާތުން ރޭ ސޮއިކުރެއްވީ އިންފްރާސްޓްރަކްޗާ މިނިސްޓަރު ޑރ. އަބްދުލް މުއްތަލިބެވެ. އެ މަސައްކަތް ހަވާލުކުރީ ތައިލެންޑުގެ ޕޭން ޕެސިފިކް ކުންފުންޏާ އެވެ. މިއީ އެ ކުންފުނިން އަމިއްލައަށް ޝައުގުވެރިކަން ފާޅުކޮށްގެން ދިވެހި ސަރުކާރާ ގުޅިގެން ހިންގާ ޕްރޮޖެކްޓެކެވެ.
އެއާޕޯޓެއް ތަރައްގީކުރުމުގެ އިތުރުން 12 ރިސޯޓަށް އިންވެސްޓުކުރުމުގެ ޝައުގު ވެސް ކޮންޓްރެކްޓަރުގެ އެބައޮތް ކަމަށާއި އެއީ 2400 އަށް ވުރެ ގިނަ އެނދު ކަމަށް މިނިސްޓަރު މުއްތަލިބު ފާހަގަކުރެއްވި އެވެ. އަދި މިއީ ދިވެހި ސަރުކާރުން އެއްވެސް ހަރަދެއް ކުރާ ގޮތަށް ހިންގާ ޕްރޮޖެކްޓެއް ނޫން ކަމަށާއި މަޝްރޫއުގެ ހުރިހާ ހަރަދެއް ކުރާނީ ކޮންޓްރެކްޓަރު ކަމަށް މިނިސްޓަރު ވިދާޅުވި އެވެ.
ފަޅެއްގައި އެއާޕޯޓެއް ތަރައްގީކުރަށް ސޮއިކުރިއިރު ސަރުކާރުން އަންނަނީ ތިނަދޫއާ ޖެހިގެން އެއާޕޯޓެއް އޮންނަ ކާޑެއްދޫއާ ގުޅާލަން ބްރިޖެއް އެޅުމުގެ މަސައްކަތް ކުރަން ފީސިބިލިޓީ ސްޓަޑީ ހަދާނެ ބަޔަކު ހޯދަން މަސައްކަތްކުރަމުންނެވެ.
