ރަހިމުގެ ދޮރަށް ޖެހޭ ކެންސަރަށް ހިލޭ ސްކްރީން ކުރެވޭ ކެމްޕޭނެއް ޓްރީޓޮޕް ހޮސްޕިޓަލުން ފަށައިފި އެވެ.
ޓްރީޓޮޕުން ބުނީ، ފެބްރުއަރީ 19، އިން 28 ގެ ނިޔަލަށް ކުރިޔަށް ގެންދާ މި ކެމްޕޭނުގައި ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހަކު ހޮސްޕިޓަލުގެ ތިންވަނަ ފަންގިފިލާގައި ހުންނަ އަންހެނުންގެ ހާއްސަ ކްލިނިކުން ރޭގަނޑު 8:00 އިން 10:00 ޖަހަންދެން ކުރިޔަށްދާނެ ކަމަށެވެ.
މި ސްކްރީނިން ކެމްޕޭން ކުރިޔަށް ގެންދިއުމަށް ހަމަޖެހިފައިވަނީ ޓްރީޓޮޕް ހޮސްޕިޓަލްގެ ތަޖުރިބާކާރު ޓީމުގެ ކޮންސަލްޓަންޓް ޑަކްޓަރުންގެ ބެލުމުގެ ދަށުން ކަމަށްވެސް އެ ހޮސްޕިޓަލުން ބުނެ އެވެ.
"މި ކެމްޕޭންގެ މަގްސަދަކީ ރަހިމުގެ ދޮރަށް ޖެހޭ ކެންސަރައި ބެހޭގޮތުން އާންމުންގެ ހޭލުންތެރިކަން އިތުރުކޮށް، އަވަހަށް ބަލި ދެނެގަނެ، ބަލިން ރައްކާތެރިވުމަށް އަޅަން ޖެހޭ ފިޔަވަޅުތައް އެޅުން،" ޓްރީޓޮޕުން ބުނެ އެވެ.
މި ކެމްޕޭނުގައި ޑޮކްޓަރަށް ދެއްކުމާއި، ސްކްރީނިން ޓެސްޓްތައް ހިލޭ ހެދޭނެ ކަމަށާއި ނަމަވެސް، ޓެސްޓް ނަތީޖާ ލިބުމުގެ ފަހުން ހޯދާ އިތުރު ހިދުމަތަކަށް އަގު ދައްކަންޖެހޭނެ އެވެ.
ސްކްރީން ކުރުމަށް އައުމުގެ ކުރިން ބަލަން ޖެހޭ ބައެއް މުހިންމު ކަންތައްތައް:
ސްކްރީން ކުރެވޭ ފަރާތަކީ ކައިވެނި ކޮށްގެން އުޅޭ ފަރާތެއްކަމުގައިވުން.
- ސްކްރީނިން ހައްދަވައިއިރު ޕީރިއަޑު ނުވަތަ ހައިލު ވެފައިނުވުން.
- ވޭތުވެދިޔަ ދެ އަހަރު ދުވަހުގެ ތެރޭގައި "ޕެޕް ސްމިއާ ސްކްރީނިން" އެއް ހަދާފައި ނުވުން.
މި ސްކްރީނިން ކެމްޕޭނުގައި އިސްކޮށް ހަރަކާތްތެރިވާ ޑަކްޓަރުން:
- ޑރ. އަކަންޝް (އަންހެނުންގެ ހާއްސަ)
- ޑރ. އަދިތި (އަންހެނުންގެ ހާއްސަ)
- ޑރ. ސަޖަނާ (އަންހެނުންގެ ހާއްސަ)
ޓްރީ ޓޮޕް ހޮސްޕިޓަލުގެ އަމާޒަކީ ހިދުމަތް ހޯދާ ފަރާތްތަކަށް ވީހާވެސް ލުއިފަސޭހަ، އަދި ފެންވަރު ރަނގަޅު ސިއްހީ ޚިދުމަތްފޯރުކޮށްދިނުން ކަމަށް އެ ހޮސްޕިޓަލުން ބުނެ އެވެ.
މި ސްކްރީނިންގް ކެމްޕޭނަށް ބުކިންގް ހެދުމަށާއި އިތުރު މަޢުލޫމާތު ހޯދަން ގުޅާނީ 3351610 ނަމްބަރަށެވެ.
