ރައްޔިތުންގެ މަޖިލީހުގެ ޖުމްލަ މެންބަރުން ގުނާ ގޮތް ބަޔާން ކުރާ މާއްދާ ބާތިލު ކުރަން ސުޕްރީމް ކޯޓަށް ދައުލަތުން ހުށަހަޅާފައި އޮއްވައި، އެ މާއްދާތައް ގަވާއިދުން ނަގައި، ބަދަލުތަކަކާއެކު އެ ވާހަކަތައް އެހެން މާއްދާއެއްގައި ހިމަނަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
ސުޕްރީމް ކޯޓުގައި އޮތް މައްސަލައަކީ ރައްޔިތުންގެ މަޖިލީހުގެ 49 ވަނަ މާއްދާގެ ކ. އާއި އ. އާއި ވ. ބާތިލު ކުރަން ބަންޑާރަ ނައިބު އަހުމަދު އުޝާމް ހުށަހެޅުއްވި މައްސަލައެކެވެ. އެ މާއްދާތަކުގައި ބުނަނީ، މަޖިލީހުގެ ޖުމުލަ މެންބަރުން ގުނާނީ އެ ވަގުތު މަޖިލީހުގައި ތިބި މެންބަރުންގެ އަދަދަށް ބަލައި، އެއްވެސް ސަބަބަކާހުރެ ހުސްވި ގޮނޑިއެއް ނުހިމަނައި ކަމަށެވެ.
ނަމަވެސް މަޖިލީހުގެ އާންމު ކޮމެޓީން މިދިޔަ ބުރާސްފަތި ދުވަހު ނިންމީ އެ ތިން މާއްދާ ގަވާއިދުން ނެގުމަށެވެ. އެކަމަކު، ފާސް ކުރީ ބަދަލުތަކަކާއެކު އެ ވާހަކަތައް އެހެން މާއްދާގައި ހިމެނުމަށެވެ. ގެނައީ ބަދަލަކީ، ހުސްވި ގޮނޑިތައް ނުލައި މަޖިލީހުގެ ޖުމުލަ މެންބަރުން ގުނޭނީ ގޮނޑި ހުސްވި ތާރީހުން ފެށިގެން އާންމު އިންތިހާބަކާ ދެމެދު ހަ މަސް ދުވަސް ނެތް ނަމަ ކަމަށެވެ.
އާންމުކޮމިޓީގެ އެ ނިންމުމަށް މަޖިލީހުގެ މިއަދުގެ ޖަލްސާގައި ބަހުސްކޮށް ފާސްކުރީ ކޮމިޓީން ނިންމި ގޮތަށް ބަދަލެއް ނުގެނެސް، އޮތް ގޮތަށެވެ. އެ ނިންމުން ފާސްކުރުމާ މެދު ގޮތެއް ނިންމަން ނެގި ވޯޓުގައި ނިންމުން ފާސްކުރަން ފެންނަ ކަމަށް 29 މެމްބަރަކު ވޯޓު ދެއްވި އިރު ނުފެންނަ ކަމަށް އަށް މެމްބަރަކު ވޯޓު ދެއްވި އެވެ.
ގާނޫނުގައި ބުނާ ގޮތުން މެންބަރެއްގެ ގޮނޑި ހުސްވެއްޖެ ނަމަ އަލުން އެ ގޮނޑިއަށް މެންބަރަކު އިންތިހާބު ކުރަންޖެހޭނީ އާންމު އިންތިހާބާ ދެމެދު ހަޔަކަށްވުރެ ގިނަ މަސް ދުވަސް އޮވެއްޖެ ނަމަ އެކަންޏެވެ.
މިވަގުތު މަޖިލީހުގައި ތިބީ 87 މެންބަރުންގެ ތެރެއިން 80 މެންބަރުންނެވެ. އެ ގޮނޑިތައް ހުސްވީ މިދިޔަ ނޮވެމްބަރު މަހެވެ. އެހެންކަމުން އާ އިސްލާހުގައި ބުނާ ހާލަތު މިވަގުތު އެބަ އޮތެވެ.
މަޖިލީހުން މިއަދު ފާސް ކުރި އާ މާއްދާގައި ބުނަނީ، "ގާނޫނުއަސާސީގެ 78 ވަނަ މާއްދާގައި ބަޔާންކޮށްފައިވާ ރައްޔިތުންގެ މަޖިލީހުގެ މެންބަރަކު މެންބަރުކަމުން ވަކިވުމުގެ ސަބަބުން މެންބަރުކަމުގެ ގޮނޑި ހުސްވި ތާރީހުން ފެށިގެން ރައްޔިތުންގެ މަޖިލީހުގެ ކުރިއަށް އޮތް އާންމު އިންތިހާބާ ދެމެދު ހަ މަސް ދުވަސް ނުވަތަ އެއަށްވުރެ ކުރު މުއްދަތެއް އޮތުމުން އެ ހުސްވި ގޮނޑިއަކަށް މެންބަރަކު އިންތިހާބު ކުރެވެން ނެތް ހާލަތުގައި ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު ގުނުމުގައި އެ ހުސްވި ގޮނޑި ނުހިމެނޭނެ" ކަމަށެވެ.
ބާތިލް ކުރަން ކޯޓަށް ހުށަހަޅާފައި އޮތް އަދި ގަވާއިދުން ނަގަން ފާސް ކުރި މާއްދާތައް
(ކ) މި ގަވާއިދުގެ ބޭނުމަށްޓަކައި ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނުމުގައި ބަލާނީ އެ ވަގުތު މަޖިލީހުގެ މެންބަރުކަމުގައި ދެމިތިބި މެންބަރުންގެ ޖުމްލަ އަދަދަށް.
(އ) ރައްޔިތުންގެ މަޖިލީހުގެ އުމުރު ހަމަވުމުގެ ސަބަބުން ނޫން ގޮތަކަށް އެއްވެސް އިންތިހާބީ ދާއިރާއެއްގެ ގޮނޑިއަށް މެންބަރަކު އިންތިހާބު ކުރުމާ ހަމައަށް މަޖިލީހުގެ ޖުމްލަ މެންބަރުންގެ އަދަދު ގުނުމުގައި އެ އިންތިހާބީ ދާއިރާއެއް ނުގެނޭނެ.
(ވ) ހިނގަމުންދާ މަޖިލީހުގެ އުމުރެއްގައި މަޖިލީހުގެ ޖުމްލަ މެންބަރުންގެ އަދަދަށް އެއްވެސް ބަދަލެއް އައިސްފި ނަމަ އެ ބަދަލެއް އަންނަ ތާރީހާ ވިދިގެން އެންމެ އަވަހަށް ބާއްވާ މަޖިލީހުގެ ޖަލްސާއެއްގައި އެކަން މަޖިލީހުގެ ރައީސް އިއުލާނު ކުރަންވާނެ.
ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާގައި ބަޔާން ކުރާ ޖުމުލަ މެންބަރުން ގުނާ ގޮތުގެ މާއްދާތަކަށް އަމަލު ނުކުރަން ބަންޑާރަ ނައިބު އެންމެ މަތީ ކޯޓަށް ހުށަހެޅި މައްސަލައިގައި ސުޕްރީމް ކޯޓުން ވަނީ އަމުރެއް ނެރެފަ އެވެ. އެކަމަކު އެއަށްފަހު މަޖިލީހުން ފާސް ކުރީ ގަވާއިދާ އެއްގޮތަށް މެންބަރުން ގުނައި، ސުޕްރީމް ކޯޓުގެ އަމުރަށް ތަބާނުވުމަށެވެ.
